ފުދުންތެރި، މިނިވަން, އަމިއްލަ ފައިމައްޗަށް ތެދުވެފައި ތިބި ބަޔަކަށް ވެވޭނީ ދިވެހިންގެ ކަންކަން ނިންމުން އެހެން ބައެއްގެ އަތްމަތީގައި އޮތް އޮތުން ބަދަލު ކުރެވިގެން ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ރ. އިނގުރައިދޫ ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުން ރައީސް ވިދާޅުވީ، ކަންކަން ބައްޓަން ކުރަނީ ދިވެހިންގެ ކަންކަން ނިންމުން އެހެން ބައެއްގެ އަތްމަތީގައި އޮތް އޮތުން ބަދަލު ކުރުމަށް ކަމަށެވެ.
"އިރާދަކުރެއްވިއްޔާ އެކަން އެގޮތުގައި ހާސިލް ވެގެންދާނެ،" ރައީސް ވިދާޅުވިއެވެ.
އެމަނިކުފާނު ވިދާޅުވީ، މިނިވަންކަން ޔަގީންކުރުމަށް ދިވެހިންގެ ސިޔާދަތީ ބާރު ހިނގާ ސަރަހައްދަކީ ދިވެހިންގެ އަމިއްލަ ބާރުގެ ދަށުގައި އޮތް ސަރަހައްދެއްކަން ޔަގީން ކުރާނެ ކަމަށެވެ. އެގޮތުން ރައްޔިތުން ބޭނުންވާ ކަންކަމުގެ ފުރިހަމަ މަންޒަރު ފެނިލައްވާ ކަމަށް އެމަނިކުފާނު ވިދާޅުވިއެވެ.
ރާއްޖޭގައި މަޝްރޫއުތައް ކުރިއަށް ގެންދަން މާބޮޑު ޖާގައެއް ބަޖެޓުން ދީފައި ނެތްކަން ފާހަގަ ކުރައްވައި ރައީސް ވިދާޅުވީ، އާމުދަނީ ފުޅާކުރަން މަސައްކަތް ކުރަނީ އެހެންވެގެން ކަމަށެވެ.
އެގޮތުން ދަތި އުނދަގޫތަކުން އަރައިގަތުމަށް މިހާރު ވަރަށް ބޮޑެތި ކުރިއެރުންތަކެއް ލިބިފައިވާކަމަށް ރައީސް ވިދާޅުވިއެވެ.
"އެކަން އިންޓަނޭޝަނަލް ކަމާގުޅުންހުރި އިދާރާތަކުން ވެސް އެދަނީ ފާހަގަ ކުރަމުން. އިރާދަކުރެއްވިއްޔާ ކުރިއަށް އޮތް ދުވަސްތަކުގައި އޭގެ ފޮނި މީރުކަން ފެނިގެން ދާނެ،" ރައީސް ވިދާޅުވިއެވެ.
ދިވެހިންގެ ކަންކަން ނިންމުމުގެ ބާރު އެހެން ބައެއްގެ އަތްމަތީގައި އޮތް ކަމަށް ވިދާޅުވި އިރު، މަޖިލީހުން މި ސަރުކާރުގެ ތިން ވަޒީރަކަށް ރުހުން ނުދިނީ ބޭރުގެ ބަޔަކު މަޖުބޫރުކޮށްގެން ކަމަށް ވެސް ރައީސް މީގެ ކުރިން ވަނީ ވިދާޅުވެފައެވެ.