މިދިޔަ އަހަރުގެ އޭޕްރިލް މަހުގެ ހަތްވަނަ ދުވަހު، އަނިޔާވެރި ގޮތަކަށް މަރާލައިފައި އޮއްވައި ފެނުނު، ނ. މަނަދޫ އަންނާރުމާގޭ ނައީމާ މޫސާގެ މަރުގެ މައްސަލައިގެ ޝަރީއަތާ ބެހޭ މައުލޫމާތު ވަގުތުން ޕްރޮސެކިއުޓާ ޖެނެރަލް (ޕީޖީ) އޮފީހުގެ ވެބްސައިޓުން ބެލޭގޮތް ހަދަން ނިންމައިފިއެވެ.
މިކަމާ ގުޅިގެން ޕީޖީ އޮފީހުން ބުނީ، މި ނިންމުން ނިންމީ މިއީ އާންމުންގެ މަސްލަހަތާއި ޝައުގުވެރިކަން އޮތް މައްސަލައެއްކަމަށް ފެންނާތީ ކަމަށެވެ.
އަދި މި މައްސަލައާއި އެ ބާވަތުގެ އާންމު މަސްލަހަތު ހިމެނޭ މައްސަލަތަކުގެ އަދާހަމަ، ވެބްސައިޓުގައި އާންމުކުރަނީ އެ ކަމަކާ ގުޅޭ މައުލޫމާތު ޕީޖީ އޮފީހަށް ގުޅައިގެން ސާފުކުރަން ނުޖެހޭނޭ އިންތިޒާމެއް ހަމަޖެއްސުމަށް ކަމަށް އެ އޮފީހުން ބުންޏެވެ.
އެހެންކަމުން ޕީޖީ އޮފީހުގެ މީޑިއާ ވެބްސައިޓުގެ "އާންމު ޝައުގު" ބައިގައި، އެ މައްސަލައިގެ މައުލޫމާތު އާންމު ކުރާނެކަމަށް ޕީޖީ އޮފީހުން ބުންޏެވެ.
"އާންމު ޝައުގު"ން މައްސަލައިގެ ހާދިސާއާއި ދައުވާލިބޭ މީހުންގެ މައުލޫމާތާއި، ކުރާ ދައުވާއާއި، މައްސަލަ މިހާރު އޮތް ހިސާބާއި، މައްސަލައިގެ އަޑުއެހުމެއް ކޯޓުގައި ޝެޑިއުލްކޮށްފިނަމަ އެ މައުލޫމާތު އޮޓޮމެޓިކުން އަދާހަމަ ކުރާނެއެވެ.
އެ ބަޔަށް ލިބޭ ޚިޔާލަށް ބެލުމަށްފަހު، އިތުރު މައުލޫމާތުތައް ވެސް ހާމަކުރުމާމެދު ގޮތެއް ނިންމާނެ ކަމަށް ޕީޖީ އޮފީހުން ވަނީ ބުނެފައެވެ.
ނަޢީމާގެ މަރުގެ މައްސަލައިގެ ޝަރީޢަތުގެ އަޑުއެހުންތައް މާދަމާ ކްރިމިނަލް ކޯޓުގައި ފެށުމަށް ވަނީ ހަމަޖެހިފައިވެއެވެ.
މި މައްސަލައިގައި ދައުވާކުރަން ފުލުހުން އެދިފައިވަނީ:
- ހަސަން ފަވާޒު، 21 އަހަރު
- އަބްދުލްވާހިދު ރިފާސް، 21 އަހަރު
- އަހްޒަމް އަބްދުއްޝަކޫރު، 23 އަހަރު
ނައީމާ ޒަޚަމްތަކަކާއެކު މަރުވެފައި އޮއްވައި ފެނުނީ އޭޕްރީލް މަހުގެ ފަސްވަނަ ދުވަހުން ފެށިގެން ޚަބަރެއް ނުވެގެން ހޯދަމުން ދަނިކޮށެވެ.
ފުލުހުން ނައީމާގެ ކޮޓަރީގެ ދޮރު ހަލާކުކޮށްލައިގެން ވަންއިރު، އޭނާ އޮތީ ބިންމަތީގައި މަރުވެފައެވެ. އެނގިފައިވާ ގޮތުގައި އޭނާ މަރުވެފައި އޮތީ ގިނަ އަދި ބައެއް ބޮޑެތި ޒަޚަމްތަކަކާއެކުއެވެ.