ގޫގުލްއިން އެ ކުންފުނީގެ ވޮލެޓް އެޕްލިކޭޝަނަށް މުޅިން އާ ފީޗާތަކެއް ތަޢާރަފުކޮށްފިއެވެ.
ގޫގުލްއިން އިތުރުކުރި އެންމެ ފާހަގަކޮށްލެވޭ އެއް ކަމަކީ ގޫގުލް ވޮލެޓަށް ޓިކެޓާއި ބޯޑިން ފާހާއި އެހެނިހެން ފާސްތައް އެޑްކޮށް، ފަސޭހަކަމާއެކު ތަރުތީބު ކުރެވޭ ފީޗާއެވެ.
މި ހަފުތާގައި ނެރުނު އެ އަޕްޑޭޓާއެކު، ގޫގުލް ވޮލެޓަށް މިހާރު އޮޓޮމެޓިކުން ފިލްމު ތީއޭޓަރުގެ ޓިކެޓާއި ބޯޑިން ޕާސް އެޑްކޮށްލެވޭއިރު، ޖީމެއިލް އިންބޮކްސްގައި ޓިކެޓް ކޮންފަމޭޝަން ޖައްސާފައިވާ ނަމަ ކޮންމެ ވަގުތަކުވެސް ވޮލެޓުން އެމަސައްކަތް އޮޓޮމެޓިކުން ކޮށްދޭނެއެވެ.
އަލަށް ތަޢާރަފުކުރި އޮޓޯ އެޑް ކެޕޭސިޓީ އަދި، މަސައްކަތް ކުރަނީ ބައެއް ތިއޭޓަރުތަކާއި އެއާލައިންތަކަށް ކަމަށްވިޔަސް ގޫގުލްއިން ބުނީ ކުރިއަށް އޮތް މަދު މަސްތަކެއްގެ ތެރޭގައި ޕާޓްނަރުން އިތުރުވާނެ ކަމަށެވެ.
މި އަޕްޑޭޓް ތައާރަފުކޮށްފައިވަނީ، ގޫގުލް ވޮލެޓަކީ އެމީހެއްގެ ހުރިހާ ފާސްތަކަކާއި ޓިކެޓެއްގެ ސެންޓްރަލައިޒްޑް ހަބަކަށް ހެދުމަށް އެ ކުންފުނިން ކުރާ މަސައްކަތުގެ ތެރެއިންނެވެ.
މިދިޔަ މަހު އެ ކުންފުނިން ވަނީ 'ވެއާ އޯއެސް'އަށް ވޮލެޓް އެކްސެސް ފުޅާކޮށް، އެންޑްރޮއިޑް ސްމާޓްވޮޗްގެ ޔޫޒަރުންނަށް ބޯޑިން ޕާސް އަދި އިވެންޓް ޓިކެޓް ފަދަ ޕާސްތައް އެ މީހުންގެ އަތުކުރީ ގަޑިންވެސް ބެލޭނެ ގޮތް ހަދައިފައެވެ.
ވޮލެޓުން މެނުއަލްކޮށް ޕާސް އާކައިވް ކުރުމުގެ ގާބިލުކަން ވެސް ގޫގުލްއިން ފޯނަށާއި ގަޑިއަށްވެސް އިތުރުކުރިއެވެ. އާކައިވްކޮށްފައިވާ ޕާސްތައް ޚާއްޞަ "އާކައިވްޑް ޕާސް" ސެކްޝަނެއްގައި ޓަކްކޮށްފައި ހުރި ނަމަވެސް ބޭނުންވެއްޖެ ނަމަ ފަސޭހައިން ރީސްޓޯ ކުރެވޭނެއެވެ.
މިފަހުގެ އިތުރު އަޕްޑޭޓްތަކާއެކު ގޫގުލް ވޮލެޓް ވާނީ ޑިޖިޓަލް ޓިކެޓާއި ޕާސްތައް އިންތިޒާމުކޮށް ޑިވައިސްތަކުގައި ލިބެން ހުންނާނެ ބާރުގަދަ ވަސީލަތަކަށެވެ. އޮޓޯ-އެޑް އާއި ބޯޑިން ޕާސް ފީޗާގެ ސަބަބުން އެ ތަޖުރިބާ އިތުރަށް ފުރިހަމަވާނެއެވެ.