އެފްރިކާއިން މި އަހަރުގެ މިހާތަނަށް ގާތްގަނޑަކަށް 30،000 މީހުން މަކުނުވިދުރިއަށް ޝައްކުކުރެވިފައިވާ ކަމަށް ދުނިޔޭގެ ސިއްޚަތު ޖަމުއިއްޔާ، (ޑަބްލިޔުއެޗްއޯ)އިން ބުނެފިއެވެ. އޭގެ ތެރެއިން ގިނަ މީހުން ތިބީ ކޮންގޯގައެވެ.
އެ ބަލީގައި އެފްރިކާއިން މި އަހަރުގެ މިހާތަނަށް 800 މީހުން މަރުވެފައިވާ ކަމަށް ވެސް ޑަބްލިޔުއެޗްއޯއިން ނެރުނު ރިޕޯޓުގައި ބުނެފައިވެއެވެ.
ކޮންގޯގެ މެދުތެރޭ އެފްރިކާގެ އަވައްޓެރި ބުރޫންޑީގައި ވެސް އެ ބަލި މިހާރު އަންނަނީ ފެތުރެމުން ކަމަށް އެ ގައުމުން ބުނެއެވެ.
މި އަހަރުގެ ޖެނުއަރީން ސެޕްޓެމްބަރު މަހުގެ 15 ވަނަ ދުވަހުގެ ނިޔަލަށް މުޅި އެފްރިކާގައި މަކުނުވިދުރިއަށް ޝައްކު ކުރެވޭ 29،342 މީހުން ތިބި ކަމަށާއި 812 މީހުން މަރުވެފައިވާ ކަމަށް ޑަބްލިއުއެޗްއޯގެ ރިޕޯޓުގައިވެއެވެ.
ޑަބްލިޔުއެޗްއޯގެ ރިޕޯޓުގައި ކުރީ އަހަރުތަކުގެ ކޭސްތަކާއި އަޅައިކިޔާފައިނުވި ނަމަވެސް، އެފްރިކަން ޔޫނިއަންގެ ޕަބްލިކް ހެލްތު އެޖެންސީން ބުނެފައިވާ ގޮތުގައި 2023 ވަނަ އަހަރު ބަލި ފެތުރިފައިވާ ހަތް ސްޓޭޓަކުން 14،957 މީހުންނަށް ބަލި ޖެހިފައިވާއިރު، 739 މީހުން މަރުވެފައިވެއެވެ. މިއީ 2022 ވަނަ އަހަރަށްވުރެ 78.5 އިންސައްތަ އިތުރު އަދަދެކެވެ.
މުޅި ދުނިޔޭގައި އޮގަސްޓް މަހު އެކަނި ވެސް ބަލިޖެހިފައިވާކަން ކަށަވަރުކުރެވޭ 2،082 ތިބިއިރު، މިއީ 2022 ވަނަ އަހަރުގެ ނޮވެމްބަރުގެ ފަހުން މިހާތަނަށް އެންމެ ގިނަ ކޭސް ފެނުނު ފަހަރު ކަމަށް ޑަބްލިޔުއެޗްއޯއިން ބުނެއެވެ.
ހޮނިހިރު ދުވަހު ވޯލްޑް ބޭންކުގެ ޕެންޑެމިކް ފަންޑުން ވަނީ މަކުނުވިދުރިއާ ދެކޮޅަށް މަސައްކަތް ކުރުމަށް އެފްރިކާގެ ދިހަ ގައުމަކަށް 128.89 މިލިއަން ޑޮލަރު ދޭނެ ކަމަށް ބުނެފައެވެ.
މަކުނުވިދުރީގެ ވައިރަސް އިންސާނުންނަށް ވާސިލު ވަނީ ބަލި ޖެހިފައިވާ ޖަނަވާރެއްގެ ފަރާތުންނެވެ. އިންސާނެއްގެ ހަށިގަނޑަށް މި ވައިރަސް ވަދެއްޖެނަމަ އެ ވައިރަސް ހުންނަ މީހެއްގެ ފަރާތުން އެހެން މީހުންނަށް ވެސް މި ވައިރަސް އަރައެވެ.