ރައްޔިތުންގެ މަޖިލީހުގެ މައްޗަންގޮޅި އުތުރު ދާއިރާގެ މެންބަރުކަމަށް ވާދަކުރައްވަން ކުރީގެ ޕްރޮސެކިއުޓާ ޖެނެރަލް އަހްމަދު މުއިއްޒު މިއަދު ނިންމަވައިފިއެވެ.
މި ނިންމެވުމާ ގުޅިގެން "ސަން"އާ ވާހަކަ ދައްކަވަމުން އޭނާ ވިދާޅުވީ، އޭނާ ނިސްބަތްވެ ވަޑައިގަންނަވާ ދާއިރާއަށް ކުރިމަތިލުމަށް ނިންމެވީ، ސަރުކާރު ޖަވާބުދާރީ ކުރުވައި ރައްޔިތުންނާ ވީހާވެސް ގާތުން މަސައްކަތް ކުރުމަށްޓަކާ ކަމަށެވެ.
އަދި، އޭނާ މަސައްކަތް ކުރާނީ ރައްޔިތުންނަށް ލާބައާއި މަންފާ ލިބޭނެ ގޮތަށް ކަމަށް އޭނަ ވިދާޅުވިއެވެ.
މިވަގުތު މައްޗަންގޮޅި އުތުރު ދާއިރާގެ މެންބަރުކަން ކުރައްވަނީ މުހައްމަދު ރަޝީދު (ބޯދިގު)އެވެ.
މުއިއްޒަކީ ގާނޫނީ ދާއިރާގައި ގިނަ މަސައްކަތްތަކެއް ކުރައްވާފައިވާ ބޭފުޅެކެވެ. އެގޮތުން ނޫ ގާނޫނު އަސަސީ އާއި ފެހި ގާނުނު އަސާސީ އެކުލަވާލުމުގައި ވެސް އަމަލީ ގޮތުން ބައިވެރިވެ މަސައްކަތް ކުރެއްވި ބޭފުޅެކެވެ. އަދި ރައްޔިތުންގެ ހާއްސަ މަޖިލީހުގައި ވެސް މުއިއްޒު ވަނީ މަސައްކަތް ކުރައްވާފައެވެ.