މޫސުން ގޯސްވެ، އެޅި ގުގުރިއަކާއެކު ހުޅުމާލޭގެ ބައެއް ސަރަހައްދުތަކުން މިރޭ ކަރަންޓު ކެނޑިއްޖެއެވެ.
މައުލޫމާތު ލިބޭ ގޮތުގައި ކަރަންޓު ކެނޑިފައިވަނީ ހުޅުމާލެ ދެވަނަ ފިޔަވަހީގެ ބައެއް ޓަވަރުތަކުންނެވެ. އޭގެ ތެރޭގައި ޓަވަރު ނުވައެއް ހިމެނެއެވެ. އަދި އިތުުރު ޓަވަރަކުން ވެސް ވަނީ ކަރަންޓު ކެނޑިފައެވެ. އޭގެ ތެރެއިން އެއް ޓަވަރަށް މިހާރުވަނީ ކަރަންޓު އައިސްފައެވެ.
މީގެ އިތުރުން ވެސް ފުރަތަމަ ފިޔަވަހީގެ ބައެއް ސަރަހައްދުތަކުން ވެސް ކަރަންޓު ވަނީ ކެނޑިފައެވެ.
ކަރަންޓު ކެނޑުން ފިޔަވައި، ޓްރާންސްފޯމަރަކަށް ނުވަތަ ޖެނެރޭޓަރަކަށް ގެއްލުންވުންފަދަ އިތުރު ގެއްލުމެއް ލިބިފައިވާކަމުގެ މައުލޫމާތެއް މިހާތަނަށް އަދި ނުލިބެއެވެ.
ސްޓެލްކޯގެ ރަސްމީ ބަހެއް މިކަމުގައި ލިބޭގޮތެއް ނުވެއެވެ.
މޫސުން ގޯސްވެ ގުގުރާ ފަހަރުތަކުގައި މީގެ ކުރިން ވެސް ހުޅުމާލޭގެ ބައެއް ސަރަހައްދުތަކުން ކަރަންޓު ކެނޑިފައި އެބަހުއްޓެވެ.
މޫސުމާ ބެހޭ ގައުމީ އިދާރާއިން ވަނީ ދަންވަރު 02:00އާ ހަމައަށް ކ.އަތޮޅުން ފެށިގެން ދ. އަތޮޅާ ދެމެދުގެ ސަރަހައްދަށް ހުދު ސަމާލު ނެރެފައެވެ. އަދި ގުގުރުމާއެކު ބޯކޮށް ވާރޭ ވެހޭނެކަމަށް ވެސް ލަފާކޮށްފައެވެ.
ކަނޑުތައް އާދައިގެ ވަރަކަށް މަޑު ނަމަވެސް ވިލާގަނޑުގައި އާދައިގެ ވަރަކަށް ގަދަވާނެ ކަމަށް އެ އިދާރާއިން ލަފާކުރެއެވެ.