ފަލަސްތީނަށް ތާއީދުކޮށް އިހުތިޖާޖު ކުރި އިންޖިނިއަރަކު ގޫގުލްގެ ވަޒީފާއިން ވަކިކޮށްފިއެވެ.
އެމެރިކާގެ ނިއުޔޯކް ސިޓީގައި ބޭއްވި އެ ކުންފުނީގެ ބޮޑު އިވެންޓެއްގައި ފަލަސްތީނަށް ތާއީދުކޮށް އިހުތިޖާޖުކުރި އިންޖިނިއަރަކު ގޫގުލް އިން ވަޒީފާއިން ވަކިކޮށްފައިވާއިރު، އޭނާ ވަޒީފާއިން ވަކިކުރީ ޣައްޒާގައި އިސްރާއީލުން ހިންގަމުންދާ ގަތުލުއާންމަށް ހިތްވަރުލިބޭ ސޮފްޓްވެއާއެއް ހަދަން ދެކޮޅު ހެދުމުންކަމަށް ވެސް ބައެއް ރިޕޯޓްތައް ބުނެއެވެ.
އެ މުވައްޒަފު އިހުތިޖާޖުކުރީ ގޫގުލް އިޒްރޭލުގެ ވެރިޔާ ބަރަކް ރެގެވް ހޯމަ ދުވަހު އިންޑަސްޓްރީ ކޮންފަރެންސެއްގައި ތަގުރީރުކުރައްވަމުން ދަނިކޮށެވެ.
ގޫގުލްގެ ތަރުޖަމާނަކު ނޫސްވެރިންނަށް މައުލޫމާތު ދެއްވަމުން ވިދާޅުވީ އެ މުވައްޒަފު ވަޒީފާއިން ވަކިކުރީ "ކުންފުނިން ސްޕޮންސަރުކޮށްފައިވާ ރަސްމީ އިވެންޓަކަށް ނުފޫޒު ފޯރުވުމުގެ ސަބަބުން" ކަމަށެވެ.
ގޫގުލްގެ ތަރުޖަމާނު ވިދާޅުވީ ކޮންމެ މައްސަލައެއް ދިމާވި ނަމަވެސް މި އަމަލަކީ ބަލައިގަނެވޭނޭ އަމަލެއް ނޫން ކަމަށާއި މުވައްޒަފު ވަޒީފާއިން ވަކިކުރީ ގޫގުލްގެ އުސޫލުތަކާ ޚިލާފުވެގެން ކަމަށެވެ.
ޓެކް ފޯކަސްޑް ވަޔާޑް ނިއުސް ވެބްސައިޓްގައިވާ ގޮތުން މި ހަފުތާގައި ގޫގުލްގެ 600 އަށްވުރެ ގިނަ މުވައްޒަފުން ވަނީ ގޫގުލްގެ މާކެޓިން ލީޑަޝިޕަށް އިންޓާނަލް ސިޓީއެއް ފޮނުވައި، ރެގެވް ވާހަކަ ދެއްކެވި މައިންޑް ދަ ޓެކް ފޯރަމްގެ ސްޕޮންސާޝިޕް ޓެކް ކުންފުނިން ދޫކޮށްލުމަށް އެދިފައެވެ.
މި އެއްވުމަކީ އިސްރާއީލުގެ ޓެކް އިންޑަސްޓްރީގެ ތެރޭގައި ހުރި ކުރިއެރުންތައް ފާހަގަކުރުމުގެ ގޮތުން ބޭއްވި ހަރަކާތެކެވެ.
ޕްރޮޖެކްޓް ނިމްބަސް އަކީ ޒަމާނުއްސުރެ ފަލަސްތީނަށް ތާއީދުކުރާ ވަކާލާތުކުރާ ފަރާތްތަކުން ކުށްވެރިކުރަމުން އަންނަ ޕްރޮޖެކްޓެކެވެ. އޭގެ ތެރޭގައި ގޫގުލް އާއި އެމެޒޯން އާއި އިޒްރޭލު ސަރުކާރާއި އަސްކަރިއްޔާއާ ދެމެދު އެއް ބިލިއަން ޑޮލަރަށް ވުރެ ގިނަ ޑޮލަރުގެ އެއްބަސްވުމެއްގެ ދަށުން ތެލް އަވީވް އަށް ކްލައުޑް ކޮމްޕިއުޓިންގެ ހިދުމަތް ފޯރުކޮށްދިނުން ހިމެނެއެވެ.
ގާޑިއަންގައި 2021 ވަނަ އަހަރު ޝާއިއުކުރި ގޫގުލް އަދި އެމެޒޯންގެ މުވައްޒަފުންގެ އޯޕަން ސިޓީގައި ވަނީ އެ އެއްބަސްވުން ކުށްވެރިކޮށް، "އިސްރާއީލުގެ އަސްކަރިއްޔާ އާއި ސަރުކާރުން ހިންގާ ސިސްޓަމެޓިކް ތަފާތުކުރުންތަކާއި ޑިސްޕްލޭސްމަންޓްގެ ސަބަބުން ފަލަސްތީނަށް އިތުރަށް އަނިޔާވެރި އަދި ނުރައްކާތެރި ކަމަކަށް ވެގެންދާނެ" ކަމަށް ބުނެފައެވެ.