މި އަހަރު ބާއްވަން ހަމަޖެހިފައިވާ 20ވަނަ ރައްޔިތުންގެ މަޖިލީހުގެ އިންތިޚާބު ރަމަޟާން މަހުގެތެރޭ ބާއްވަން މަޖުބޫރުވީ ގާނޫނަށް އިސްލާހު ގެނެވިފައި ނުވާތީކަމަށް އިލެކްޝަން ކޮމިޝަން (އީސީ)ގެ ރައީސް ފުއާދު ތައުފީގު މިރޭ ވިދާޅުވެއްޖެއެވެ.
ޕީއެސްމްގެ ރާއްޖެ މިއަދު ޕްރޮގްރާމްގައި ވާހަކަދައްވަމުން ފުއާދު ވިދާޅުވީ، މިހާރު އަމަލުކުރަމުންދާ ގާނުނޫގެ ދަށުުން ހިނގަމުންދާ 19ވަނަ މަޖިލީހުގެ ދައުރު ހަމަވުމުގެ 120 ދުވަސް ކުރިން އިންތިޚާބު އިއުލާނު ކުރަންޖެހޭ ކަމަށެވެ.
އެހެންވެ، އެންމެ އަވަހަށް ވެސް އިންތިޚާބު އިއުލާނުކުރެވޭނީ މި މަހުގެ 30ގައި ކަމަށާއި އިންތިޚާބު ބޭއްވޭ ތާރިޚަށް ދިމާވަނީ މާޗު 17 ކަމަށެވެ.
"އެހެންވީމަ އެ 120 ދުވަސް އެގޮތަށް އޮތްވައި އަޅުގަނޑުމެނަކަށް ނެތް މިއަށްވުރެ އަވަހަށް އިއުލާންކޮށްގެން އިންތިޚާބު ބޭއްވޭނެ ފުރުސަތެއް،" ފުއާދު ވިދާޅުވިއެވެ.
އިތުރަށް ވާހަކަދައްކަވަމުން ފުއާދު ވިދާޅުވީ، ރަމަޟާން މަހުގެ ފަހުކޮޅަށް އިންތިޚާބު ފަސްކުރެވެން ނެތީ، ސަރުކާރު ބަންދު ދުވަސްތަކާއި ސްކޫލު އިމްތިހާނުތައް އޮންނަ ދުވަސްތަކާ އެ ދުވަސްވަރު ދިމާވާތީ ކަމަށެވެ.
އަދި ސްކޫލުތަކުގެ އިމްތިހާނު ނިމޭ ހިސާބުން އިންތިޚާބު ބާއްވަން ފަސްނުކުރެވެނީ މަޖިލީހުގެ މެންބަރުން ހޮވުމާއި މަޖިލީހާ ގުޅުން ހުރި އެހެނިހެން ކަންކަން މަޖިލީހުގެ މުއްދަތު ހަމަވުމުގެ 30 ދުވަސް ކުރިން ނިންމަންޖެހޭތީ ކަމަށެވެ.
"އަޅުގަނޑުމެން އެބަ މަސައްކަތް ކުރަން ޖެހޭ ޖެނުއަރީ 30 ފެށިގެން 90 ދުވަހުގެ މުއްދަތެއްގެ ތެރޭ އެކަން ނިންމަން. އެހެންވީމާ ގާނޫނަށް ބަދަލެއް ނުގެނެސް މިކަން ވާނެ ގޮތެއް ނެތް،" ފުއާދު ވިދާޅުވިއެވެ.
ފުއާދު ވިދާޅުވީ، ގަނޫނަށް ބަދަލު ގެނައުމަކީ މަޖިލީހުގެ މެންބަރުން ގަބޫލުކުރައްވާ ކަމެއް ނޫން ކަމަށެވެ.
އެގޮތުން 120 ދުވަސްވީމަ އިއުލާނުކުރުން 140 ދުވަހަށް ބަދަލުކޮށް، 20 ދުވަސް ކުރިން އިންތިޚާބު އިއުލާނުކުރާ ގޮތަށް ގާނޫނު އިސްލާހުކުރެވިއްޖެނަމަ ރަމަޟާން މަހުގެ ކުރިން އިންތިޚާބު ބޭއްވޭނެ ކަމަށް ފުއާދު ވިދާޅުވިއެވެ
"އެކަމަކު މިއިން އެއްވެސް ގާނޫނަކަށް ބަދަލެއް ނުކޮށް އަޅުގަނޑުމެންނަށް އިންތިޚާބު ބޭއްވޭނީ ރަަމަޟާން މަހުގެ ހަތެއްގައި،" ފުއާދު ވިދާޅުވިއެވެ.
ރަމަޟާން މަހުގެ ތެރޭ މަޖިލިސް އިންތިޚާބު ބާއްވާތީ އިދިކޮޅު އެމްޑީޕީންނާއި ރައީސް އަބްދުﷲ ޔާމީން އުފައްދަވަން މަސައްކަތްކުރާ ޕީއެންއެފްގެ މެމްބަރުން އަންނަނީ ކަންބޮޑުވުން ފާޅުކުރަމުންނެވެ.