ގއ. ވިލިނގިލީ ހޮސްޕިޓަލުގައި އޮތް ކުޑަކުއްޖަކަށް ދޭންޖެހޭ ފަރުވާ ނުލިބި ލަސްވެގެން، އެ ރަށު ރައްޔިތުން އެއްވެ، އެ ރަށު ހޮސްޕިޓަލުގެ ނަން ބޯޑު ބަދަލުކޮށް، ހޮސްޕިޓަލް ކުރިމަތީގައި މިއަދު މުޒާހަރާކޮށްފިއެވެ.
ވިލިނގިލީ ދާއިރާގެ މެމްބަރު ސައުދު ހުސައެއިން އެކްސްގައި މިއަދު އާންމުކުރި ވީޑިއޯއެއްގައި ފެންނަ ގޮތުން، ވިލިނގިލީ ހޮސްޕިޓަލުގެ ނަން ބޯޑު މަތީ "ގއ. ވިލިނގިލީ ހެލްތު ޕޯސްޓު" ލިޔެ، ތަތްކޮށްފައިވެއެވެ.
ގިނަ އަދަދެއްގެ އާންމުން ހޮސްޕިޓަލް ސަރަހައްދަށް އެއްވެ، އަޑުގަދަ ކުރާ މަންޒަރު މި ވީޑިއޯ އިން ފެނެއެވެ. އަދި، ކޮންމެ ވެރިކަމެއް އޮތަސް މި ތަނުގެ ހާލަތު ދަށްކަމަށް ބުނެ، އާއްމުން ޝުއޫރު ފާޅުކުރާ އަޑު އިވެއެވެ.
https://x.com/SaudVillingili/status/1747871875592765759?s=20
ވީޑިއޯ ހިއްސާކުރައްވަމުން މެމްބަރު ވިދާޅުވީ، އަވަސް ފަރުވާއަށް މާލެ ގެނެވޭނެ ގޮތެއް ނެތި، އެތައް ގަޑިއިރެއް ހޭދަކުރަން ޖެހުމުގެ ސަބަބުން ވިލިނގިލީ ހޮސްޕިޓަލުގައި ފަރުވާދެމުންދާ 13 އަހަރުގެ ކުޑަކުއްޖެއްގެ ހާލު ދަށްވަމުންދާ ކަމަށެވެ.
އަދި، އަވަސް ފަރުވާ ބޭނުންވާ ހާލަތްތަކުގައި ގައުމުގައި ލިބެން ހުރި ވަސީލަތް ބޭނުން ނުކޮށް މިފަދަ ކަންކަން ލަސްވެގެން ދިއުމަކީ ނުހަނު ކަންބޮޑުވާ ކަމެއް ކަމަށް ސައުދު ފާހަގަކުރެއްވިއެވެ.
"މީގެ ކުރިން މިފަދަ ހާލަތްތަކުގައި ހެލިކޮޕްޓަރު ބޭނުންކޮށްގެން ވަރަށް ގިނަ ބަލި މީހުންނަށް ވާނީ އަވަސް ފަރުވާ ލިބިފައި،" އޭނާ ވިދާޅުވިއެވެ.
މިކަމާ ގުޅޭ އިތުރު މައުލޫމާތު ހޯދުމަށް ވިލިނގިލީ ހޮސްޕިޓަލަށް ގުޅުމުން، ޖަވާބު ލިބިފައެއް ނުވެއެވެ.