މިދިޔަ މަހު ރާއްޖެއަށް އިންޕޯޓު ކުރި މުދާ 31 އިންސައްތަ އިތުރުވީ ނަމަވެސް މުދާ އެކްސްޕޯޓު ކުރި މިންވަރު ހަމަ އެ އަދަދަށް ދަށަށް ގޮސްފައިވާ ކަމަށް މޯލްޑިވްސް ކަސްޓަމްސް ސާވިސްގެ ތަފާސްހިސާބުތަކުން ދައްކައިފިއެވެ.
ކަސްޓަމްސްއިން މިއަދު އާންމުކުރި ތަފާސްހިސާބުތައް ދައްކާގޮތުގައި މިދިޔަ މަހު އާމްދަނީގެ ގޮތުގައި 373 މިލިއަން ރުފިޔާ ލިބުނެވެ. މިދިޔަ އަހަރުގެ ޖެނުއަރީ މަހު އެ އަދަދު ހުރީ 349 މިލިއަން ރުފިޔާގައެވެ. އެހެންވެ، މިއީ ހަތް އިންސައްތައިގެ ކުރިއެރުމެކެވެ.
ތަފާސްހިސާބުތައް ދައްކައި ގޮތުން މިދިޔަ މަހު 5.1 ބިލިއަން ރުފިޔާގެ މުދާ ވަނީ އިމްޕޯޓުކޮށްފައެވެ. އެ އަދަދު މިދިޔަ އަހަރުގެ ޖެނުއަރީގައި ހުރީ 3.9 ބިލިއަން ރުފިޔާގައެވެ. އެހެންވެ، އެއީ، 31 އިންސައްތައިގެ ކުރިއެރުމެކެވެ.
މިދިޔަ މަހު އެންމެ ގިނައިން ރާއްޖެއަށް މުދާ އެތެރެކޮށްފައިވަނީ އެކުވެރި އަރަބި އިމާރާތް (ޔޫއޭއީ)އިންނެވެ. އެ ގައުމުން 928 މިލިއަން ރުފިޔާގެ މުދާ ވަނީ އެތެރެކޮށްފައެވެ. ދެވަނައަށް އެންމެ ގިނައިން މުދާ އެތެރެކުރި އޮމާނުން 774 މިލިއަން ރުފިޔާގެ މުދާ ވަނީ އެތެރެކޮށްފައެވެ. ތިންވަނައަށް އެންމެ ގިނައިން އިމްޕޯޓުކުރީ އިންޑިއާއިންނެވެ. އެ ގައުމުން 700 މިލިއަން ރުފިޔާގެ މުދާ ވަނީ އިމްޕޯޓުކޮށްފައެވެ.
އެކަމަކު، އޭގެ ކުރީ ޑިސެމްބަރު މަހު އެންމެ ގިނައިން މުދާ އިމްޕޯޓުކުރި ޗައިނާއިން މިދިޔަ މަހު އިމްޕޯޓުކޮށްފައިވަނީ 671 މިލިއަން ރުފިޔާގެ މުދަލެވެ. ފަސްވަނައަށް އެންމެ ގިނައިން މުދާ އިމްޕޯޓުކުރި ސިންގަޕޫރުން ވެސް 550 މިލިއަން ރުފިޔާގެ މުދާ ވަނީ އިމްޕޯޓުކޮށްފައެވެ.
މީގެ އިތުރުން، މިދިޔަ މަހު ރާއްޖެއިން އެކްސްޕޯޓުކުރި މުދަލުގެ އަގު 31 އިންސައްތައަށް ދަށްވެފައިވާ ކަމަށް ތަފާސްހިސާބުތަކުން ދައްކައެވެ.
އެގޮތުން މިދިޔަ މަހު ރާއްޖެއިން އެކްސްޕޯޓު ކުރެވިފައިވަނީ 173 މިލިއަން ރުފިޔާގެ މުދަލެވެ.
އެންމެ ގިނައިން މުދާ ބޭރުކޮށްފައިވަނީ ތައިލޭންޑާއި ޖަރުމަނު ވިލާތާއި އިނގިރޭސި ވިލާތާއި ބަންގްލަދޭޝްގެ އިތުރުން އިންޑިއާއަށެވެ.
ތަފާސްހިސާބުތައް ދައްކައި ގޮތުން މިދިޔަ މަހު ރާއްޖެއިްނ ބޭރުން 132 އުޅަނދު ވަނީ އައިސްފައެވެ. އަދި، 140 އުޅަނދު ވަނީ ރާއްޖެއިން ފުރައިފައެވެ.