އިންޓަނޭޝަނަލް ސްޕޭސް ސްޓޭޝަން (އައިއެސްއެސް)ގައި ގާތްގަނޑަކަށް ދޮޅު އަހަރެއްހާ ދުވަސް ހޭދަކުރުމަށްފަހު ރަޝިއާގެ ކޮސްމޮނޯޓެއް ޖައްވުގައި އެންމެ ގިނަ ވަގުތު ހޭދަކުރުމުގެ ރެކޯޑެއް ހަދައިފިއެވެ.
ރަޝިއާގެ ޖައްވީ އިދާރާ ރޮސްކޮސްމޮސްމޯސް އިން ބުނީ ޖައްވުގައި އެންމެ ގިނަ ވަގުތު ހޭދަކުރުމުގެ ދުނިޔޭގެ ރެކޯޑް ރަޝިއާގެ ކޮސްމޮނޯޓް އޮލެގް ކޮނޮނެންކޯ މުގުރާލައިފި ކަމަށެވެ.
އުމުރުން 59 އަހަރުގެ ކޮނޮނެންކޯ މިހާރު ޖައްވުގައި 878 ދުވަހާއި 12 ގަޑިއިރަށް ވުރެ ގިނަ އިރު ހޭދަކޮށްފައިވާއިރު، އޭނާ މުގުރާލާފައިވަނީ ހަމަ އެގައުމަށް ނިސްބަތްވާ ޖެނަޑީ ޕަޑަލްކާގެ ރެކޯޑެވެ. އޭނާ ރެކޯޑް ހެދީ 2015 ވަނަ އަހަރެވެ. އެއީ 878 ދުވަހާއި 11 ގަޑިއިރާއި 29 މިނެޓާއި 48 ސިކުންތު ޖައްވުގައި ހޭދަކޮށްގެންނެވެ.
އިންޓަނޭޝަނަލް ސްޕޭސް ސްޓޭޝަން (އައިއެސްއެސް)އަށް ކޮނޮނެންކޯ ވަނީ 2008 ވަނަ އަހަރު ފަސް ދަތުރެއް ކޮށްފައެވެ.
ރަޝިޔާގެ ދައުލަތުގެ ނިއުސް އެޖެންސީ ޓަސްއާ ވާހަކަ ދައްކަމުން އޭނާ ބުނީ ކޮސްމޮނޯޓެއްގެ ގޮތުގައި ދިރިއުޅުމަކީ ކުޑައިރުގެ ހުވަފެނެއް ހަގީގަތަކަށް ވުން ކަމަށެވެ.
"ޖައްވަށް ދަނީ އަހަރެން ލޯބިވާ ކަމެއް ކުރަން، ރެކޯޑްތަކެއް ހަދާކަށް ނޫން. ކުޑައިރުއްސުރެ ދެކެމުން އައި ހުވަފެންތަކާއި ކޮސްމޮނޯޓަކަށް ވުމުގެ އުއްމީދުގައި، އެ ޝައުގުވެރިކަން ހުރެގެން، ޖައްވަށް ދިޔުމުގެ ފުރުސަތު، އޯބިޓްގައި ދިރިއުޅެން އަދި މަސައްކަތް ކުރުމުގެ ފުރުސަތު ލިބުމުން ޖައްވުގައި އުޅުމަށް ހިތްވަރު ލިބޭ،" އޭނާ ބުންޏެވެ.
ދެހާސް ބާވީސް ވަނަ އަހަރުގެ ފެބްރުއަރީ މަހު ރަޝިއާއިން ޔޫކްރެއިންއަށް އަރައިގަތުމާ ގުޅިގެން އެމެރިކާ އާއި ރަޝިއާގެ ގުޅުން ގޯސްވި ނަމަވެސް އިންޓަނޭޝަނަލް ސްޕޭސް ސްޓޭޝަނަކީ ދެ ގައުމުގެ އެއްބާރުލުމާއެކު ހިންގާ ތަނެކެވެ.