މަސައްކަތްތެރިންގެ ހައްގުތަކާ ބެހޭ "އިންޑަސްޓްރިއަލް ރިލޭޝަންސް" ބިލު، މިއަދު ރައްޔިތުންގެ މަޖިލީހުން ފާސްކޮށްފިއެވެ.
ސަރުކާރުގެ ފަރާތުން މަރަދޫ ދާއިރާގެ މެންބަރު އިބްރާހީމް ޝަރީފް މި ބިލު ހުށަހަޅާފައި ވަނީ މި އަހަރުގެ މާޗު މަހުގެ 19 ވަނަ ދުވަހުއެވެ.
މި ބިލާ ގުޅޭގޮތުން ބަހުސްކުރުމަށް ވެސް މީގެ ކުރިން ފަސް ޖަލްސާއެއްގައި އެޖެންޑާކުރިއެވެ. ނަމަވެސް ވޯޓާ ހަމައަށް ނުގޮސް ދިގުދެމިގެން ދިޔުމުން ގިނަ ބަޔަކު ވަނީ ކަންބޮޑުވުން ފާޅުކޮށްފައެވެ.
މި ބިލަކީ މިއޮތް ހުރިހާ ދުވަހު މަސައްކަތްތެރިންގެ ހައްގުތައް ރައްކާތެރިކުރާނެ ޚާއްސަ ގާނޫނެއް ނެތި އޮތުމަށް ފަހު އެކުލަވައިލި ގާނޫނެކެވެ. މި ބިލާ އެކު މަސައްކަތްތެރިންގެ ހައްގުތައް ރައްކާތެރިކުރެވިގެން ދާނެއެވެ.
މިއަދުގެ ޖަލްސާގައި 68 މެންބަރުންގެ އިއްތިފާގުން މި ބިލު ވަނީ ފާސްކޮށްފައެވެ.
މި ބިލު ހުށަހަޅާފައި ވަނީ ގާނޫނު އަސާސީން ކަށަވަރުކޮށްދީފައިވާ މަސައްކަތްތެރިންގެ ޖަމިއްޔާތައް އުފެއްދުމާއި އެފަދަ ޖަމުއިއްތާތަކުން ހިންގާ ހަރަކާތްތަކުގައި ބައިވެރިވުމާއި ނުވުމުގެ ހައްގު ކުރިއަރުވައި، ކަށަވަރު ކޮށްދިނުމަށެވެ.
މި ބިލު ހުށަހަޅާފައިވަނީ:
- މަސައްކަތްތެރިންގެ ޖަމުއިއްޔާތަކުން ހިންގާ ހަރަކާތްތަކުގައި ބައިވެރިވުމުގެ ހައްގު ކަށަވަރުކޮށް، އެ ހައްގު ލިބިދެވޭނެ ދާއިރާތައް އެކަށައެޅުމަށް
- މަސައްކަތްތެރިންގެ ޓްރޭޑް ޔޫނިއަންތަކާއި ވަޒީފާދޭ ފަރާތްތަކުގެ ޔޫނިއަންތައް އުފައްދައި، އެ ޔޫނިއަންތައް ހިންގުމާ ގުޅޭ އުސޫލުތައް ގާއިމުކުރުމަށް
ބިލުގައި ބުނެފައި ވަނީ އިންޑަސްޓްރިއަލް ރިލޭޝަންސްއާ ބެހޭ ގާނޫނު ވުޖޫދުވުމާ އެކު މަސައްކަތްތެރިންނާ ވަޒީފާދޭ ފަރާތްތަކާ ދެމެދު އުފެދޭ ދެބަސްވުންތަކާއި މައްސަލަތައް މަޝްވަރާގެ އުސޫލުން ހައްލު ކުރުމުގެ ހަރުދަނާ ނިޒާމެއް ގާއިމުވާނެ ކަމަށެވެ.
އަދި، މަސައްކަތްތެރިންނަށް ގާނޫނުން ލިބިދޭ ހައްގުތައް ހިފެހެއްޓޭ ހާލަތުގައި އެފަދަ އަމަލުތަކަށް ޒިންމާވާ ފަރާތްތައް ޖަވާބުދާރީ ކުރެވޭނެ ނިޒާމެއް ވެސް އެކަށައެޅިފައިވާ ކަމަށް ވެސް އެ ބިލްގައިވެއެވެ.