ރައްޔިތުންގެ މަޖިލީހުގެ އިހަވަންދޫ ދާއިރާގެ އެމްޑީޕީ މެންބަރު މުޙައްމަދު ޝިފާއުއަށް މަރުގެ އިންޒާރުދީފައިވާ ކަމަށް އެ ޕާޓީން ބުނެފިއެވެ.
އެމްޑީޕީން މިރޭ ނެރުނު ނޫސް ބަޔާނެއްގައިވަނީ މެމްބަރުން ހާމަކުރައްވާ ހިޔާލުތަކާއި، މަޖިލީހުގައި ކުރައްވާ މަސައްކަތްތަކާ ގުޅިގެން މަރުގެ އިންޒާރުދިނުން އެ ޕާޓީން ކުށްވެރިކުރާ ކަމަށެވެ.
އެ މައްސަލަ ބަލައި ތަހުގީގުކޮށް ފިޔަވަޅު އެޅުމަށް ވެސް އެމްޑީޕީން ވަނީ ފުލުުންނަށް ގޮވައިލައިފައެވެ.
"ރައްޔިތުންގެ މަޖިލީހުގައި ސިޔާސީ އިދިކޮޅު ޕާޓީއަކުން ކުރާނެ އެންމެ މާތް އެއް ޒިންމާއަކީ ސަރުކާރު ޖަވާބުދާރީކުރުވުން ކަމުގައިވީހިނދު, އެ ދުސްތޫރީ ޒިންމާއަދާކުރުމުން މަރުގެ އިންޒާރުދީ އެފަދަ ލާއިންސާނީ ކުށެއްގެ ޝިކާރައަކަށް ރައްޔިތުންގެ މަޖިލީހުގެ މެމްބަރުން ވެގެން ދިއުމަކީ ދިވެހިރައްޔިތުންގެ ޑިމޮކްރެޓިކް ޕާޓީން ނުހަނު ކަންބޮޑުވާކަމެކެވެ." އެ ބަޔާނުގައިވެއެވެ.
ރާއްޔިތުންގެ މަޖިލީހުގެ މެންބަރުންނަކީ ގާނޫނީ ގޮތުން ސަލާމަތާ ރައްކާތެރިކަން ފޯރުކޮށްދެން ޖެހޭ ބަޔެއްކަން ފާހަގަކޮށް، މަޖިލީހުގެ ހުރިހާ މެންބަރުންގެ ރައްކާތެރިކަން ކަށަވަރުކޮށްދިނުމަށް ސަލާމަތީ ޚިދުމަތްތަކަށްވެސް އެ ޕާޓީން ގޮވާލާކަމަށް ބަޔާނުގައިވެއެވެ.
އެ މައްސަލައާ ގުޅޭ ގޮތުން ފުލުހުންގެ ބަހެއް މިހާތަނަށް ލިބިފައިނުވެއެވެ.
އެ މައްސަލަ ފެންމަތިވެފައި ވަނީ، ރައީސުލްޖުމްހޫރިއްޔާ މަގާމުން ވަކިކުރަން ފަސޭހަވާ ގޮތަށް ރައްޔިތުންގެ މަޖިލީހުގެ ގަވާއިދު އިސްލާހުކުރަން މަޖިލީހުން މިއަދު ފާސްކުރި ފަހުންނެވެ. އޭގެ ތެރެއިން އެއް އިސްލާހު ހުށަހެޅުއްވީ ޝިފާއުއެވެ. އަދި އޭނާ ވަނީ މަޖިލީހުގައި އެންމެ އިސްކަމެއް ދީގެން ކުރަން ޖެހޭ އެންމެ މުހިންމު މަސައްކަތަކީ ރައީސް ޑރ. މުޙައްމަދު މުއިއްޒު އަޒުލުކުރުން ކަމަށް މިއަދު ވިދާޅުވެފައެވެ.