ރައީސް ޑރ. މުޙައްމަދު މުއިއްޒު ތަންފީޒުކުރައްވާ ސިޔާސަތުތަކުން ދިވެހިންގެ އެއްބައިވަންތަކަން އިތުރު ވާނެ ކަމަށް ދިވެހި ބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަސީރު އިބްރާހީމް މިރޭ ވިދާޅުވެއްޖެއެވެ.
އެއްބައިވަންތަކަމުގެ ދުވަހުގެ މުނާސަބަތުގައި ބޭއްވި ޖަލްސާގައި ވާހަކަދައްކަވަމުން އާދަމް ނަސީރު ވިދާޅުވީ އެއްބައިވަންތަކަންތަކަމަކީ ދިވެހި ގައުމުގެ އެއް ސިފަ ކަމަށެވެ.
"ރައީސް ޑރ. މުޙައްމަދު މުޢިއްޒު ހިންގަވަން ގަސްދުކުރައްވައި މިހާރު ތަންފީޒުކުރައްވަން ފައްޓަވާފައިވާ ސިޔާސަތު، ގައުމީ އެއްބައިވަންތަކަމާއި، ދިވެހި ގައުމީ އަސަރުތައް އަލުން އިޔާދަކުރުމުގެ މި ހަރަކާތުން އަޅުގަނޑުމެން މިހާރު މިދެކޭ އެއްބައިވަންތަކަމާއި، މިކަން އިތުރަށް ދިރުވާއާލާކުރުމުގެ މަސައްކަތްތައް އިތުރަށް ހަރުދަނާވެގެންދާނެ،" އޭނާ ވިދާޅުވިއެވެ.
މިނިސްޓަރު ވިދާޅުވީ އެކަމުގައި ރާއްޖޭގެ ހުރިހާ އެންމެންގެ ބައިވެރިވުން ބޭނުންވާ ކަމަށެވެ. އެގޮތުން، މިއަދުގެ މުނާސަބަތު ފާހަގަކުރުމުގައި ރާއްޖޭގެ ހުރިހާ ހިސާބަކުން ގުޅިގެން ކުރި މަސައްކަތް މިނިސްޓަރު ފާހަގަ ކުރެއްވިއެވެ.
މީގެ އިތުރުން ވަޒީރު ވިދާޅުވީ ސުނާމީއަކީ ރާއްޖެ ދުށް އެންމެ ހިތާމަވެރި ކާރިސާކަމުގައި ވީ ނަމަވެސް، ދިވެހީން އެދުވަސް ފާހަގަކުރަނީ އެ ދުވަހު ދިވެހިންގެ ކިބައިން ފެނުނު ރީތި ސިފައަކާ ގުޅުވައި ކަމަށެވެ.
އެއްބައިވަންތަ ކަމުގެ ދުވަހަކީ 2004 ވަނަ އަހަރުގެ ޑިސެމްބަރު މަހުގެ 26 ވަނަ ދުވަހު ރާއްޖެއަށް ކުރިމަތިވި ސުނާމީ ކާރިސާއާ ގުޅިގެން ފާހަގަ ކުރަމުން އަންނަ ދުވަހެކެވެ.