ރޯމާގެ ކޯޗުކަމުގެ މަގާމުން ހޯސޭ މޮރީނިއޯ ވަކިކޮށްފިއެވެ.
ރޯމާގެ ކޯޗުކަމުގެ މަގާމުން މޮރީނިއޯ ވަކިކޮށްފައި މިވަނީ އެ ކްލަބުގެ ނަތީޖާތައް ގޯސްވުމާ ގުޅިގެންނެވެ. ރޯމާއިން އޭސީ މިލާނާ ދެކޮޅަށް އެންމެ ފަހުން ކުޅުނު ލީގު މެޗުން 3-1ގެ ނަތީޖާއަކުން ބަލިވެފައިވާ އިރު، ކޮޕާ އިޓާލިއާގެ ކުއާޓާ ފައިނަލުގައި ލާޒިއޯ އަތުން 1-0ގެ ނަތީޖާއަކުން ބަލިވެ، އެ މުބާރާތުން ވަނީ ކަޓައިފައެވެ.
ރޯމާގެ ވެރިން ކަމަށްވާ ޑޭން އަދި ރަޔަން ފްރިއެޑްކިން ނެރުނު ބަޔާނެއްގައި މޮރީނިއޯ ވަކިކޮށްފައިވާކަން ކަށަވަރުކޮށްދީފައިވާ އިރު، މޮރީނިއޯ ކްލަބަށް ހޯދައިދިން ކާމިޔާބީތަކަށް ވަނީ ޝުކުރު އަދާކޮށްފައެވެ.
"ރޯމާއަށް ހޯދައިދިން ކާމިޔާބީތައް އަބަދުވެސް ހަނދާނުގައި ހުންނާނެ. ނަމަވެސް ކްލަބަށް މިވަގުތު އެންމެ ފައިދާވާނީ ބަދަލެއް ގެނެސްގެން. މޮރީނިއޯ އަދި އޭނާގެ އެސިސްޓަންޓުންނަށް ކުރިމަގުގައި ކާމިޔާބީއަށް އެދެން،" ރޯމާގެ ވެރިން ނެރުނު ބަޔާނުގައި ބުންޏެވެ.
މީގެ ކުރިން ޗެލްސީ އާއި އިންޓަ މިލާނާއި ރެއާލް މެޑްރިޑް އަދި މެންޗެސްޓާ ޔުނައިޓެޑަށް ކާމިޔާބީތަކެއް ހޯދައިދިން މޮރީނިއޯ ވަނީ 2021 ވަނަ އަހަރު ރޯމާއާ ހަވާލުވުމަށްފަހު އެ ކްލަބަށް ވެސް ކާމިޔާބީތަކެއް ހޯދައިދީފައެވެ. އެގޮތުން އޭނާ ވަނީ ރޯމާއަށް ޔޫއެފާ ޔޫރޮޕާ ކޮންފަރެންސް ލީގުގެ ޗެމްޕިއަންކަން ހޯދައިދީ، މިދިޔަ ސީޒަނުގެ ޔޫރޮޕާ ލީގުގައި ފައިނަލަށް ގެންގޮސްދީފައެވެ.
މޮރީނިއޯގެ ބަދަލުގައި ރޯމާގެ ކޯޗަކަށް ހަމަޖައްސާފައިވަނީ މިޑްފީލްޑަރެއްގެ ގޮތުގައި އެ ކްލަބުން ވިދާލި ޑެނިއެލް ޑި ރޮސީއެވެ.