ރޯމާގެ އާ ކޯޗަކަށް އެ ކްލަބުގެ ކުރީގެ މިޑްފީލްޑަރު ޑެނިއެލް ޑި ރޮސީ ހަމަޖައްސައިފިއެވެ.
އެ މަގާމަށް ޑި ރޮސީ ހަމަޖައްސާފައިވަނީ ރޯމާގެ ނަތީޖާތައް ގޯސްވުމާ ގުޅިގެން އެ ކްލަބުގެ ކޯޗުކަމުގެ މަގާމުގައި ހުރި ހޯސޭ މޮރީނިއޯ ވަކިކުރުމަށް ފަހުއެވެ.
ކުޅުންތެރިއެއްގެ ގޮތުގައި ރޯމާގައި 18 އަހަރު ހޭދަކުރި ޑި ރޮސީ، އެ ކްލަބުގެ ކޯޗަކަށް ހަމަޖައްސާފައިވަނީ މި ސީޒަނުގެ ނިޔަލަށެވެ. މިހާރު ރޯމާއިން ވެސް ވަނީ އާ ކޯޗަކަށް ޑި ރޮސީ ހަމަޖެއްސިކަން ރަސްމީކޮށް އިއުލާންކޮށްފައެވެ.
ރޯމާގެ ކޯޗުކަމާ ހަވާލުވުމަށްފަހު ޑި ރޮސީ ބުނީ އެ ކްލަބުގެ ކޯޗުކަމުގެ މަސްއޫލިއްޔަތު އޭނާއާ ހަވާލުކުރުމުން ޝުކުރު އަދާކުރާ ކަމަށާއި މި ސީޒަނުގެ ނިޔަަލަށް އޭނާއަށް ކުރެވެން ހުރި ހުރިހާ މަސައްކަތެއް ކްލަބާއެކު ކުރާނެ ކަމަށެވެ.
"ރޯމާގެ ބެންޗުގައި އިނދެވުމަކީ ވެސް ލިބޭނެ ވަރަށް ބޮޑު އުފަލަކަށް ވާނެ. އަހަރެންނަށް ރޯމާ ހާއްސަކަން އެންމެންނަށް ވެސް އެނގޭނެ. ނަމަވެސް ކުރަން ޖެހޭ ގިނަ މަސައްކަތްތައް އެބަހުރި. އަހަރެމެންގެ އަމާޒަށް ވާސިލުވުމަށް ކުރަން ޖެހޭ މަސައްކަތްތައް ކުރުމަށް އަވަސްވެގަންނަން ޖެހޭނެ،" އޭނާ ބުންޏެވެ.
މި ސީޒަނުގައި މޮރީނިއޯއާ އެކު ރޯމާގެ ފެށުން ވެސް ވަނީ ގޯސްވެފައެވެ. ރޯމާއިން އޭސީ މިލާނާ ދެކޮޅަށް އެންމެ ފަހުން ކުޅުނު ލީގު މެޗުން 3-1ގެ ނަތީޖާއަކުން ބަލިވެފައިވާއިރު، ކޮޕާ އިޓާލިއާގެ ކުއާޓާ ފައިނަލުގައި ލާޒިއޯ އަތުން 1-0ގެ ނަތީޖާއަކުން ބަލިވެ، އެ މުބާރާތުން ވަނީ ކަޓައިފައެވެ.
މީގެ ކުރިން ޗެލްސީއާއި އިންޓަ މިލާނާއި ރެއާލް މެޑްރިޑް އަދި މެންޗެސްޓާ ޔުނައިޓެޑަށް ކާމިޔާބީތަކެއް ހޯދައިދިން މޮރީނިއޯ ވަނީ 2021 ވަނަ އަހަރު ރޯމާއާ ހަވާލުވުމަށް ފަހު އެ ކްލަބަށް ވެސް ކާމިޔާބީތަކެއް ހޯދައިދީފައެވެ. އެގޮތުން އޭނާ ވަނީ ރޯމާއަށް ޔޫއެފާ ޔޫރޮޕާ ކޮންފަރެންސް ލީގުގެ ޗެމްޕިއަންކަން ހޯދައިދީ، މިދިޔަ ސީޒަނުގެ ޔޫރޮޕާ ލީގުގައި ފައިނަލަށް ގެންގޮސްދީފައެވެ.