ނިމިދިޔަ ސަރުކާރުން، ގެދޮރުވެރިޔާ ސްކީމުގެ ދަށުން ދޫކޮށްފައިވާ ފްލެޓުތައް ދޫކޮށްފައިވަނީ އެ ލިބެންޖެހޭ މީހުންނަށްތޯ އިތުރަށް ޔަގީންކުރުމަށް ޓަކައި، ރައްޔިތުން އިތުބާރުކުރާ ގަދަރުވެރި މީހުންގެ މައްޗަށް އެކުލެވޭ ކޮމިޓީއެއް އެކުލަވައިލާ ލިސްޓުތަކުގެ ސައްހަކަން ކަށަވަރުކުރާނެކަމަށް ރައީސް ޑރ. މުޙައްމަދު މުއިއްޒު މިރޭ ވިދާޅުވެއްޖެއެވެ.
ސަރުކާރުން ކުރިއަށް ގެންދާ "އަހާ ފޯރަމް"ގެ ދެވަނަ ފޯރަމް މިރޭ ވަނީ ބާއްވައިފައެވެ. މި މިރޭވަނީ ރައީސް ޑރ. މުޙައްމަދު މުއިއްޒު ބައިވެރިވެވަޑައިގެންނެވިއެވެ.
ފޯރަމްގައި ބައިވެރިވި އާންމު ރައްޔިތެއްގެ ސުވާލަކަށްވީ، ގެދޮރުވެރިޔާ ސްކީމުގެ ދަށުން ފްލެޓް ލިބޭ މިންވަރަށް މާކްސް ލިބުނު ނަމަވެސް ފަހުން އޭސީސީއަށް އެ މައްސަލަ ވަދެ، މިހާރު އޮތީ ފްލެޓު ނުލިބޭ މީހުންގެ ތެރޭގައި ކަމަށެވެ. އެ ކަންބޮޑުވުމާއެކު އޭނާވަނީ އެ ފްލެޓް ލިބުމުގެ ޝަރުތު ބެލި ގޮތަކީ ކޮބައިތޯ ބަލައި، ދެން އެ ފްލެޓު ލިބިދާނެތޯ ސުވާލުކޮށްފައެވެ.
އެ ސުވާލުގެ ޖަވާބުގައި ރައީސް ވިދާޅުވީ، ފްލެޓަށް ޝަރުތު ހަމަވޭތޯ ނިންމުމަކީ ސަރުކާރުން "އަމިއްލަ އަމިއްލައަށް ކުރާ ކަމެއް"ގެ ގޮތުގައި ބާއްވަން ބޭނުންފުޅުވެވަޑައިނުގަންނަވާ ކަމަށެވެ.
ސަރުކާރުން ކުރިއަށް ގެންދާ "އަހާ ފޯރަމް"ގެ ދެވަނަ ފޯރަމް -- ފޮޓޯ: ރައީސް އޮފީސް
އޭގައި ރައްޔިތުންގެ ބަސް ވެސް ހިމެނުން މުހިންމު ކަމަށާއި، އެއީ ރައްޔިތުން އިތުބާރުކުރާ މީހުންގެ މައްޗަށް އެކުލެވޭ ކޮމިޓީއެއް އުފެއްދުމުގެ ބޭނުންކަމަށް ރައީސް ވިދާޅުވިއެވެ.
"...ރަނގަޅު ބޭފުޅުންކޮޅެއްގެ މައްޗަށް ހިމެނޭ ކޮމިޓީއެއް ވެސް އުފައްދައި، މާނައަކީ އިތުބާރު ގެންނަން ބޭނުން. އަޅުގަނޑުމެން ކުރާ ކަމެއް އެއީ ސަރުކާރުގެ ތެރެއިން އަމިއްލަ އަމިއްލައަށް ކުރާ ކަމަކަށް ނުހަދާ، ރައްޔިތުން ވެސް އެ ބައެއްގެ ބަސް ގަބޫލުކުރާ ކަހަލަ ބޭފުޅުންކޮޅެއްގެ މައްޗަށް އެކުލެވޭ ކޮމިޓީއެއް ހަދައިފައި، އޭސީސީން އެ ނިންމި ނިންމުން އެ ލިސްޓު އަޅުގަނޑުމެން އެ ކޮމިޓީ ލައްވައި ބަލާނީ،" ރައީސް ވިދާޅުވިއެވެ.
ރައީސް ވިދާޅުވީ އޭރުން، ގޯސްކޮށް މީހަކަށް ފްލެޓެއް ދީފައި އޮތްތޯ ޔަގީންވާނެ ކަމަށެވެ.
ނަމަވެސް މި ވަގުތަށް އެ ކަމަށް ވެސް އޮތް ހުރަހަކީ މިހާރު އޭސީސީގެ އަތުގައި އޮތް ގެދޮރުވެރިޔާ ޕޯޓަލްގެ އެކްސެސް ސަރުކާރުގެ އަތުގައި ނެތުން ކަމަށެވެ.
އެ މަނިކުފާނު ވިދާޅުވީ ފްލެޓް ނުލިބުނުކަމަށް އޭސީސީން ނިންމި މީހުންނަށް، ކޮމިޓީ މަރުހަލާގައި ފްލެޓް ނުދޭން ނިންމި ނަމަވެސް ސަރުކާރުން ކުރިއަށް ހުރި ދުވަސްތަކުގައިި ހިންގާނެ މަޝްރޫއުތަކުން އެ ރައްޔިތެއްގެ ހައްގު ކަށަވަރުކޮށްދެއްވާނެ ކަމަށެވެ.
"އެ ހިސާބަށް ދިޔަޔަސް އެ މީހެއްގެ ހައްގު އެއްކޮށް ގެއްލޭގޮތް ވިޔަ ނުދޭނަން. އަދި އަޅުގަނޑުމެން ބައިވަރު ހައުސިން މަޝްރޫއުތައް ހިންގަން އެބަހުރި. ހަމަ މި އަހަރު ތެރޭގައި ވެސް ފަށަން،" ރައީސް ވިދާޅުވިއެވެ.
ގިނަ އަދަދެއްގެ ރައްޔިތުންގެ މިހާރުގެ އެންމެ ބޮޑު އެއް ކަންބޮޑުވުމަކީ ނިމިދިޔަ ސަރުކާރުގެ ގެދޮރުވެރިޔާ ސްކީމުގެ ދަށުން ލިބުނު ފްލެޓަށް ވީނުވީއެއް ނޭނގުމެވެ. އަދި ބިންވެރިޔާ ސްކީމުގެ ދަށުން ދޫކުރި ބިންތައް ވެސް އަދި ނުލިބި އޮތުމެވެ.
ގެދޮރުވެރިޔާ ސްކީމުގެ މައްސަލަ އަދި ވެސް އޮތީ އޭސީސީއާ ހަމައިގައެވެ.