ކުރިޔަށް ދާން ބޭނުންވަނީ ރައްޔިތުންނަށް ނަތީޖާ ނެރެދިނުމުގައި: ރައީސް

އެ މަނިކުފާނު ކުރިޔަށް ވަޑައިގަންނަވަން ބޭނުންވަނީ ރައްޔިތުން ބޭނުންވާ ކަންކަން ފަހިކޮށްދީ، ނަތީޖާ ނެރެދިނުމުގައި ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެވެ.

އެ މަނިކުފާނު މިހެން ވިދާޅުވީ ރ. އަދި ބ. އަތޮޅަށް އެ މަނިކުފާނު މިއަދު ފެއްޓެވި ދަތުރުފުޅުގެ ތެރެއިން ރ. އަލިފުށްޓަށް ވަޑައިގެން އެ ރަށުގެ ރައްޔިޔުންނާ ބައްދަލު ކުރެއްވުމަށް ބޭއްވި ޖަލްސާގައި ވާހަކަފުޅު ދައްކަވަމުންނެވެ.

މި ޖަލްސާގައި ރައީސް ދެއްކެވި ވާހަކަފުޅުގައި އެ މަނިކުފާނު ވަނީ ރިޔާސީ އިންތިޚާބުގެ ކެމްޕޭން ތެރޭގައި އަލިފުށްޓަށް ކުރެއްވި ދަތުރުފުޅުގައި ވެވަޑައިގަތް ވައުދުތައް، ރައްޔިތުން އެދޭ ގޮތަށް ފުއްދަވާނެ ކަމުގެ ޔަގީންކަން ދެއްވާފައެވެ.

އަލިފުށީ އެއާޕޯޓު މަޝްރޫއަކީ އެމްޓީސީސީން ޑިޒައިން އެންޑް ބިލްޑް އުސޫލުން 451 މިލިއަން ރުފިޔާއަށް، 2021ވަނަ އަހަރުގެ ސެޕްޓެންބަރު މަހުގައި ހަވާލުކުރި މަޝްރޫއެކެވެ. މި މަޝްރޫއުގެ ދަށުން އެއާޕޯޓް ޓާމިނަލް އިމާރާތުގެ ފައުންޑޭޝަން މަަސައްކަތްތައް ވަނީ ނިމިފައެވެ. އެހެން ނަމަވެސް އެ މަޝްރޫއު މަސައްކަތް ވަނީ ދިގުލައިގެން ގޮސްފައެވެ.

މި ކަމާ ގުޅިގެން ރައީސްވަނީ އެއާޕޯޓުގެ މަޝްރޫއު، އެ ރަށުގެ ރައްޔިތުން އެދޭ ގޮތަށް، އަދި ރައީސް ވައުދުވެ ވަޑައިގަތް ގޮތަށް، ސިނާއީ ސަރަހައްދެއް ގާއިމް ކުރުމަށް ބޭނުންވާނެ ބިން އިތުރުކޮށްގެން ކުރިޔަށް ގެންގޮސްދެއްވާނެ ކަމަށެވެ.

"ބައެއް ރަށްތަކަށް ގޮއްސަ އަޅުގަނޑު މިގޮތަށް ކަންކަން ކޮށްދޭ ވާހަކަ މި ދަތުރުތަކުގައި ދެއްކީމަ ބައެއް ބޭފުޅުން ވިދާޅުވަނީ އަނެއްކާ ވެސް ވައުދުވަނީއޭ، ނޫން. ވައުދު ކުރިން ހުރީވެފައި،" ރައީސް ވިދާޅުވިއެވެ.

މީގެ އިތުރުން ވެސް އަލިފުށީގެ ރައްޔިތުންނަށް ރައީސް ވައުދުވެ ވަޑައިގެންނެވި، އެ ރަށުގެ ޞިއްޙީ މަރުކަޒު ހޮސްޕިޓަލަކަށް ބަދަލު ކުރުމާއި، ސްޕޯޓްސް ކޮމްޕްލެކްސްގެ މަސައްކަތް މިހާރު ކުރިޔަށްދާ އިރު، އެތަނުގައި އިތުރު ކުޅިވަރުތައް ކުޅެވޭނެ އިންތިޒާމް ހަމަޖެއްސުމާއި، ކުނި މެނޭޖް ކުރުމަށްޓަކައި ޚާއްޞަ މަޝްރޫއެއްގެ އިތުރުން ބޭންކުގެ ބްރާންޗެއް އެ ރަށުގައި ގާއިމް ކޮށްދިނުމުގެ ވައުދު އެ މަނިކުފާނު ފާހަގަކުރެއްވިއެވެ.

އެ މަނިކުފާނު ވަނީ އެ ހުރިހާ މަޝްރޫއެއްގެ މަސައްކަތް މިއަަހަރު ތެރޭގައި ފެށިގެންދާނެ ކަމުގެ ޔަގީންކަން ދެއްވާފައެވެ.

ރ. އަދި ބ. އަތޮޅަށް ރައީސް ކުރައްވަނީ ތިން ދުވަހުގެ ދަތުރުފުޅެކެވެ. މި ދަތުފުޅުގައި ވެސް ރައީސްގެ އަރިހުގައި ސަރުކާރުގެ އިސް ވަފުދެއް ބައިވެރިވެ ވަޑައިގަންނަވައެވެ.