މަޖިލިސް އިންތިޚާބަށް ވޯޓުލުމުގެ ހައްގު ލިބިފައިވާ މީހުންގެ ތެރެއިން ލޯފަން މީހުންނަށް އެހެން މީހެއްގެ އެހީތެރިކަމާނުލައި ވޯޓު ލުމުގެ އިންތިޒާމު ހަމަ ޖައްސަން، އެ މީހުން ރަޖިސްޓާވުމުގެ މުއްދަތު މި މަހުގެ 20 ވަނަ ދުވަހާ ހަމައަށް އިތުރު ކޮށްފިއެވެ.
ރައްޔިތުންގެ މަޖިލީހަށް މެންބަރުން ހޮވުމަށް ބާއްވާ އިންތިޚާބުގައި ލޯފަން މީހުންނަށް އެހެން މީހެއްގެ އެހީއާ ނުލައި ވޯޓުލެވޭނެ އިންތިޒާމު ހަމަޖެއްސުމަށް، އެ މީހުން ވޯޓުލުމަށް ރަޖިސްޓްރީ ވުމުގެ ފުރުސަތު އީސީން ހުޅުވާލީ މިދިޔަ މަހުގެ 21 ގައެވެ. އޭރު ރަޖިސްޓާ ވުމުގެ މުއްދަތު ދީފައިވަނީ މި މަހުގެ ހަތަރު ވަނަ ދުވަހުގެ ނިޔަލަށެވެ.
މިކަމާ ގުޅިގެން މިއަދު އިލެކްޝަންސް ކޮމިޝަނުގެ ނައިބު ރައީސް އިސްމާއީލް ހަބީބް އެކްސްގައި ކުރެއްވި ޕޯސްޓެއްގައި ވިދާޅުވީ، ފެނުމުގެ ނުކުޅެދުންތެރިކަން ހުންނަ މީހުންގެ ތެރެއިން ޓެމްޕްލޭޓް ބޭނުންކޮށްގެން ވޯޓުލުމަށް އެދޭ މީހުން މި މަހުގެ 20 ދުވަހުގެ ނިޔަލަށް ރަޖިސްޓާ ކުރެވޭނެ ކަމަށެވެ.
ހަބީބް ވިދާޅުވީ ޓެމްޕްލޭޓް ބޭނުންކޮށްގެން ވޯޓުލުމަށް އެދޭ މީހުންނަށް، ރާއްޖޭގެ ހުރިހާ ރަށެއްގައި، އެކަމަށް ބޭނުންވާ ތަމްރީން ދިނުމަށް ވެސް އިލެކްޝަންސް ކޮމިޝަނުން އަންނަނީ އިންތިޒާމް ކުރަމުން ކަމަށެވެ.
މި ތަމްރީނު އަތޮޅުތަކުގައި ދިނުމަށް ހަމަޖައްސާފައިވަނީ 26 ފެބުރުއަރީ އާއި، ހަ މާޗް އާ ދޭތެރޭގައި ކަމަށް ވެސް ހަބީބް ވަނީ ވިދާޅުވެފައެވެ.
މީގެ އިތުރަށް ހަބީބް ވިދާޅުވީ ރަޖިސްޓްރީ ކުރަން ބޭނުންވާ މީހުން 1414 އަށް ގުޅައިގެން ރަޖިސްޓާ ކުރެވޭނެ ކަމަށެވެ.
ލޯފަން މީހުންނަށް މިނިވަންކަމާ އެކު ވޯޓު ލެވޭނެ މަގު ފަހިކޮށްދިނުމަށް ތައާރަފު ކުރި ޓެމްޕްލޭޓް ބޭނުން ކޮށްގެން އެންމެ ފުރަތަމަ ވޯޓު ލައިފައިވަނީ ނިމިދިޔަ ރިޔާސީ އިންތިޚާބުގެ ފުރަތަމަ ބުރުގައެވެ.
ލޯފަން މީހުން އިންތިޚާބުތަކުގައި ލާ ވޯޓުގެ ސިއްރުކަން ކަށަވަރު ނުކުރެވޭތީ، އެ ކަމަށް ފަސޭހަ ހައްލަކާ އެކު ބްލައިންޑް އެސޯސިއޭޝަން އޮފް މޯލްޑިވްސްގެ ބައެއް މެންބަރުން ވަނީ މަޖިލީހުގެ ހިއުމަން ރައިޓްސް ކޮމިޓީއާއި މިނިވަން މުއައްސަސާތަކުގެ ކޮމިޓީއާ ވެސް މީގެ ކުރިން ބައްދަލު ކޮށްފައެވެ.
ރާއްޖޭގައި ލޯފަން މީހުން މިނިވަންކަމާ އެކު އަލަށް ވޯޓު ލީއިރު، ލޯފަން މީހުން ވޯޓުލުމަށް ޓެމްޕްލޭޓެއް ބޭނުންކުރުމަކީ ބޭރު ގައުމުތަކުގައި ވެސް އަމަލު ކުރާ އުސޫލެކެވެ.