ޔަމަނުގައި ހަރަކާތްތެރިވާ ހަތިޔާރު އެޅި ޖަމާއަތް، ހޫޘީންގެ ޑްރޯންތަކަކަށް ހަމަލާދީފައިވާ ކަމަށް އެމެރިކާގެ އަސްކަރިއްޔާއިން ބުނެފިއެވެ.
ރަތް ކަނޑުން އިސްރާއީލުގެ ރަށްތަކަށް ދަތުރުކުރާ އާގު ބޯޓުތަކަށް ޙޫޘީންގެ ހަމަލާތައް އަމާޒުވަމުން ދާތީ، އެކަމާ ދެކޮޅަށް އެމެރިކާ އިސްވެއޮވެ، މިދިޔަ ޖެނުއަރީ މަހު ވަނީ ހަމަލާތަކެއް ދީފައެވެ. އެގޮތުން އެމެރިކާއާއި އިނގިރޭސިވިލާތުން ވަނީ ރަތް ކަނޑަށް އަސްކަރީ މަނަވަރު ފޮނުވައި، ދެ ގައުމުގެ އަސްކަރިއްޔާ ގުޅިގެން ޔަމަނަށް ބޮން އަޅަން ފަށައިފައެވެ.
ޙޫޘީންގެ ޑްރޯންތަކަށް އެމެރިކާއިން ދިން ހަމަލާތަކާ ގުޅިގެން އެމެރިކާގެ އޮފިޝަލަކު ހާމަކޮށްފައިވާ ގޮތުގައި، ރަތް ކަނޑުގައި ދަތުރުކުރާ އާގުބޯޓުތަކަށް ހަމަލާ ދިނުމަށް ޙޫޘީން ތައްޔާރު ކޮށްފައިވާ 10 ޑްރޯނަށްވަނީ ހަމަލާދީ ހަލާކު ކޮށްލާފައެވެ.
ރަތް ކަނޑުން އިސްރާއީލުގެ ރަށްތަކަށް ދަތުރުކުރާ ބޯޓުތަކަށް ޙޫޘީން ހަމަލާދެނީ އިސްރާއީލުން ފަލަސްތީނުގެ ޣައްޒާގައި ހިންގަމުންދާ ލާއިންސާނީ އަމަލުތަކާ ގުޅިގެން ފަލަސްތީނަށް ތާއީދުކުރުމުގެ ގޮތުންނެވެ.
ޙޫޘީންގެ 10 ޑްރޯނަށް ހަމަލާދިނުމުގެ އިތުރުން، ޚަލީޖް ޢަދުންއިން ޙޫޘީން ފޮނުވައިލި އެންޓި ޝިޕް ބެލިސްޓިކް މިސައިލެއް ވައްޓައިލައި އީރާނުގެ ތިން ޑްރޯން ވައްޓައިލައިފައިވާ ކަމަށްވެސް އެމެރިކާއިން މީގެކުރިން ވަނީ ބުނެފައެވެ. އެ ހަމަލާތައް ދީފައި ވަނީ އެމެރިކާގެ ހަނގުރާމަ މަތީ މަނަވަރު، ޔޫއެސްއެސް ކާނޭއިން ކަމުގައިވެސް އެމެރިކާއިން ބުނެއެވެ.
ޙޫޘީންނާ ދެކޮޅަށް އެމެރިކާއިން ހަމަލާތައް ދިން ނަމަވެސް ރަތް ކަނޑުން އިސްރާއީލުގެ ރަށްތަކަށް ދަތުރުކުރާ ބޯޓުތަކަށް ޙޫޘީން ދޭ ހަމަލާތަކަށް ހުއްޓުމެއް ނާދެއެވެ.