ޒާމާންތަކެއް ވަންދެން ދަތުރުކުރި ބަހާދަރު ބޯޓު ފަރަށް އަރައިފި

ޒަމާންތަކެއް ވަންދެން ބޯޓް ދަތުރުކުރަމުންއައި ހދ. ކުޅުދުއްފުށީ ބަހާދަރު ބޯޓް ފަރަށް އަރައިފިއެވެ.

އެމްއެންޑީއެފްއިން މައުލޫމާތު ދިންގޮތުގައި، މި ބޯޓް ފަރަށް އެރީ، މާލެއިން ފުރައިގެން ކުޅުދުއްފުއްޓަށް ދަތުރުކުރަމުން ދަނިކޮށް ނ. ދެކަންފަރު ކައިރިންނެވެ. އެ ބޯޓު ފަރަށް އަރައިގެން އުޅޭ ކަމުގެ މަޢުލޫމާތު ލިބުނީ ރޭ ދަންވަރު 02:30ގައި ކަމަށް ސިފައިން ބުންޏެވެ.

އޭރު ބޯޓުގެ 10 ފަޅުވެރިންނާއި، ހަ އަންހެނުންނާއި، ހަ ކުޑަކުދިން ހިމެނޭހެން ޖުމްލަ 58 މީހުން ތިބި ކަމަށް އެމްއެންޑީއެފްއިން ބުންޏެވެ.

އެ ބޯޓުގައި ތިބި މީހުންގެ ތެރެއިން 17 މީހުން ހާބަކްރާފްޓަށް ނަގައިގެން ހެނދުނު 06:08 ހާއިރު ވަނީ ށ. ކޮމަންޑޫއަށް ގެންގޮސްފައެވެ.

އެ ބޯޓުގައި މިހާރު 10 ފަޅުވެރިން މަޑުކޮށްގެން ތިބިއިރު، ބާކީ 31 މީހުން، "ފްލަޔިން ފިޝް 17" ނަކަމަށް ކިޔާ ދޯންޏެއްގައި ކުޅުދުއްފުއްޓަށް ގެންދިޔުމަށް ދަތުރުކުރަމުންދާ ކަމަށް އެމްއެންޑީއެފުން ބުންޏެވެ.

އެ ބޯޓު ފުންކުރުމުގެ މަސައްކަތް މިހާރު ދަނީ ކުރަމުންނެވެ.