އާބަންކޯއިން ސުނާމީ ކާރިސާގެ ހަނދާން އާކުރުމަށް އެ ކުންފުނީގެ މުވައްޒަފުންގެ އިތުރުން ސަރުކާރުގެ އިދާރާތަކާއި އަމިއްލަ ކުންފުނިތައް ހިމެނޭހެން 1000 އަށްވުރެ ގިނަ މުވައްޒަފުންނާއެކު އެއްވުމެއް ބާއްވައިފިއެވެ.
މީގެ 19 އަހަރު ކުރިން 2004 ވަނަ އަހަރުގެ ޑިސެންބަރު 26 ވަނަ ދުވަހު ކުރިމަތިވި ސުނާމީ ކާރިސާގައި ދިވެހިން ދައްކައިދިން އެއްބައިވަންތަކަމުގެ ރަމްޒެއްގެ ގޮތުން އެއްބައިވަންތަކަމުގެ ދުވަސް ފާހަގަކުރަނީ ކޮންމެ އަހަރެއްގެ ޑިސެންބަރުގެ 26 ގައެވެ.
މިގޮތުން، އާބަންކޯއިން އެއްބައިވަންތަކަމުގެ ދުވަސް މިއަދު ފާހަގަކުރީ ހުޅުމާލޭ ސެންޓްރަލް ޕާކުގައި ހެނދުނު 8:30 ފެށިގެން ކުރިއަށް ގެންދިޔަ އެއްވުމެއްގައެވެ.
މި އެއްވުމުގައި ސުނާމީ ކާރިސާގައި ނިޔާވި އަދި ގެއްލުނު މީހުންގެ ހަނދާނުގައި އެއް މިނެޓްގެ ސުކޫތެއް ގެނައެވެ.
ގިނަ އަދެއްގެ މީހުން ބައިވެރިވި މި ހަފުލާ ޝަރަފުވެރި ކޮށްދެއްވީ މިނިސްޓާ އޮފް ދިވެހި ލެންގުއޭޖް، ކަލްޗާ އެންޑް ހެރިޓޭޖް އާދަމް ނަޞީރު އިބްރާހީމްއެވެ.
އެއްވުމުގައި ވާހަކަ ދައްކަވަމުން މިނިސްޓަރު ވަނީ ދިވެހިން އެއްބައިވަންތަ ބައެއްގެ ގޮތުގައި ދެމިތިބުމުގެ މުހިންމުކަމުކަން ފާހަގަކުރައްވައިފައެވެ. އަދި، ދިވެހިންނަކީ އެއް ލޭ ހިނގާ، އެއް އާއިލާއެއް ކަމަށާއި، އެއްބައިވަންތަކަން ބީވިޔަދީގެން ނުވާނެ ކަމަށް ވެސް ވިދާޅުވިއެވެ.
އެ ހަފްލާގައި މިނިސްޓަރު ވާހަކަފުޅު ދައްކަވަނީ--ފޮޓޯ/އާބަންކޯ
ސުނާމީ ކާރިސާއަށް ފަހު ކޮންމެ އަހަރަކު ވެސް ގައުމީ އެއްބައިވަންތަކަމުގެ ދުވަސް ވަރަށް ކުލަ ގަދަކޮށް ރާއްޖޭގައި ފާހަގަ ކުރެއެވެ.
މިފަދަ ގައުމީ މުނާސަބަތުތަކާއި ދުވަސްތައް ފާހަގަކުރުމަށް އާބަންކޯއިން އަބަދުވެސް އިސްކަން ދެއެވެ. އަދި މިފަދަ ގައުމީ މުނާސަބަތުތަކުގައި އާބަންކޯގެ މުވައްޒަފުންގެ ފުރިހަމަ ބައިވެރިވުން އަބަދުވެސް ފެންނަ ކަމަށް އާބަންކޯއިން ބުންޏެވެ.