ރާއްޖެއަށް ލަކުޑި އެތެރެކުރާ ޓިމްބާ ހައުސްގެ މާލޭ ވަޑާންގެއަކުން މިއަދު ހަރުފައެއް ފެނިއްޖެއެވެ.
މާފަންނުގައި ހުންނަ ވަޑާންގެއިން ހަރުފަ ފެނުނުކަން އެތަނުގައި މަސައްކަތް ކުރާ މީހަކު "ސަން"އަށް ވަނީ ކަށަވަރު ކޮށްދީފައެވެ.
އޭނާ ބުނިގޮތުގައި ހަރުފަ ފެނުނީ ވަޑާންގޭގައި ހުރި ފިލާތަކެއްގެ ތެރެއިން ކަމަށެވެ. އެއީ ބޮޑު ހަރުފައެއް ކަމަށާއި ހަރުފަ ފެނުމާއެކު ސިފައިންނަށް އެކަން ރިޕޯޓުކުރި ކަމަށް އޭނާ ބުންޏެވެ.
މިވަގުތު އެ ހަރުފަ ވީ ސިފައިންގެ ބެލުމުގެ ދަށުގައި ކަމަށާއި އެ ހަރުފައިގެ ސަބަބުން ވަޑާންގޭގައި މަސައްކަތް ކުރާ އެއްވެސް މީހަކަށް ގެއްލުމެއް ލިބިފައި ނުވާކަމަށް ވެސް އޭނާ ބުންޏެވެ.
ހަރުފަ ގޯންޏަކަށް ލާފައިވާ ވީޑިއޯތަކެއް ސޯޝަލް މީޑިއާގައި ވަނީ އާންމުވެފައެވެ. މިނޫހާ ވާހަކަ ދެއްކި މީހާ ބުނި ގޮތުގައި އެ ވީޑިއޯއަކީ ސިފައިން ހަރުފަ ހިފާ ގޯންޏަށް ލުމުން ނަގާފައިވާ ވީޑިއޯއެކެވެ.
މިކަމާ ގުޅިގެން އެމްއެންޑީއެފްގެ ބަހެއް އަދި ލިބިފައެއް ނުވެއެވެ.
ލަފާކުރެވޭ ގޮތުގައި ޓިމްބާ ހައުސްއިން ފެނުނީ "ޕައިތަން" ހަރުފައެކެވެ. ވަރަށް މަދުން ނަމަވެސް މި ގޮތަށް މީގެ ކުރިން ވެސް ލަކުޑި ގުދަންތަކުން ހަރުފަ ފެނިފައި އެބަހުއްޓެވެ.