އެއްވެސް އިރެއްގައި ވިކިފައި ނޯންނާނެ ކަމަށާއި އަބަދުވެސް ތިބީ، ގައުމުގެ މަސްލަހަތު އިސްކޮށްގެންކަމަށާއި، އެއީ ވެރިކަން ކުރާ ޕީއެންސީއާ ގުޅިވަޑައިގެންނެވި ސަބަބުކަމަށް މަރަދޫ ދާއިރާގެ މެމްބަރު އިބްރާހިމް ޝަރީފް (މަވޯޓާ) މިރޭ ވިދާޅުވެއްޖެއެވެ.
މިރޭ އެމްޑީޕީން ވަކިވެ، ޕީއެންސީއާ ގުޅުނު މެމްބަރުންގެ ފަރާތުން ވާހަކަދައްކަވަމުން ޝަރީފް ވިދާޅުވީ ޕީއެންސީއާ ގުޅުމުން އެންމެ ބޮޑަށް އަމާޒުވީ އެއް ފާޑުކިޔުމަކީ، ޚިޔާލު ބަދަލުވީތޯއާއި، "ވިކުނީތޯ" ކަމަށެވެ.
"ނޫން. އެއްގޮތަކަށް ވެސް ނޫން. އަޅުގަނޑުމެންގެ ޚިޔާލެއް ވެސް ބަދަލެއް ނުވޭ. އަޅުގަނޑުމެންގެ ނިންމުމެއް ވެސް ބަދަލެއްނުވޭ. އަޅުގަނޑުމެންގެ ފިކުރަކީ ގައުމުގެ ފިކުރު،" ޝަރީފް ވިދާޅުވިއެވެ.
އެއާއެކު ޝަރީފް ވިދާޅުވީ ޕީއެންސީއާ ގުޅެން ނިންމި އެންމެ ބޮޑު އެއް ސަބަބަކީ ރައްޔިތުންގެ ނިންމުމާ ދެކޮޅަށް އެމްޑީޕީގެ ޕާލިމަންޓްރީ ގްރޫޕުގެ އަމަލުތައް ބައްޓަންވުން ކަމަށެވެ.
"އެ ވާހަކައަކީ އިހަށްދުވަހު ރައްޔިތުން ވަރަށް ތަނަވަސް އަޣުލަބިއްޔަތަކުން ހޯދި ނިންމެވި ނިންމެވުމަށް ތަބާވާށޭ،" ޝަރީފް ވިދާޅުވިއެވެ.
އެގޮތުން، ރައްޔިތުން ހޮވައިފައިވާ ސަރުކާރުގެ ވަޒީރުންނަށް ރުހުން ދިނުމުގެ މަސައްކަތް ލަސްކުރުމަކީ އެންމެ ބޮޑު ހިތްހަމަ ނުޖެހުންކަމަށް ވިދާޅުވިއެވެ.
އޭނާ ވިދާޅުވީ ގާބިލް ބޭފުޅުންނަށް ރުހުން ދިނުމުގެ މަސައްކަތް އަވަސްކުރުމަށް ތަކުރާރުކޮށް އޭނާއާއި އެހެން މެމްބަރުން އެމްޑީޕީގެ ޕީޖީގައި އެދެމުން އައި ކަމަށެވެ.
ނަމަވެސް އެމްޑީޕީގެ އަޣުލަބިއްޔަތު އޮތް މަޖިލީހުގައި އެ މަސައްކަތްވީ އެއްވެސް އަމާޒެއް ނެތި "ލާހޫރޭ"ހެން އޮތް ކަމެއްގެ ގޮތުގައިކަމަށް ޝަރީފް ވިދާޅުވިއެވެ.
"އެ ގޮތް އަޅުގަނޑަކަށް ބަލައެއް ނުގަނެވުނު،" ދެން ގުޅިވަޑައިގެންނެވި އެހެން މެމްބަރުން ވެސް އެ ކަން ބަލައިނުގަންނަކަން ފާހަގަކުރައްވައި ޝަރީފް ވިދާޅުވިއެވެ.
އޭނާ ވިދާޅުވީ ވަޒީރުންނަށް ރުހުން ނުދީ އޮއްވައި ދެން ދެކެވެން ފެށީ ރައީސް އަޒުލުކުރުމުގެ ވާހަކަ ކަމަށެވެ. އެއީ މާ ނުރައްކާތެރި ކަމެއް ކަމަށާއި އެއް ގޮތަަކަށް ވެސް ކޮށްގެންވާނެ ކަމެއް ނޫންކަމަށް ވިދާޅުވިއެވެ.
އޭނާ ވިދާޅުވީ އެއީ ގައުމަށް ޣައްދާރުވުން ކަމަށާއި، އެއީ ގައުމެއްގެ ހަލާކުކަމަށެވެ.
އިތުރަށް ވާހަކަދައްކަވަމުން ޝަރީފް ވިދާޅުވީ ރައީސް ޑރ. މުޙައްމަދު މުއިއްޒަކީ ވިޝަނަރީ ބޭފުޅެއްކަމަށެވެ. އަދި ގައުމަށް ތަރައްގީ ގެނެސްދެއްވުމުގައި އެ މަނިކުފާނުގެ ވިސްނުންފުޅު ހުރި ގޮތް ރަނގަޅަށް ހާމަވަމުން އަންނަކަމަށް ވެސް ވިދާޅުވިއެވެ.
ޝަރީފް ވިދާޅުވީ އޭނާ އެމްޑީޕީއާއި އޭގެ ކުރިން ޑީއާރްޕީގައި މަސައްކަތް ކުރެއްވިއިރު ވެސް، މަސައްކަތް ކުރެއްވީ ވަރަށް އިޚްލާސްތެރިކަމާއި ވަފާތެރިކަމާއެކު ކަމަށެވެ. ހަމަ އެގޮތުގައި ޕީއެންސީގައި މަސައްކަތް ކުރައްވާނެކަމަށް ވެސް ވިދާޅުވިއެވެ.
"ޕީޕީއެމް ޕީއެންސީގައި އަޅުގަނޑު ހުންނަ އިރުގައި ވެސް މި ޕާޓީން ކުރާ މަސައްކަތުގައި ފުރިހަމަ އެއްބާރުލުން ދޭނަން. އިޚްލާސްތެރިކަމާއެކީ، ވަފާތެރިކަމާއެކީ. އެއީ އެމްޑީޕީގައި މަސައްކަތްކުރި ގޮތް. ޑީއާރްޕީގައި ވެސް މަސައްކަތް ކުރި ގޮތް. އަޅުގަނޑު މިއީ ވިކޭ މީހެއް ނޫން،" އޭނާ ވިދާޅުވިއެވެ.