ކުރީގެ ރައީސް އިބްރާހީމް މުޙައްމަދު ޞާލިޙް އުފެއްދެވި އިންތިގާލީ އިންސާފުގެ އޮފީހުގެ މުއްދަތް ހަމަވުމުން އެ އޮފީހުގެ ލިޔެކިޔުންތައް ފިނޭންސް މިނިސްޓްރީއާ ހަވާލުކުރަން އަންގައިފިއެވެ.
އިންތިގާލީ އިންސާފުގެ އޮފީހުން ކުރި އިއުލާނެއްގައި ބުނެފައިވަނީ، އެ އޮފީހުގެ މުއްދަތު ހަމަވެފައިވަނީ އިއްޔެ ކަމަށެވެ. އެހެން ކަމުން، އެ އޮފީސް އުވިގެންދާއިރު، ހުރިހާ ހަރުމުދަލަކާއި ލިޔެކިޔުންތައް ފިނޭންސާ ހަވާލުކުރަން އަންގާފައިވާ ކަމަށެވެ.
ބޮޑު ހޭދައެއް ކޮށްފައިވާ އެ އޮފީހުގެ މުއްދަތު އިއްޔެ ހަމަވެފައިވާ އިރު، ނުބަލާ ގިނަ މައްސަލަތަކެއް އަދިވެސް އެބަހުއްޓެވެ.
ކޮރަޕްޝަންގެ މައްސަލައެއްގެ ތަހުގީގަށް މިދިޔަ ހަފުތާގައި، އެންޓި ކޮރަޕްޝަން ކޮމިޝަން (އޭސީސީ) އިން ވެސް ވަނީ އެ އޮފީހަށް ވަދެފައެވެ. އެ ތަހުގީގަށް އިންތިގާލީ އޮފީހުން އެއްބާރުލުން ދީފައި ނުވާ ކަމަށް އޭސީސީއިން ބުންޏެވެ.
މިމަހުގެ 13 ވަނަ ދުވަހު އެ އޮފީހުގެ އޮމްބަޑްސްޕާސަން ޖިހާދާ އަނީސް ވަނީ އިސްތިއުފާ ދެއްވާފައެވެ. އޭނާ ވަނީ އެ އޮފީހުގެ ހިންގުމުގައި ހުރި މައްސަލަތަކެއް ފެންމަތި ކުރައްވައިފައެވެ.
އިންތިގާލީ އިންސާފުގެ އޮފީސް ކުރީގެ ރައީސް ޞާލިޙް އުފެއްދެވީ 2020 ވަނަ އަހަރުގެ ޑިސެމްބަރު 17 ގައެވެ. މި އޮފީސް އުފެއްދީ 1953 ވަނަ އަހަރުގެ ޖަނަވަރީ 1 އިން ފެށިގެން، އިންސާނީ ހައްގުތަކާއި އަސާސީ މިނިވަންކަމަށް އަރައިގަނެ ހިންގާފައިވާ ކަންކަމަށް އިންސާފު ހޯދައިދިނުމަށްޓަކައެވެ. ނަމަވެސް ކޮމިޝަން އުވިގެން ދިޔައިރު ވެސް އެކަމެއް ކުރެވިފައެއް ނުވެއެވެ.