މުހައްމަދު ނިޔާޒް (ޓެޑްރީ) ގިނަ ދުވަސްތަކެއްގެ މަސައްކަތް ހަގީގަތަކަށް ހަދައި ނެރެން ތައްޔާރުވެފައިވާ ފިލްމު "ލަސްވިޔަސް"ގެ މުޅިން އާ މަންޒަރުތަކެއް އާންމުކޮށްފިއެވެ.
މިދިޔަ ހަފުތާގައި ޓެޑްރީގެ ޓީމުން ވަނީ ފިލްމުގެ ޓްރެއިލާގެ އިތުރުން ސައުންޑްޓްރެކް އަދި ޕޯސްޓަރު ވެސް އާންމުކޮށްފައެވެ. އެއާއެކު ފިލްމަށް އޮތް އިންތިޒާރު އާންމުންގެ ތެރޭގައި އިތުރުވެފައިވެއެވެ.
ދާދި ފަހުން އަނެއްކާ މިވަނީ މީގެ ކުރީން ފިލްމުން ފެނިފައިނުވާ ބައެއް މަންޒަރުތައް އާންމުކޮށްފައެވެ. މި މަންޒަރުތައް އާންމުކޮށްފައިވަނީ ފިލްމުގެ އައިއެމްޑީބީ ލިސްޓިން ގައެވެ. އައިއެމްޑީބީ އަކީ ދުނިޔޭގެ ބޮޑެތި ފިލްމުތަކުގެ މައުލޫމާތު އެއްތަނަކުން ލިސްޓު ކޮށްލެވޭ ޕްލެޓްފޯމެކެވެ.
ޓެޑްރީގެ ލަސްވިޔަސް އައިއެމްޑީބީ ލިސްޓިންގައި ފިލްމުގެ ބައެއް މައުލޫމާތުގެ އިތުރުން ބައެއް ސްޓިލްތައް ވަނީ ހިއްސާކޮށްފައެވެ. މި މަންޒަރުތަކުން ފިލްމުގެ ކެރެކްޓަރުން ކުޅޭނެ ރޯލުތަކަށް އިތުރަށް ވަނީ އަލި އަޅުވާލާފައެވެ.
ޓެޑްރީގެ ވާހަކައަކަށް ބިނާކޮށް ތައްޔާރުކޮށްފައިވާ ފިލްމު ލަސްވިޔަސްގެ ލީޑް ރޯލުން ފެންނާނީ މަޝްހޫރު އެކްޓަރު ނިއުމާ މުހައްމަދުގެ އަންހެން ދަރިފުޅު ޒޯޔާ ހަސަނެވެ. އޭގެ އިތުރުން، އަހުމަދު އީސާ (އާނަންދު)އާއި ވާޝިޔާ މުހައްމަދު އަދި މަރިޔަމް ޝިފާ ވެސް މި ފިލްމުން ފެންނާނެއެވެ.
ލަސްވިޔަސްގައި ވާޝިޔާ ފެނިގެންދާނީ ޔުސްރާ ކިޔާ ރޯލަކުންނެވެ. އަދި، އާނަންދު ފެންނާނީ އިޤްބާލް ކިޔާ މީހެއްގެ ރޯލުންނެވެ. ޑްރާމާ ޖޯންރާއަށް ގެނެސްދޭ މި ފިލްމުގައި ޒޯޔާ ފެނިގެންދާނީ ފެނިގެންދާނީ ހަމްރާގެ ރޯލުންނެވެ.
އަންނަ އޭޕްރިލް މަހުގެ 12 ގައި ފިލްމު ޕްރިމިއާ ކުރުމަށް ވަނީ ހަމަޖެހިފައެވެ. މިއީ ޓެޑްރީ 1994 ވަނަ އަހަރު ނެރުނު ފިލްމު "ދެރިޔާ" އަށް ފަހު ގެނެސްދޭ ފުރަތަމަ ފިލްމެވެ.