އެމެރިކާގެ ރައީސް ޑޮނަލްޑް ޓްރަމްޕްގެ ޓީމުން ވިސްނަމުންދަނީ ޣައްޒާގެ ދެ މިލިއަން މީހުންގެ ތެރެއިން ބައެއް މީހުން ޣައްޒާއިން ބޭރަށް ގެންދިއުމަށް ކަމަށް އެމެރިކާގެ އެންބީސީ ނެޓްވޯކުން ރިޕޯޓުކޮށްފިއެވެ.
ނަން ނުޖެހުމަށް ޝަރުތުކޮށް އެ ނެޓްވޯކުގެ އޮފިޝަލަކު ވިދާޅުވީ ފަލަސްތީނުގެ ބައެއް ރެފިއުޖީން ގެންދަން ހަމަޖެހިފައިވާ އެއް ގައުމަކީ އިންޑޮނޭޝިއާއެވެ.
އެންބީސީން ރިޕޯޓްކޮށްފައިވާ ގޮތުގައި ހަމާސް އާއި އިސްރާއީލާ ދެމެދު ވެފައިވާ ހަނގުރާމަ ހުއްޓާލުމުގެ އެއްބަސްވުން ދެމެހެއްޓުމަށް ކުރާ މަސައްކަތުގެ ތެރެއިން އެމެރިކާއިން މެދުއިރުމައްޗަށް ކަނޑައަޅާފައި ހުންނަ ސަފީރު ސްޓީވް ވިޓްކޮފް ޣައްޒާއަށް ޒިޔާރަތް ކުރުމަށް ވެސް ވަނީ ހަމަޖެހިފައެވެ.
މަސްދަރު ބުނާ ގޮތުގައި ވިޓްކޮފް މަސައްކަތް ކުރައްވަނީ އިސްރާއީލަށާއި، ގެދޮރު ގެއްލިފައިވާ ދެ މިލިއަން ފަލަސްތީނުގެ މީހުންނަށް ދިގު މުއްދަތުގެ ހަމަޖެހުމެއް ހޯދައިދިނުމަށެވެ.
"ޣައްޒާ މީހުންނަށް އެހީތެރިވެ ނުދީފިނަމަ، އެ މީހުންގެ ދިރިއުޅުން ރަނގަޅު ނުކޮށްފިނަމަ، އެ މީހުންނަށް އުންމީދު ނުދީފިނަމަ ހަމަނުޖެހުން ހިނގާނެ،" އޮފިޝަލް ވިދާޅުވިއެވެ.
މި މަހުގެ 11ވަނަ ދުވަހު އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫއާ ވިޓްކޮފް ވަނީ ބައްދަލުކުރައްވާފައެވެ.
އެ ބައްދަލުވުމުގައި ހަނގުރާމަ ހުއްޓާލުމުގެ އެއްބަސްވުމަށް އަމަލުކުރުމަށް ވިކްޓޮފް އެދިވަޑައިގެން ކަމަށާއި، ޓްރަމްޕްގެ ވެރިކަމުގެ ފުރަތަމަ ދައުރު އިސްރާއީލަށް ކޮށްދެއްވި ކަންތައްތަކުގެ މައްޗަށް އަލިއަޅުއްވާލެއްވި ކަމަށް ވެސް އެންބީސީ ރިޕޯޓުކޮށްފައިވެއެވެ.
އެމެރިކާއާއި، ޤަތަރު އަދި މިސްރު މެދުވެރިވެގެން އިސްރާއީލުން ޣައްޒާގައި ކުރަމުންދިޔަ ހަނގުރާމަ ހުއްޓާލުމަށް ހުށަހަޅާފައިވާ އެއްބަސްވުމުގެ ދަށުން ހަނގުރާމަ ހުއްޓާލާފައި ވަނީ މި މަހުގެ 19 ވަނަ ދުވަހެވެ.