ރޯމާއިން ނަޕޯލީ ފަހަތަށް ޖައްސާލައި، ހަވަނައަށް

އިޓާލިއަން ސެރީއާގައި އޭއެސް ރޯމާއިން އެންމެ ފަހުގެ ޗެމްޕިއަން ނަޕޯލީގެ މައްޗަށް ކުރި ހޯދައިފިއެވެ.

ރޯމާގެ ދަނޑުގައި ކުޅުނު މި މެޗު އެ ޓީމުން ކާމިޔާބުކޮށްފައިވަނީ 2-0 އިންނެވެ. ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ނަޕޯލީން ބޯޅަ ގެންގުޅުނުއިރު ގިނަ ހަމަލާ އުފައްދާފައިވަނީ ރޯމާއިންނެވެ.

މެޗުގެ ފުރަތަމަ ހާފުގައި ރަނގަޅު ކުޅުމެއް ފެނިގެންދިޔަ ނަމަވެސް ދެ ޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ކުރެވޭގޮތެއް ނުވިއެެވެ. އަދި، މެޗުގައި ލަނޑެއް ފެނުމުގެ ކުރިން ފެނިގެންދިޔައީ ރަތް ކާޑެކެވެ. މެޗުގެ 66 ވަނަ މިނެޓުގައި ނަޕޯލީގެ މެޓިއޯ ޕޮލިޓާނޯއަށް ވަނީ ރަތްކާޑު ދައްކައިފައެވެ.

ރޯމާއިން ވަނީ މިކަމުގެ ފުރިހަމަ ފައިދާ ނަގައި މެޗުގެ 76 ވަނަ މިނެޓުގައި ލަނޑެއް ޖަހައި މެޗުގެ ލީޑު ނަގައިފައެވެ. މި ލަނޑު އެ ޓީމަށް ޖަހައިދިނީ ލޮރެންޒޯ ޕެލެގްރީނީއެވެ. ނަޕޯލީން މެޗުގެ ނަތީޖާ ހަމަހަމަ ކުރެވޭތޯ މަސައްކަތް ކުރި ނަމަވެސް އެ ޓީމުގެ މަސައްކަތަށް އިތުރަށް ހުރަސް އެޅިގެންދިޔައީ މެޗު ނިމެން ހަތަރު މިނެޓަށް ވެފައިވަނިކޮށް ފޯވަޑް ވިކްޓާ އޮސިމްހޭންއަށް ރަތްކާޑު ދެއްކުމާ އެކުއެވެ. ނަޕޯލީން މެޗު ނިންމައިލީ ދެ ކުޅުންތެރިން މަދުކޮށެވެ.

މެޗުގައި ރޯމާއިން ކާމިޔާބުކުރި ދެވަނަ ލަނޑު މެޗުގެ އިތުރު ވަގުތުގެ ހަވަނަ މިނެޓުގައި ޖަހައިދިނީ ރޮމެލޫ ލުކާކޫއެވެ.

މި ނަތީޖާއާ އެކު ރޯމާ މިހާރު ވަނީ ކުޅުނު 17 މެޗުން ލިބިފައިވާ 28 ޕޮއިންޓާ އެކު ތާވަލުގެ ހަވަނައަށް ކުރިއަށް ޖެހިލައިފައެވެ. އަދި، އެންމެ ފަހުގެ ޗެމްޕިއަން ނަޕޯލީ އުޅެނީ 27 ޕޮއިންޓާ އެކު ތާވަލުގެ ހަތްވަނައިގައެވެ.