މިދިޔަ ނޮވެމްބަރު މަހުގެ 17 ވަނަ ދުވަހު އުފެދުނު، ރައީސް ޑރ. މުހައްމަދު މުއިއްޒުގެ ސަރުކާރަށް މިހާތަނަށް 91 ސްޓޭޓު މިނިސްޓަރުންނާއި 163 ޑެޕިއުޓީ މިނިސްޓަރުން އައްޔަނުކޮށްފިއެވެ.
ކެމްޕޭން ތެރޭގައި ރައީސް ވެލެއްވި އެއް ވައުދުފުޅަކީ މަތިބަރު ނޫން ސަރުކާރެއް އެކުލަވައިލެއްވުމެވެ.
ރައީސް އޮފީހުގެ ވެބްސައިޓުން ފެންނަން ހުރި މައުލޫމާތަށް ބަލާއިރު، މި ސަރުކާރުގައި ސީނިއާ މިނިސްޓަރު ފެންވަރުގައި އެއް ބޭފުޅަކު އެބަ ހުންނެވިއެވެ. އެއީ، ޕީއެންސީގެ ޗެއާޕާސަން އަދި ރައީސްގެ ހާއްސަ މުޝީރު އަބްދުއްރަހީމް އަބްދުﷲއެވެ.
ރައީސް އެކުލަވައިލެއްވި 22 ވުޒާރާ ހިމެނޭ ވަޒީރުންގެ މަޖިލީހުގައި ހިމެނިވަޑައިގަންނަވާ ކެބިނެޓު މިނިސްޓަރުންގެ އިތުރުން ވެސް 20 ބޭފުޅުން މިނިސްޓަރުންގެ ފެންވަރުގައި އައްޔަންކޮށްފައި އެބަތިއްބެވެ. އޭގެ ތެރެއިން ގިނަ ބޭބޭފުޅުންނަކީ ރައީސް އޮފީހަށް އައްޔަންކޮށްފައި ތިއްބެވި މިނިސްޓަރުންނެވެ. އަދި، ފިނޭންސް މިނިސްޓްރީއަށް ވެސް، މިނިސްޓަރުގެ އިތުރުން އިތުރު ދެ ބޭފުޅަކު ވަނީ މިނިސްޓަރު ފެންވަރުގައި އައްޔަންކޮށްފައެވެ.
އާ ސަރުކާރުގެ ވަޒީރުންގެ މަޖިލީސް ހުވާ ކުރައްވަނީ: މި ސަރުކާރުގައި ވަޒީރުންގެ އިތުރުން ވަޒީރު ފެންވަރުގައި 20 ބޭފުޅުން ތިއްބަވާ -- ފޮޓޯ/ ރައީސް އޮފީސް
މިއަދާ ހަމައަށް މި ސަރުކާރުގައި 91 ސްޓޭޓު މިނިސްޓަރުން އައްޔަންކޮށްފައި ތިބިއިރު 163 ޑެޕިއުޓީ މިނިސްޓަރުން އެބަތިއްބެވެ.
ސްޓޭޓު މިނިސްޓަރުން އެންމެ ގިނައީ ލޯކަލް ގަވާނަންސް މިނިސްޓަރީގައެވެ. އެ މިނިސްޓްރީއަށް އަށް ސްޓޭޓު މިނިސްޓަރުން އައްޔަންކޮށްފައިވެއެވެ. ދެވަނައަށް އެންމެ ގިނައީ ޖެންޑާ މިނިސްޓްރީއާއި ފޮރިން މިނިސްޓްރީއާއި ރައީސް އޮފީހުގައެވެ. އެއިން ކޮންމެ ތަނަކަށް ވެސް ހަ ސްޓޭޓު މިނިސްޓަރުން އައްޔަންކޮށްފައި އެބަތިއްބެވެ.
ސްޓޭޓު މިނިސްޓަރުންގެ އަދަދުތައް:
- ރައީސް އޮފީސް - 6
- ޑިފެންސް މިނިސްޓްރީ - 1
- ފޮރިން މިނިސްޓްރީ - 6
- ހޯމް މިނިސްޓްރީ - 3
- ފިނޭންސް މިނިސްޓްރީ - 4
- އެޑިއުކޭޝަން މިނިސްޓްރީ - 5
- ހެލްތު މިނިސްޓްރީ - 4
- އިކޮނަމިކް މިނިސްޓްރީ - 4
- ފިޝަރީޒް މިނިސްޓްރީ - 2
- އިސްލާމިކް މިނިސްޓްރީ - 2
- ޓޫރިޒަމް މިނިސްޓްރީ - 2
- ޖެންޑާ މިނިސްޓްރީ - 6
- ސްޕޯޓްސް މިނިސްޓްރި - 3
- އެންވަޔަރަމަންޓު މިނިސްޓްރީ - 5
- ހައުސިން މިނިސްޓްރީ - 4
- ޓްރާންސްޕޯޓު މިނިސްޓްރީ - 2
- ދިވެހިބަހާއި ސަގާފަތާ ބެހޭ މިނިސްޓްރީ - 3
- ހަޔާ އެޑިއުކޭޝަން މިނިސްޓްރީ - 5
- ކޮންސްޓްރަކްޝަން މިނިސްޓްރީ - 4
- އެގްރިކަލްޗާ މިނިސްޓްރީ - 2
- ޔޫތު މިނިސްޓްރީ - 2
- ލޯކަލް ގަވާނަންސް މިނިސްޓްރީ - 8
- ސްޓޭޓު މިނިސްޓަރު ފެންވަރުގައި - 8
މުސާރައާއި އެލަވަންސާ އެކު އެ ބޭފުޅުންނަށް މަހެއްގެ މައްޗަށް 47،000 ރުފިޔާ ލިބިވަޑައިގަންނަވާނެއެވެ. މި ސަރުކާރުގައި މިހާތަނަށް 91 ސްޓޭޓު މިނިސްޓަރުން ތިބީއިރު އެ ބޭފުޅުންގެ މުސާރައަށް މަހެއްގެ މައްޗަށް 4.2 މިލިއަނެއްހާ ރުފިޔާ ޚަރަދުވާނެއެވެ.
ވަޒީރުންގެ މަޖިލީހުގެ ބައްދަލުވުމެއްގެ ތެރެއިން -- ފޮޓޯ/ ރައީސް އޮފީސް
ނައިބު ވަޒީރުންގެ އަދަދުތައް:
- ރައީސް އޮފީސް - 9
- ޑިފެންސް މިނިސްޓްރީ - 2
- ފޮރިން މިނިސްޓްރީ - 4
- ހޯމް މިނިސްޓްރީ - 15
- ފިނޭންސް މިނިސްޓްރީ - 6
- އެޑިއުކޭޝަން މިނިސްޓްރީ - 6
- ހެލްތު މިނިސްޓްރީ - 4
- އިކޮނަމިކް މިނިސްޓްރީ - 6
- ފިޝަރިޒް މިނިސްޓްރީ - 7
- އިސްލާމިކް މިނިސްޓްރީ - 8
- ޓޫރިޒަމް މިނިސްޓްރީ - 10
- ޖެންޑާ މިނިސްޓްރީ - 8
- ސްޕޯޓްސް މިނިސްޓްރީ - 12
- އެންވަޔަރަމަންޓު މިނިސްޓްރީ - 8
- ހައުސިން މިނިސްޓްރީ - 5
- ޓްރާންސްޕޯޓު މިނިސްޓްރީ - 10
- ދިވެހި ބަހާއި ސަގާފަތާ ބެހޭ މިނިސްޓްރީ - 7
- ހަޔާ އެޑިއުކޭޝަން މިނިސްޓްރީ - 6
- ކޮންސްޓްރަކްޝަން މިނިސްޓްރީ - 5
- އެގްރިކަލްޗަރު މިނިސްޓްރީ - 3
- ޔޫތު މިނިސްޓްރީ - 9
- ލޯކަލް ގަވަރުނަންސް މިނިސްޓްރީ - 13
ޑެޕިއުޓީ މިނިސްޓަރު ފެންވަރުގައި ޖުމުލަ 163 ބޭފުޅުން މިހާތަނަށް އައްޔަންކުރައްވާފައިވާއިރު، އެންމެ ގިނަ ޑެޕިއުޓީ މިނިސްޓަރުން ތިއްބަވަނީ ހޯމް މިނިސްޓްރީގައެވެ.
މުސާރައާއި އެލަވަންސާ އެކު ޑެޕިއުޓީ މިނިސްޓަރަކަށް މަހަކު، 35,500 ރުފިޔާ ލިބިލައްވައެވެ. އައްޔަންކޮށްފައި ތިބި 163 މިނިސްޓަރުންނަށް އެހެންވެ މަހެއްގެ މައްޗަށް 5.7 މިލިއަން ރުފިޔާ ޚަރަދުވާނެއެވެ. އެއީ، ޖުމުލަ ސްޓޭޓު މިނިސްޓަރުންނާއި ޑެޕިއުޓީ މިނިސްޓަރުންގެ މުސާރައަށް މަހަކު 10 މިލިއަން ރުފިޔާއެވެ.
ޕީއެންސީގެ ޖަލްސާއެއްގައި، ޕީޕީއެމް ޕީއެންސީގެ އިސްވެރިން -- ފޮޓޯ/ އެލީޒް
ސަރުކާރުގައި ކެބިނެޓު މިނިސްޓަރުންގެ އިތުރުން އައްޔަންކުރައްވާފައިވާ މިނިސްޓަރު ފެންވަރުގެ 20 ބޭފުޅުންނާ އެކު އެ އަދަދު އިތުރަށް ބޮޑުވާނެއެވެ.
ފާހަގަކޮށްލެވޭ ގޮތުގައި ކުރީ ސަރުކާރުގައި އެ އަދަދުތައް މިއަށް ވުރެ މާ ދަށެވެ. ޑެޕިއުޓީ މިނިސްޓަރުންގެ ގޮތުގައި އެ ސަރުކާރުގައި ތިއްބެވީ 48 ބޭފުޅުންނެވެ. އަދި، ސްޓޭޓު މިނިސްޓަރުންގެ ގޮތުގައި ތިއްބެވީ 38 ބޭފުޅުންނެވެ.
މިނިސްޓަރުންނާއި މިނިސްޓަރު ފެންވަރުގައި ތިއްބެވި ބޭފުޅުންނާއި ސްޓޭޓު މިނިސްޓަރުން އަދި ޑެޕިއުޓީ މިނިސްޓަރުންގެ އަދަދު މި ސަރުކާރުގައި މިހާރު ވަނީ 299 އަށް އަރައިފައެވެ. އޭގެ އިތުރުން ވެސް އެއަށް ވުރެ ދަށް މަގާމުތަކުގައި ސިޔާސީ ބޭފުޅުން ތިއްބަވައެވެ.
ސަރުކާރުން ބުނީ، ސިޔާސީ މުވައްޒަފުންގެ އަދަދު 700 އަށް ވުރެ އިތުރެއް ނުވާނެ ކަމަށެވެ.
އެކަމަކު، ބޮޑު މުސާރަ ލިބޭ ސިޔާސީ މަގާމުތަކަށް އިންތިހާއަށް ބޭފުޅުން އިތުރުވާ މައްސަލައިގައި އިދިކޮޅު އެމްޑީޕީއާއި ދަ ޑިމޮކްރެޓްސްއިން އިއްޔެ ވެސް ވަނީ ކަންބޮޑުވުން ފާޅުކޮށްފައެވެ. އެ ދެ ޕާޓީން އަންނަނީ، މަތީ މަގާމުތަކަށް ބޭފުޅުން އައްޔަންކުރެވޭނެ އަދަދެއް ކަނޑައަޅަން ރައްޔިތުންގެ މަޖިލީހަށް ބިލެއް ހުށަހެޅުމުގެ މަސައްކަތް ކުރަމުންނެވެ.