ރާއްޖެއަށް ދިމާވެފައި އޮތް ޑޮލަރުގެ މައްސަލަ އިންތިހާއަށް ގޯސްވެފައިވާ ކަމަށާއި އެ ކަމުގެ ސަބަބުން އިގުތިސާދަށް އިންތިހާއަށް ނުރައްކާތެރިވެފައިވާއިރު، އެކަން ހައްލުކުރަން އެކަށޭނެ ފިޔަވަޅުތަކެއް ނޭޅުނު މައްސަލައިގައި މަރުކަޒީ ބޭންކް (އެމްއެމްއޭ)ގެ ގަވަރުނަރު އަލީ ހާޝިމް އިސްތިއުފާ ދޭންޖެހޭ ކަމަށް, މޯލްޑިވިސް އެސޯސިއޭޝަން އޮފް ޓްރެވެލް އެޖެންޓްސް އެންޑް ޓުއާ އޮޕަރޭޓާސް (މަޓާޓޯ) އިން މިއަދު ގޮވާލައިފިއެވެ.
ދިވެހި ވިޔަފާރިވެރިންނަށް ޑޮލަރު ލިބުން ދަތިވެ، ބޭންކުތަކުގައި ވެސް ޑޮލަރުގެ ތާށިކަން ވަނީ ދިމާވެފައެވެ. އެ ކަމުގެ ކަންބޮޑުވުން ފާޅުކޮށް މަޓާޓޯއިން މިއަދު ނެރުނު ބަޔާނެއްގައި ބުނީ، ޑޮލަރުގެ މައްސަލަ އިންތިހާއަށް ބޮޑުވެ، އެކަމުގެ ސަބަބުން ރާއްޖޭގެ އިގުތިސާދީ ހަމަޖެހުމަށް އިންތިހާއަށް ނުރައްކާވެފައިވާ ކަމަށެވެ.
އެ އެސޯސިއޭޝަނުން ބުނީ، ޑޮލަރުގެ މައްސަލަ ބޮޑުވެ ދިވެހި ވިޔަފާރިތަކަށް ބޭރުގެ ޑިމާންޑަށް ކޭޓާނުކުރެވިދާނެ ކަމަށެވެ.
ބަޔާނުގައި ފާހަގަކޮށްފައިވާ ގޮތުގައި ޑޮލަރުގެ މައްސަލަ އިންތިހާއަށް ގޯސްވެފައިވަނީ ބޭންކުތަކުގައި ޑޮލަރު ލިބެން ނެތުމުންނެވެ. އެހެންވެ، ބޭންކުތަކުން ފައިސާ ދޫކުރުމުގައިި ދިވެހި ވިޔަފާރިތަކަށް އިސްކަން ދޭން ވަނީ ގޮވާލައިފައެވެ. މަޓާޓޯއިން ބުނީ ދިވެހި ވިޔަފާރިތަކަށް އިސްކަންދިނުމުގެ ބަދަލުގައި ބޭންކުން ލިބޭ ޑޮލަރު ފަންޑުތަކާއި ބޮންޑުތަކަށް ޚަރަދު ކުރުމުގެ ސަބަބުން ޑޮލަރުގެ މައްސަލަ އިތުރަށް ގޯސްވެފައިވާ ކަމަށެވެ.
"މިކަން ހައްލުކުރަން ސަރުކާރުން ކުއްލި ފިޔަވަޅުތަކެއް ކޮންމެހެން އަޅަންޖެހޭ. ދިގުމުއްދަތަކަށް އިގުތިސާދީ ހަމަޖެހުމާއި ނަފާވެރިކަން ހޯދަން ހަރުދަނާ ފިސްކަލް ޕޮލިސީއެއް ކޮންމެހެން ތަންފީޒުކުރަން ޖެހޭ،" ބަޔާނުގައި ވެއެވެ.
މަޓާޓޯއިން މީގެ ކުރިން ބޭއްވި ނޫސްވެރިންގެ ބައްދަލުވުމުގެ ތެރެއިން: އެ އެސޯސިއޭޝަނުން މިއަދު ވަނީ ގަވަރުނަރުގެ އިސްތިއުފާއަށް ގޮވާލައިފައި --
މަޓާޓޯއިން ބުނީ، މިދިޔަ ސަރުކާރުތަކުން ގެންގުޅުނު ޚަރަދު ކުރުމާއި ލޯން ނެގުމުގެ ސަގާފަތަކީ ދެމެހެއްޓެނިވި އުސޫލެއް ނޫން ކަމަށެވެ. އެ އެސޯސިއޭޝަނުން ވަނީ ޑޮލަރުގެ މައްސަލަ ހައްލުކުރަން ހަރުދަނާ އަދި ކުއްލި ފިޔަވަޅުތަކެއް އަޅަން ސަރުކާރަށް ގޮވާލައިފައެވެ.
އެގޮތުން، ދިވެހި ވިޔަފާރިތަކަށް ފައިސާ ދޫކުރުން ޕްރޮމޯޓުކޮށް ޑޮލަރުގެ ވަގު ވިޔަފާރި ހުއްޓުވަން ވަނީ ގޮވާލައިފައެވެ. އެކަން ނުކުރެވިއްޖެ ނަމަ، ޑޮލަރުގެ މައްސަލަ ހައްތަހައި ގޯސްވާނެ ކަމަށް އެ އެސޯސިއޭޝަންގެ ބަޔާނުގައި ވަނީ ބުނެފައެވެ.
"ރާއްޖޭގެ އިގުތިސާދީ ހާލަތު ރަނގަޅުކުރަން ހަރުދަނާ ރެގިއުލޭޓަރީ ބެލެހެއްޓުންތެރިކަމުގެ މުހިއްމުކަން ފާހަގަކުރަން. އެމްއެމްއޭގެ ގަވަރުނަރު އިސްތިއުފާ ދެއްވުމަށް މި އެސޯސިއޭޝަނުން ގޮވައިލަން،" ބަޔާނުގައި ވެއެވެ.
މަޓާޓޯއިން ބުނީ، ޑޮލަރުގެ މައްސަލަ ބޮއްސުންލައިގެން ދިޔައިރު އެކަން ހައްލުކުރަން އެމްއެމްއޭއިން އެކަށީގެންވާ ފިޔަވަޅުތަކެއް އަޅާފައިނުވާ ކަމަށެވެ.
ދުނިޔޭގެ ބޮޑު ދެ އިގުތިސާދު ކަމަށްވާ ޖަޕާނާއި އިނގިރޭސިވިލާތް ރިސެޝަނަކަށް ދިޔަކަން ފާހަގަކޮށް އެ އެސޯސިއޭޝަނުގެ ބަޔާނުގައި ބުނީ، ބޮޑެތި ގައުމުތަކުން ވެސް މާލީ ގޮންޖެހުންތަކާ ކުރިމަތިލާއިރު ދިވެހިރާއްޖެއިން ހަރުދަނާ ފިސްކަލް ސިޔާސަތުތަކެއް ތަންފީޒުކުރުން ކޮންމެހެން ބޭނުންތެރި ކަމަށެވެ.
މީގެ ކުރިން އިކޮނޮމިކް މިނިސްޓަރު މުހައްމަދު ސައީދު ވިދާޅުވީ، ޑޮލަރުގެ މައްސަލަ ދިމާވީ ސޮވަރިޖް ޑިވެލޮޕްމަންޓް ފަންޑަށް ކުރިން ޖަމާކުރަން ޖެހޭ ފައިސާތަކެއް ކުރީ ސަރުކާރުން ބޭނުންކޮށްފައި ހުރުމުން ކަމަށެވެ. އަދި، ދެތިން މަހެއްގެ ތެރޭގައި ޑޮލަރުގެ މައްސަލަ ހައްލުވާނެ ކަމަށް އޭނާ ވިދާޅުވިއެވެ.
ރައީސް ޑރ. މުހައްމަދު މުއިއްޒު ވެސް ވަނީ، ބިޔަ މަޝްރޫއުތައް ފެށުމާ އެކު ޑޮލަރުގެ މައްސަލަ ހައްލުވާނެކަމުގެ ޔަގީންކަން އަރުވައިފައެވެ.