އިންތިޚާބީ ރައީސް ޑރ. މުހައްމަދު މުއިއްޒު ހުވާ ކުރައްވާ ޖަލްސާއަށް ލަންކާގެ ރައީސް ރަނިލް ވިކްރަމްސިންހަ މިރޭ ރާއްޖެ ވަޑައިގަތުމަށް ފަހު، ރައީސް އިބްރާހީމް މުޙައްމަދު ޞާލިޙާ ބައްދަލުކުރައްވައިފިއެވެ.
އެ މަނިކުފާނަށް ވެލާނާ އިންޓަނޭޝަނަލް އެއާޕޯޓުން މަރުހަބާ ދެންނެވީ ފޮރިން މިނިސްޓަރު ޢަބްދުﷲ ޝާހިދެވެ.
މާލެ ވަޑައިގެން، ރައީސް އޮފީހުގައި ރައީސް ޞާލިޙާ ބައްދަލުކުރައްވައި ދެ ބޭފުޅުން ވަނީ ލަންކާގެ މިހާރުގެ ހާލަތާއި، އެގައުމުން މިހާރު އިގުތިސާދީ އަނދަވަޅުން އަރައިގަތުމަށް ކުރަމުންދާ މަސައްކަތްތަކާ ބެހޭ ގޮތުން ފުޅާ ދާއިރާއެއްގައި ވާހަކަފުޅު ދައްކަވާފައެވެ. އަދި ލަންކާގެ އިގުތިސާދު ފުޅާކުރުމަށް ކުރަން ރާވާފައިވާ ކަންތައްތަކާ ބެހޭ ގޮތުން ވެސް ދެ ބޭފުޅުން ވާހަކަދެއްކެވިއެވެ.
އެ މަނިކުފާނަށް ވެލާނާ އިންޓަނޭޝަނަލް އެއާޕޯޓުން މަރުހަބާ ދެންނެވީ ފޮރިން މިނިސްޓަރު ޢަބްދުﷲ ޝާހިދު --މީގެ އިތުރުން ރައީސް ޞާލިޙް ވަނީ، ލަންކާއާއި ރާއްޖޭގެ ގުޅުން ވަރުގަދަ ކުރުމަށް ރަނިލް ކުރެއްވި މަސައްކަތްތައް ފާހަގަކުރައްވައި ޝުކުރު އަދާކުރައްވާފައެވެ. އަދި ރަނިލް ވަނީ، ލަންކާއަށް ބޭނުން ޖެހުނު ހާލަތުގައި ރާއްޖެއިން ވެދިން އެހީއަށް ޝުކުރު އަދާކުރައްވާފައެވެ.
މުއިއްޒުގެ ހުވާކުރެއްވުމުގެ ރަސްމިއްޔާތަށް އެހެން ގައުމުތަކުގެ މަންދޫބުން މިހާރު އަންނަނީ ވަޑައިގަންނަވަމުންނެވެ.
އެގޮތުން ރަސްމިއްޔާތަށް އެރުވި ދައުވަތު ގަބޫލު ކުރައްވާ އިއްޔެ އެންމެ ފުރަތަމަ ރާއްޖެ ވަޑައިގަތީ ޗައިނާގެ ރައީސް ޝީ ޖިޕިންގެ ހާއްސަ މަންދޫބު އަދި ސްޓޭޓް ކައުންސިލަރު، ޝެން ޔިޗިން އެވެ.
އިންޑިއާއިން ހުވާ ކުރެއްވުމުގެ ރަސްމިއްޔާތުގައި ބައިވެރިވުމަށް ވަޑައިގަތީ އެ ގައުމުގެ އާތު ސައިންސް މިނިސްޓަރު ކިރެން ރިޖީޖޫއެވެ.
ސީޝެލްސްއިން އެގައުމުގެ ނައިބު ރައީސް އަހުމަދު އަފީފް ރާއްޖެ ވަޑައިގެންފައިވާއިރު، ދެކުނު ކޮރެއާގެ ރައީސްގެ ހާއްސަ މަންދޫބު އަދި ބުސާން ސިޓީގެ މޭޔަރު ޕާކް ހިއުޖޫން ވެސް ވަޑައިގެންފައެވެ.
ޖަޕާނުގެ ބޮޑުވަޒީރުގެ ހާއްސަ މަންދޫބު އަދި ފޮރިން މިނިސްޓްރީގެ ނައިބު ކޮމުރާ މަސައިއޯ ވެސް ވަނީ މި ރަސްމިއްޔާތަށް ރާއްޖެ ވަޑައިގެންފައިވެއެވެ.
ރައްޔިތުންގެ މަޖިލިހުގެ އިދާރާއިން މިއަދު ބުނި ގޮތުގައި، ހުވާ ކުރެއްވުމުގެ ރަސްމިއްޔާތަށް ދައުވަތު އަރުވައިގެން 46 ގައުމަކުން ގިނަ އަދަދެއްގެ މަންދޫބުން ރާއްޖެ ވަޑައިގަންނަވާނެއެވެ.
އިންތިޚާބީ ރައީސް ހުވާ ކުރެއްވުމުގެ ރަސްމިއްޔާތަށް އަވަށްޓެރި އަދި ގާތް ގައުމުތަކުގެ މަންދޫބުންނާއި އިސްވެރިން ރާއްޖެ ވަޑައިގަންނަން ފައްޓަވާފައިވާއިރު، ރަސްމިއްޔާތުގެ އެންމެ ފަހުގެ ތައްޔާރީތައް ދަނީ ކުރަމުންނެވެެ.