އިނގިރޭސި ޕްރިމިއާ ލީގުގައި ވެސްޓް ހޭމް ޔުނައިޓެޑުން މެންޗެސްޓާ ޔުނައިޓެޑުގެ މައްޗަށް ކުރި ހޯދައިފިއެވެ.
ވެސްޓް ހޭމްގެ ދަނޑުގައި ކުޅުނު މި މެޗު އެ ޓީމުން ކާމިޔާބުކޮށްފައިވަނީ 2-0 އިންނެވެ.
ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ޔުނައިޓެޑުން ގިނައިރު ބޯޅަ ގެންގުޅުނުއިރު ގިނަ ހަމަލާ އުފައްދާފައިވަނީ ވެސްޓް ހޭމުންނެވެ.
މެޗުގެ ފުރަތަމަ ހާފުގައި ދެ ޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ކުރެވޭގޮތެއް ނުވިއެވެ. މެޗުގައި ވެސްޓް ހޭމްއިން ކާމިޔާބުކުރި ފުރަތަމަ ލަނޑު މެޗުގެ 72 ވަނަ މިނެޓްގައި ލޫކަސް ޕަކުއެޓާ ތަނަވަސް ކޮށްދިން ފުރުސަތެއްގައި ޖަހައިދިނީ ޖެރޯޑް ބޮވެންއެވެ. އަދި، މި ލަނޑު ޖެހިތާ ފަސް މިނެޓް ފަހުން މެޗުގެ 78 ވަނަ މިނެޓްގައި ޔުނައިޓެޑްގެ ޒުވާން ޑިފެންޑާ ކޮބީ މައިނޫއަށް ހެދުނު ގޯހެއްގެ ފައިދާ ނަގައި ވެސްޓް ހޭމްގެ ދެވަނަ ލަނޑު ޖަހައިދިނީ މުހަންމަދު ކުޑޫސްއެވެ. ކުޑޫސްވަނީ ވެސްޓް ހޭމް އެންމެ ފަހުން އަމިއްލަ ދަނޑުގައި ކުޅުނު ތިން މެޗުގައި ވެސް ލަނޑު ޖަހައިދީފައެވެ.
މެޗުގައި ޔުނައިޓެޑަށް ޔުނައިޓެޑުން ގިނައިރު ބޯޅަ ގެންގުޅުނު ނަމަވެސް މާ ރަނގަޅު ކުޅުމެއް ދެއްކިފައެއް ނުވެއެވެ.
މި ނަތީޖާއާ އެކު ވެސްޓް ހޭމްއިން މިހާރު ވަނީ މިހާތަނަށް ކުޅުނު 18 މެޗުން ހޯދި 30 ޕޮއިންޓާ އެކު ޔުނައިޓެޑް ފަހަތަށް ޖައްސައިލާ ތާވަލުގެ ހަވަނައަށް ކުރިއަށް ޖެހިލައިފައެވެ. ޔުނައިޓެޑް އެންމެ ފަހުން ކުޅުނު ފަސް މެޗުގެ ތެރެއިން މޮޅުވެފައިވަނީ އެންމެ މެޗަކުންނެވެ. އަދި، މި ސީޒަންގައި ހުރިހާ މުބާރާތްތަކެއް ހިމެނޭގޮތަށް ބަލައިފިނަމަ ޔުނައިޓެޑް މޮޅުވި ވަރަށް ވުރެ ބަލިވެފައިވާ މެޗުތައް ގިނައެވެ. މި މެޗުން ބަލިވުމުން ޔުނައިޓެޑް މިހާރު ވަނީ 28 ޕޮއިންޓާ އެކު ތާވަލުގެ އަށްވަނައަށް ފަހަތަށް ސޮއްސާލައިފައެވެ.