ރޯދަ މަހާ ދިމާކޮށް އެންމެ ޑިމާންޑު ބޮޑުވާ އެކައްޗަކީ ކަރަލެވެ. މާރުކޭޓުގައި ކަރާ ގެންގުޅޭ ވަރަށް ބަލާފައި ވެސް، ރޯދަ މަހު އެންމެ ގިނައިން ގިރަނީ ކޯޗެއްގެ ފަނި ކަމެއް އެނގޭނެއެވެ. އެކަމު ކަރާ ފަނި ގިނަ ގޭގައި ބޮއެ އުޅޭ ގޮތާ މެދު ބައެއް ކަހަލަ ދެބަސްވުން ތަކެއް އެބައޮތެވެ.
ގިނަ ގޭގޭގައި ރޯދަ ވީއްލުމަށް މަދުވެގެން ދެވަރަކަށް ފަނި ނުވަތަ ޖޫސް ގިރާނެއެވެ. އެއިން އެކައްޗަކީ ގިނަ ފަހަރަށް ކަރާ ފަންޏެވެ.
ނަމަވެސް އެކި ގޭގޭގައި ކަރާ ފަނި ގިރައި އުޅެނީ އެކި ގޮތްގޮތަށެވެ. އެންމެ އާންމުކޮށް އަދި އެންމެ ގިނަ ބައެއްގެ މެދުގައި ކަރާފަނި މަގުބޫލު ވެފައިވާ ގޮތަކީ އެ ކޮށައިގެން ފެނާ އެއްކޮށްގެން ފަނި ބުއިމެވެ. މިގޮތަށް ކަރާ ފަނި ގިރާއިރު ފަންޏާ އެކު ކަރާކޮޅުތައް ކާން ވެސް ލިބެއެވެ.
އަނެއް ގޮތަކީ ބްލެންޑަރަކަށް ލައި އޮމާންކޮށް ފަނި އެއްކޮށް ގިރާލުމެވެ. މިއީ ވެސް ބައެއް ގޭގޭގައި މަގުބޫލު ގޮތެކެވެ.
"މި ގޭގައި އާންމުކޮށް ހަމަ ކަރާ ފަނި ބޮނީ ކޮށައިގެން. ކަރާ ފަނި ކަރާ ފަންޏަށް ވަނީ އޭރުން،" އުމުރުން 25 އަހަރުގެ ޒުވާނަކު ކިޔައިދިނެވެ.
ކަރާ ފަނި އަސްލު ގުޅިފައިވަނީ ކުރީގެ ހަނދާންތަކާ ނުވަތާ ނޮސްޓަލްޖާ އަކާއެވެ. އެއާ އެކު މިގޮތަށް ކަރާ ފަނި ގިރައިގެން ބޮވުމުން ކުރީގެ ރޯދަ މަހުގެ ހަނދާންތައް އާވާ ކަމުގައި އޭނާ ފާހަގަކުރިއެވެ.
އެއާ ހިލާފަށް ބްލެންޑަރުގައި ކަރާ ފަނި ގިރުން މާ ފަސޭހައެވެ. ބޮޑެތިކޮށް ކަރާ ކޮށާލުމަށްފަހު ބްލެންޑަރަށް އަޅައި އެ ބޭނުން ކޮށްލަން ފަސޭހައެވެ. އެއްބައި މީހުން ބުނާ ގޮތުގައި މިހެން ކަރާ ފަނި މާ މީރެވެ. އެއީ ކަރާގެ ރަހަ ގަދަވެފައި ގިނަ މަސައްކަތްތައް ކުރަން ނުޖެހޭތީއެވެ.
ކޮންމެއަކަސް ކަރާ ފަނީގެ ބަހުސަކީ ދެ ބަޔަކަށް ބެހި އެއް ކޮޅުން ވެސް އަނެއް ކޮޅަށް ދޫ ދޭން ބޭނުން ނުވާ ބަހުސެކެވެ. ތި ގޭގައި އެންމެ ގިނައިން ކަރާ ފަނި ގިިރަނީ ކިހިނެއް ހެއްޔެވެ؟ އަދި ކަރާ ފަނި އެންމެ ކަމުދަނީ ކޮން ގޮތަކަށް ގިރައިގެން ހެއްޔެވެ؟