ލިވަޕޫލުގެ މިސްރު ތަރި މުހައްމަދު ސަލާހުގެ ޓްރާންސްފާއާ ގުޅޭގޮތުން މީގެ އަށް މަސްދުވަސް ކުރިން ދެކެވުނު ވާހަކަތަކަށް އޭނާގެ އެޖެންޓް ރައްދުދީފިއެވެ.
ސަލާހުގެ އެޖެންޓް، ރަމީ އައްބާސް އީސާ ރައްދުދީފައިވަނީ މިދިޔަ އަހަރުގެ މާޗު މަހު އާންމުވި ރިޕޯޓަކަށެވެ. އެ ރިޕޯޓުގައި ބުނެފައިވާ ގޮތުން، ސީޒަން ފެށުމުގެ ކުރިން މިދިޔަ އަހަރު ސަލާހު ލިވަޕޫލު ދޫކޮށް، އެހެން ކްލަބަކާ ގުޅޭނެއެވެ.
އީސާގެ އެކްސް އެކައުންޓުގައި އޭނާ ކުރި ޕޯސްޓެއްގައި ބުނީ އެއީ އެނގިގެން ދައްކާ ވާހަކަތަކެއް ނޫން ކަމަށެވެ. ނަމަވެސް އެހާ ގިނަ ދުވަސްވީ ރިޕޯޓަކަށް އީސާ ރައްދުދޭން ޖެހުނު ސަބަބެއް ނުބުނެއެވެ.
މިސީޒަން ފެށުމުގެ ކުރިން ސައުދީ އަރަބިއާގެ ކްލަބުތަކަކުން ވަނީ ސަލާހު ގެންދިއުމަށް މަސައްކަތްތަކެއް ކޮށްފައެވެ. އެގޮތުން ސައުދީގެ އަލް އިއްތިފާގުން ސަލާހަށް 150 މިލިއަން ޕައުންޑުގެ އަގެއް ހުށަހެޅި ނަމަވެސް، ލިވަޕޫލުން އޭނާ ދޫކޮށްލުމަށް ވަނީ އިންކާރުކޮށްފައެވެ.
އޭގެ ފަހުން މިދިޔަ މަހު އާންމުވި ރިޕޯޓުތަކެއް ބުނެފައިވާ ގޮތުގައި، ޕޯޗުގަލް ތަރި ކްރިސްޓިއާނޯ ރޮނާލްޑޯގެ އަލް ނަސްރުން ވެސް ސަލާހު ހޯދުމަށް ވަނީ ބިޑުކޮށްފައެވެ.