އިންފްލުއެންޒާގެ ވައްތަރެއް ކަމަށްވާ އެޗްވަންއެންވަން ޖެހިގެން އިތުރު ޒުވާނަކު ރޭ މަރުވެއްޖެއެވެ.
އައިޖީއެމްއެޗު ހޮސްޕިޓަލުން މިއަދު "ސަން"އަށް މައުލޫމާތުދެމުން ބުނީ އެ ބަލީގައި މަރުވެފައިވަނީ 35 އަހަރުގެ ދިވެހި އަންހެނެއް ކަމަށެވެ.
އޭނާއަށް އަޖީއެމްއެޗުގައި 10 ވަރަކަށް ދުވަހު ފަރުވާ ދީފައިވެއެވެ.
މީގެ ކުރިން، ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ބުނެފައިވަނީ މި ބަލިން ރައްކާތެރިވުމަށް ދަމަނަވެށިން ވެކްސިން ޖަހައިދޭނެ ކަމަށާއި ހަ މަހުން މަތީގެ ކޮންމެ މީހަކަށް ވެސް ވެކްސިން ޖެހޭނެ ކަމަށެވެ.
މިދިޔަ ނޮވެމްބަރު މަހާއި ޑިސެމްބަރު މަހާ އަޅައިބަލާއިރު މި މަހު އިންފްލުއެންޒާއަށް ޕޮޒިޓިވްވާ މިންވަރު އިތުރުވެފައިވާ ކަމަށް އެޗްޕީއޭއިން ވަނީ ބުނެފައެވެ. އަދި، އިންފްލުއެންޒާގައި މި ފަހުން ވަނީ ޒުވާނަކު ދުނިޔެ ދޫކޮށްފައެވެ.
"ސަން"އާ ވާހަކަދައްކަވަމުން މީގެ ކުރިން އެތެރެހަށީގެ ޑޮކްޓަރު މުޙައްމަދު އަލީ ވިދާޅުވީ މި ބަލި ފެތުރުމަށް މަގުފަހިވަނީ ބަލިން ރައްކާތެރިވުމަށް ވެކްސިންތައް ޖެހުން މަދުވުމުން ކަމަށެވެ. އެހެންވެ، ވީ އެންމެ އަވަހަކަށް އިންފްލުއެންޒާ ވެކްސިން ޖެހުމަށް އޭނާ ވަނީ އިލްތިމާސްކޮށްފައެވެ.
އޭނާ ވިދާޅުވި ގޮތުގައި އެ ބަލި ޖެހުމުން ފެންނާނީ ރޯގާގެ އަލާމާތްތަކެވެ.
"އެހެން ވެއްޖެއްޔާ ގޭގައި މަޑުކޮށްލުން ބޮޑަށް ރައްކާތެރިވާނީ. އަލާމާތްތައް ހުރެއްޖެއްޔާ މާސްކެއް ބޭނުންކުރުން ނުވަތަ ރޯގާ ރަނގަޅު ވަންދެން ގޭގައި މަޑުކޮށްލުން ރަނގަޅުވާނީ،" ޑޮކްޓަރު ވިދާޅުވިއެވެ.
އޭނާ ވިދާޅުވީ އެ ބައްޔަކީ އަލާމާތްތައް ފެނުމުގެ ދެ ދުވަސް ކުރިން ފެތުރެން ފަށާ ބައްޔެއް ކަމަށެވެ. އަދި، ރޯގާގެ އަލާމާތްތައް ފެންނަ ފަހުން ވެސް ގައިން ގަޔަށް އެރުމުގެ ފުރުސަތު ބޮޑުކަން ޑރ. މުޙައްމަދު އަލީ ފާހަގަކުރެއްވިއެވެ.