ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ވޯޓު ދިނުމުގެ ހައްގު ލިބިފައިވާ މީހުންގެ ރަޖިސްޓަރީއަށް ހުށަހެޅުނު ޝަކުވާތަކާ ގުޅިގެން ގެނައި ބަދަލުތަކަށް ޝަކުވާ ހުށަހެޅުމުގެ ފުރުސަތު އިލެކްޝަންސް ކޮމިޝަން (އީސީ)އިން މިއަދު ހުޅުވާލައިފިއެވެ.
އީސީގެ ނައިބު ރައީސް އިސްމާއިލް ހަބީބް މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ރައްޔިތުންގެ މަޖިލީހުގެ އިންތިޚާބުގައި ވޯޓު ދިނުމުގެ ހައްގު ލިބިފައިވާ މީހުންގެ ރަޖިސްޓަރީއަށް ހުށަހެޅުނު ޝަކުވާތަކާ ގުޅިގެން ގެނައި ބަދަލުތައް އީސީން އާއްމުކޮށްފައި ވާކަމަށެވެ.
އެ ކޮމިޝަނުން ބުނީ، އެ ރަޖިސްޓަރީ ގެޒެޓާއި ކޮމިޝަނުގެ ވެބްސައިޓާއި މާލެ ފިޔަވައި މީހުން ދިރިއުޅޭ ކޮންމެ ރަށެއްގެ ރަށު ކައުންސިލް އިދާރާއާއި ކުޅުދުއްފުށި ސިޓީގެ ކައުންސިލް އިދާރާއާއި އައްޑޫ ސިޓީ އަދި ފުވައްމުލަކު ސިޓީގެ އަވަށްތަކުގެ އޮފީސްތަކުން ޢާންމުކޮށް ފެންނަން ހުންނާނެކަމަށެވެ.
އީސީން ގެޒެޓުކުރި އިއުލާނެއްގައިވާ ގޮތުން، މި ލިސްޓަށް ޝަކުވާ ހުށަހަޅާނީ މިއަދުން ފެށިގެން އަންނަ މަހުގެ 10ގެ ނިޔަލަށް، ރަސްމީ ބަންދު ނޫން ކޮންމެ ދުވަހަކު ހެނދުނު 08:30 އިން މެންދުރުފަހު 03:00އަށެވެ. އަދި، ރަސްމީ ބަންދު ދުވަސްތަކުގައި ހެނދުނު 09:00އިން މެންދުރުފަހު 03:00އަށް ކަމަށާއި، ހުކުރު ދުވަހު މެންދުރުފަހު 03:00އިން ހަވީރު 05:00އަށް ކަަމަށް ޝަކުވާ ހުށަހެޅޭނެ ކަމަށް ވެސް އެ ކޮމިޝަނުން ބުންޏެވެ.
ޝަކުވާ ބަލައިގަތުމަށް ހަމަޖެހިފައިވަނީ، މާލެ ފިޔަވައި މީހުން ދިރިއުޅޭ ހުރިހާ ރަށަކުން އެރަށެއްގެ ކައުންސިލް އިދާރާއިންނާއި، އައްޑޫ ސިޓީ، ފުވައްމުލަކު ސިޓީ އަދި ކުޅުދުއްފުށި ސިޓީގެ ކައުންސިލް އިދާރާއިން އަދި ކޮމިޝަނުގެ އީމެއިލް އެޑްރެސް ކަމަށްވާ، [email protected] އަށް ފޮނުވައިގެން ކަމަށް އެ ކޮމިޝަނުން މައުލޫމާތު ދިނެވެ.
އަދި، ކޮމިޝަންގެ ވެބްސައިޓުންނާއި މާލޭގައިނަމަ އިންތިޚާބާ ބެހޭ މަރުކަޒު (ދަރުބާރުގެ)އިން ޝަކުވާ ފޯމު ލިބޭނެ ކަމަށާއި ކައުންސިލް އިދާރާތަކުން ވެސް އެ ފޯމް ލިބެން ހުންނާނެ ކަމަށް އިއުލާނުގައިވެއެވެ.
ވޯޓު ދިނުމުގެ ހައްގު ލިބިފައިވާ މީހުންގެ ލިސްޓަށް، ޖުމުލަ 746 ޝަކުވާ ލިބިފައިވާ ކަމަށް އީސީން ވަނީ މީގެ ކުރިން ބުނެފައެވެ.
ވޯޓާސް ލިސްޓަށް ލިބުނު ޝަކުވާތަކުގެ ތަފުސީލު ދެއްވަމުން އީސީގެ ނައިބު ރައީސް އިސްމާއިލް ހަބީބް "ސަން"އަށް ވިދާޅުވީ، އެންމެ ގިނަ ޝަކުވާ ލިބިފައިވަނީ ވޯޓުލުމުގެ ހައްގު ލިބިގެންވާ މީހުންގެ އެޑްރެސް ބަދަލުވެގެން ކަމަށެވެ. އެއީ، ޖުމުލަ 450 ޝަކުވާއެވެ.
މިހާރު ކުރިއަށް ދާ، 19 ވަނަ މަޖިލީހުގެ މެންބަރުންގެ ދައުރު ހަމަވާނީ އަންނަ މެއި މަހުގެ 28ގައެވެ. މަޖިލިސް އިންތިޚާބު ބާއްވަން ހަމަޖެހިފައިވަނީ މާޗު 17ގައެވެ.
އެ އިންތިޚާބުގައި ވާދަކުރުމަށް ކުރިމަތިލުމުގެ ފުރުސަތު މިއަދު ވަނީ ހުޅުވާލާފައެވެ.