ރައްޔިތުންގެ މަޖިލީހުގެ މި ހިނގާ ތިންވަނަ ދައުރު އަނެއްކާ ވެސް މި މަހު 18ގެ ނިޔަލަށް ދަންމައިލަން މަޖިލީހުގެ ރައީސް މުހައްމަދު އަސްލަމް ހުށަހަޅުއްވައިފިއެވެ.
މަޖިލީހުގައި ބަޖެޓުގެ މަސައްކަތް ހިމެނޭހެން މުހިއްމު ގިނަ މައްސަލަތަކެއް ހުރިކަން ފާހަގަކޮށް މިދިޔަ މަހުގެ 27 ގައި ވަނީ މި ދައުރު މާދަމާގެ ނިޔަލަށް ދަންމައިލަން ފާސްކޮށްފައެވެ.
މިއަދު އޮތް މަޖިލީހުގެ މި ދައުރުގެ 33 ވަނަ ޖަލްސާ ފައްޓަވަމުން ރިޔާސަތުގައި އިންނެވި އަސްލަމް ވިދާޅުވީ، ކުރިން ދައުރަށް އިތުރުކުރި މުއްދަތު މާދަމައަށް ހަމަވާއިރު އަދިވެސް މުހިއްމު ބައެއް މަސައްކަތްތައް ނުނިމޭ ކަމަށެވެ.
އެހެންވެ، މި ދައުރު މި މަހުގެ 18ގެ ނިޔަލަށް އިތުރުކުރަން އަސްލަމް ވަނީ ހުށަހަޅުއްވައިފައެވެ.
"އަޅުގަނޑު ގަސްތުކުރަނީ ރައްޔިތުންގެ މަޖިލީހުގެ 24 ވަނަ މާއްދާގައި ބަޔާންކުރާ މަޖިލީހުގެ މި ހިނގާ ތިންވަނަ ދައުރު 18 ޑިސެމްބަރު 2023 ގެ ނިޔަލަށް އިތުރުކުރުމާ މެދު ވޯޓަށް އެހުމަށް. އެހެންކަމުން މިއަދުގެ ވޯޓު ގަޑީގައި ވޯޓަށް އެހުން އޮންނާނެ ވާހަކަ ދަންނަވަން،" އަސްލަމް ވިދާޅުވިއެވެ.
މަޖިލީހުގެ މި ހިނގާ ތިންވަނަ ދައުރުގެ ބޮޑު ބައެއް ހޭދަވީ އެމްޑީޕީން ހުށަހެޅި މަޖިލީހުގެ ކުރީގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލައިގެ ތެރެއިން އުފެދުނު އަރައިރުންވުމުގައެވެ.
މަޖިލީހުގެ ގަވާއިދުގެ އެކިއެކި މާއްދާތައް ނަންގަވައިގެން މަޖިލީސް ހުއްޓުވާފައި އެތައް ދުވަހެއް ވަންދެން ބޭއްވިއެވެ. އެންމެ ފަހުން، އެމްޑީޕީން އެ މައްސަލަ ސުޕްރީމް ކޯޓަށް ހުށަހެޅުމުން، ސުޕްރީމް ކޯޓުން ވަނީ މަޖިލީސް ހުއްޓުވާފައި އޮތީ ގާނޫނާ ހިލާފަށް ކަމަށް ހުކުމް ކޮށްފައެވެ.
ކޯޓުގެ ހުކުމާ އެކު އަނެއްކާ ވެސް މަޖިލީސް ހިނގައިގަތުމުން ނަޝީދު ވަނީ އަމިއްލަފުޅަށް މަޖިލީހުގެ ރައީސްކަމުން އިސްތިއުފާ ދެއްވައިފައެވެ.