ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ފުރަތަމަ ޖަލްސާގައި ރައީސް ޑރ. މުޙައްމަދު މުއިއްޒު ދެއްވާ ރިޔާސީ ބަޔާނަކީ އެންމެ ޝާމިލް، އެންމެ ވިޝަނަރީ ރިޔާސީ ބަޔާނަށް ވާނެ ކަމަށް ސަރުކާރުން މިއަދު ބުނެފިއެވެ.
ސަރުކާރުގެ ފަރާތުން، ރައީސް އޮފީހުގެ ކޮމިއުނިކޭޝަންސް މިނިސްޓަރު އިބްރާހިމް ޚަލީލް މިއަދު 'ސަން'އަށް ވިދާޅުވީ، ރައީސް މާދަމާ ދެއްވާ ރިޔާސީ ބަޔާނުގައި ދިވެހި ރައްޔިތުންނަށާއި ދިވެހި ގައުމަށް ވަރަށް އުންމީދީ، ވަރަށް މުހިންމު ކަންތައްތަކެއް ހާމަކުރައްވާނެ ކަމަށެވެ.
އެ ރިޔާސީ ބަޔާނުގައި ރައީސް ހާމަކުރައްވާނީ، ރާއްޖޭގެ ބަރުލަމާނީ ހަޔާތުގައި ދިވެހި ގައުމުގެ އެންމެ މަތީ ވެރިއަކު ރައްޔިތުންގެ މަޖިލީހުގައި މިހާތަނަށް ހުށަހަޅުއްވަވާ އެންމެ ޝާމިލް، އެންމެ ވިޝަނަރީ ގައުމީ ތަސައްވުރުތައް ކަމަށް ވެސް ޚަލީލް ވިދާޅުވިއެވެ.
މަޖިލީހުގެ ދައުރު ފަށާއިރު ރައީސް ރިޔާސީ ބަޔާން އިއްވަވަން ވާނެ ކަމަށް ގާނޫނުއަސާސީގެ 84 ވަނަ މާއްދާގައި ބަޔާންކޮށްފައިވާއިރު، މާދަމާ ރައީސް މުއިއްޒު އިއްވަވަނީ އެ މަނިކުފާނުގެ ފުރަތަމަ ރިޔާސީ ބަޔާނެވެ.
މިއަދު ރައީސް ވަނީ މަޖިލިސް ކުރާގެއަށް ޒިޔާރަތް ކުރައްވައި، މާދަމާގެ ޖަލްސާއަށް ވަމުން އަންނަ ތައްޔާރީތައް ބައްލަވައިލައްވައިފައެވެ.
މިދިޔަ ނޮވެމްބަރު މަހުގެ 17ގައި ވެރިކަމުގެ ހުވާކުރެއްވި ރައީސް، އެ މަނިކުފާނުގެ ކެބިނެޓަށް 22 ވަޒީރުން އައްޔަން ކުރެއްވި ނަމަވެސް، އިދިކޮޅު އެމްޑީޕީގެ އަޣުލަބިއްޔަތު އޮންނަ މަޖިލީހުގެ މިދިޔަ ދައުރު ނިންމާލީ ވަޒީރުންނަށް ރުހުން ނުދީއެވެ.
އެއަށް ފަހު މިދިޔަ މަހުގެ ތެރޭގައި ދައުރުން ބޭރުން ބޭއްވި ޖަލްސާއެއްގައި ވޯޓަށް އެހުމުން 19 ވަޒީރުންނަށް ރުހުން ދިން ނަމަވެސް، ތިން ވަޒީރަކަށް ރުހުންނުދެއެވެ. އެއީ ބަންޑާރަނައިބު އަހުމަދު އުޝާމާއި އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދާއި ބޯހިޔާވަހިކަމާ ބެހޭ ވަޒީރު ޑރ. އަލީ ހައިދަރަށެވެ. ނަމަވެސް، ރައީސް ވަނީ އެ ތިން ބޭފުޅުން އަލުން އެ މަގާމުތަކަށް އައްޔަންކުރައްވައިފައެވެ.