ނެމީބިއާގެ ރައީސް ހާގޭ ގެންގޮބް އަވަހާރަވުމާ ގުޅިގެން އެކަމުގެ ހިތާމައިގައި، ދިވެހި ދިދަ ބައިދަނޑިއަށް ތިރިކުރަން ރައީސް ޑރ. މުޙައްމަދު މުއިއްޒު މިއަދު ނިންމަވައިފިއެވެ.
ރައީސް އޮފީހުން ނެރުނު ބަޔާނެއްގައިވަނީ، ރައީސް ނިންމަވާފައި ވަނީ މާދަމާގެ އިތުރުން ބުދަ ދުވަހު ދިދަ ބައިދަނޑިއަށް ތިރިކުރުމަށް ކަމަށެވެ.
އުމުރުން 82 އަހަރުގައި ރައީސް ގެންގޮބް އަވަހާރަވީ ކެންސަރަށް ފަރުވާ ހޯއްދަވަމުން ދަނިކޮށް އިއްޔެއެވެ.
ގެންގޮބް އަވަހާރަވުމާ ގުޅިގެން އެގައުމުގެ ވަގުތީ ރައީސް ނޭންގަލޯ އެމްބުމްބާއަށް ރައީސް މުއިއްޒު ވަނީ ތައުޒިޔާގެ މެސެޖެއް ފޮނުއްވައިފިއެވެ.
ރައީސްގެ މެސެޖުގައި، ނެމީބިއާގެ ރައީސް އަވަހާރަވި ޚަބަރު އަޑުއެއްސެވީ ފުން ހިތާމައާ އެކުގައި ކަމަށް ވިދާޅުވެފައިވެއެވެ. އަދި މި ހިތާމަވެރި ދަނޑިވަޅުގައި ދިވެހި ސަރުކާރާއި ރައްޔިތުންނާއި ރައީސްގެ އަމިއްލަ ނަންފުޅުގައި، ނެމީބިއާގެ ސަރުކާރާއި ރައްޔިތުންނާއި ގެންގޮބްގެ އާއިލާއަށް އެ މަނިކުފާނު ތައުޒިޔާ ވިދާޅުވިއެވެ.
މީގެ އިތުރުން ރައީސްގެ މެސެޖުގައިވަނީ، ނެމީބިއާގެ ރައީސްއަކީ އެ ގައުމުގައި ޑިމޮކްރަސީގެ އުސޫލުތައް ކުރިއެރުވުމަށާއި، އެ ގައުމުގެ ހިންގުން ހަރުދަނާކުރެއްވުމަށާއި، އެ ހައުމުގެ އިގުތިސާދީ ތަރައްގީއަށް ނުހަނު މަސައްކަތް ކޮށްދެއްވި ބޭފުޅެއް ކަމަށް ވިދާޅުވެފައެވެ. އަދި ނެމީބިއާގެ ރައީސްގެ އެ ޚިދުމަތްތަކަކީ އެ ގައުމުގެ އަންނަން އޮތް ޖީލުތަކާ ހަމައަށްވެސް ދެމިގެންދާނެ ޚިދުމަތްތަކެއް ކަމަށް ރައީސް ވިދާޅުވި ކަމަށް ރައީސް އޮފީހުން ބުންޏެވެ.
ރާއްޖެއާއި ނެމީބިއާއާ ދެމެދު ސިޔާސީ ގުޅުން ގާއިމު ކޮށްފައިވަނީ ޖުލައި 26، 1990 ގައެވެ.