ކުޑަކުއްޖަކަށް ޖިންސީ ގޯނާ ކުރުމުގެ ތުހުމަތުގައި ހައްޔަރުކުރި ފިލްމީތަރި މުހައްމަދު ޔުނާން, ތިން އަހަރު ފަހުން ޖަލު ބަންދުން ދޫކޮށްލާފައި ވަނީ ގޯސްކޮށް ކަމަށާއި ކުރިއަށް އޮތް ހަތް ދުވަސްތެރޭ އެނާ ބަންދުކުރަން އެދި ހުށަހަޅައިފިނަމަ ބަންދާމެދު ގޮތެއް ނިންމަން ހުޅުމާލޭ މެޖިސްޓްރޭޓް ކޯޓުގެ މައްޗަށް ހައިކޯޓުން މިއަދު އަމުރުކޮށްފިއެވެ.
އެ މައްސަލާގައި ޔުނާން ދޫކޮށްލާފައި ވަނީ މިދިޔަ އަހަރުގެ ޑިސެމްބަރު މަހުގެ 14ވަނަ ދުވަހުއެވެ.
އޭރު އޭނާ ދޫކޮށްލާފައި ވަނީ ޝަރުތުތަކަކާއެކުއެވެ. އެ ޝަރުތުތަކަކީ:
- ސިއްހީ ސަބަބަކާ ނުލައި ގެއިން ބޭރަށް ނުދިޔުން
- މާލެއިން ބޭރަށް އަދި ރާއްޖެއިން ބޭރަށް ފުރާނަމަ ކޯޓުގެ ހުއްދަ ހޯދުން
- މީޑިއާއަށް މި ހިނގާ މައްސަލައިގެ މައުލޫމާތު ނުދިނުން
- މި މައްސަލާގައި އަނިޔާ ލިބުނު އެއްވެސް ކުޑަކުއްޖަކާ އެއްވެސް މުއާމަލާތެއް ނުކުރުން
- ދިރިއުޅޭ ތަނުގެ މައުލޫމާތު ކޯޓަށާއި ކަރެކްޝަންސްއަށް އެންގުން
އެއަށްފަހު އެ ޝަރުތުތަކާ ޚިލާފުވެފައިވާ ކަމަށް ބުނެ ޕްރޮސިކިއުޓާ ޖެނެރަލް (ޕީޖީ) އޮފީހުން ހައިކޯޓުގައި އަލުން އޭނާ ބަންދުކޮށްދޭން ވަނީ އެދިފައެވެ.
އެއާއެކު އެ މައްސަލާގައި ހައިކޯޓުން ކުރި ހުކުމުގައި ބުނެފައި ވަނީ ޔުނާން ދޫކުރިއިރު، ހެކިތައް އަލުން ވަޒަންކޮށް، ބަންދުކުރުމުގެ ހާލަތު ބަދަލުވިގޮތް ދަށު ކޯޓުން ބަޔާންކޮށްފައި ނުވާ ކަމަށެވެ. އަދި ޔުނާންގެ ފަރާތުން ހެއްކަށް ނުފޫޒުފޯރުވުމުގެ އިހްތިމާލު ނެތްކަމަށް ބަޔާންކުރުމުގެ އިތުރުން ބަންދުކުރި ހާލަތު ބަދަލުވިގޮތް ބަޔާންކުރުމުގައި ގާނޫނީ އެއްވެސް މަސްދަރަކާ ހަވާލާދީފައިނުވާ ކަމަށް ބުނެފައިވެއެވެ.
"މިއީ ދަށު ކޯޓުގެ ފަނޑިޔާރު އިޚްތިޔާރުކުރި ގޮތުގެ ސަބަބުން އެކަށީގެންނުވާ ކަމެއް ނުވަތަ ބޭއިންސާފެއް ކުރިމަތިވެފައިވާ ހާލަތެއް ކަމުގައި ދެކެމެވެ. އަދި ދަށު ކޯޓުގެ ފަނޑިޔާރު ގޮތް ނިންމާފައި ވަނީ ރަނގަޅު އުސޫލަކަށް ބިނާކޮށްކަމުގައި ވެސް ނުދެކެމެވެ،" ހައިކޯޓުގެ އަމުރުގައި ބުނެފައިވެއެވެ.
އެހެންކަމުން ޔުނާން ބަންދުން ދޫކޮށްލާފައި ވަނީ މުޖުތަމައުގެ ސަލާމަތަށްޓަކައި އޭނާ ބަންދުކުރި ހާލަތު ބަދަލުވެގެން ނޫން ކަމަށް ހައިކޯޓުން ބުނެފައިވެއެވެ.
އަދި ޔުނާން ބަންދުކުރުމަށް ޕީޖީގެ ފަރާތުން މައްސަލަ ބަލާ ދަށު ކޯޓަށް މިއަދުން ފެށިގެން ހަތް ދުވަސްތެރޭ ހުށަހަޅައިފިނަމަ އެ ހުށަހެޅުމާމެދު ވީހާވެސް އަވަހަށް ގޮތެއް ނިންމަން ހައިކޯޓުން ވަނީ އަމުރުކޮށްފައެވެ.
ޔުނާނާއި އޭނާގެ އަންހެނުން ފާތިމަތު ރިހުލާ، ޝަރީއަތް ނިމެންދެން ބަންދުކުރުމަށް ކޯޓުން އަމުރުކޮށްފައިވަނީ 2020 ވަނަ އަހަރުގެ އޮކްޓޫބަރު މަހުގެ 14 ވަނަ ދުވަހުއެވެ. އެއަށްފަހު މިދިޔަ މާޗް މަހުގެ ތިން ވަނަ ދުވަހު ރިހުލާ ވަނީ ގޭބަންދަށް ބަދަލުކޮށްފައެވެ.
އޭނާ ޖަލު ބަންދުން ދޫކޮށްލީ ހައްޔަރުކުރިތާ ތިން އަހަރު ފަހުން މި މަހު 14ގައެވެ.
ޔުނާންގެ މައްޗަށް ކޮށްފައިވާ ދައުވާތައް ސާބިތުވެއްޖެ ނަމަ އޭނާއަށް އެންމެ މަދުވެގެން ޖުމްލަ 110 ނުވަތަ ގިނަވެގެން ޖުމްލަ 133 އަހަރުގެ ޖަލު ހުކުމެއް އަންނާނެއެވެ.
ޔުނާންގެ މައްޗަށް ކުރާ ދައުވާތައް:
- ކުޑަކުއްޖަކު އިތުބާރު ކުރަން ޖެހޭ މަގާމެއްގައި ހުރި މީހަކު، ޖިންސީ އަމަލެއް ބަޔަކު ހިންގާ މަންޒަރު އެ ކުޑަކުއްޖާއަށް ދެއްކުމުގެ ދެ ދައުވާ
- ކުޑަކުއްޖަކު އިތުބާރު ކުރަން ޖެހޭ މަގާމެއްގައި ހުރި މީހަކު، އެ ކުޑަކުއްޖާ ލައްވައި ޖިންސީ އަމަލެއް ހިންގުވުމުގެ ދެ ދައުވާ
- ކުޑަކުއްޖަކު އިތުބާރު ކުރަން ޖެހޭ މަގާމެއްގައި ހުރި މީހަކު، އެ ކުއްޖާގެ ހާޒިރުގައި، އެ ކުއްޖާއަށް ދެއްކުމުގެ މަގުސަދުގައި ޖިންސީ އަމަލެއް ހިންގުމުގެ ދެ ދައުވާ
- އާއިލާގެ މެމްބަރަކު އެ އާއިލާގެ ކުޑަކުއްޖަކާއެކު ޖިންސީ އަމަލެއް ހިންގުމުގެ ދައުވާ
- އޮރިޔާންކާޑު ގެންގުޅުމުގެ ދެ ދައުވާ