އެންޓި ކޮރަޕްޝަން ކޮމިޝަން (އޭސީސީ)ގެ ތަހުޤީގަށް އެއްބާރުލުންދިން އިންތިގާލީ އިންސާފުގެ އޮފީހުގެ ތިން މުވައްޒަފުން ސަސްޕެންޓް ކުރުން އެ ކޮމިޝަނުން މިއަދު ކުށްވެރި ކޮށްފިއެވެ.
އިންތިގާލީ އިންސާފުގެ އޮފީހަށް އޭސިީސީގެ ޓީމަކުން ވަދެފައިވަނީ އިއްޔެ މެންދުރުގެ ވަގުތެެއްގައެވެ.
މި މައްސަލައާ ގުޅިގެން އޭސީސީއިން މިއަދު ނެރުނު ބަޔާނެއްގައި ބުނެފައި ވަނީ، އެ ކޮމިޝަނުގެ ތަހުޤީގު ޓީމްތަކަށް އިންތިގާލީ އޮފީހުގެ ބައެއް އިސްވެރިން ހުރަސް އަޅާފައިވާ ކަމަށެވެ. އެހެންނަމަވެސް، އޭސީސީގެ ތަހުގީގަށް އެ އޮފީހުގެ ތިން މުވައްޒަފަކު އެހީތެރިވެދިން ކަމަށް ކޮމިޝަނުން ބުންޏެވެ. އޭސީސީއިން ވަނީ އެހީތެރިވެ ދިން ކަމަށް ޓަކައި އެ ތިން މުވައްޒަފުންނަށް ޝުކުރު އަދާކޮށްފައެވެ.
އިންތިގާލީ އިންސާފުގެ އޮފީހުން ވަނީ، ތަހުގީގަށް އެއްބާރުލުން ދިން ތިން މުވައްޒަފުންނަށް ހުރަސްއެޅުމުގެ އިތުރުން، މުވައްޒަފުންނަށް ދީފައިވާ ބައެއް އެކްސެސްތައް ވެސް ކަނޑާލައިފައި ކަމަށް އޭސީސީއިން ބުންޏެވެ. މީގެއިތުރުން، އެ މުވައްޒަފުން ވަޒީފާގެ މަސްއޫލިއްޔަތުން ސަސްޕެންޑް ކޮށްފައިވާ ކަމަށާއި އެކަން ކުށްވެރި ކުރާ ކަމަށް އޭސީސީއިން ބުންޏެވެ.
އެނގިފައިވާ ގޮތުގައި އޮމްބަޑްސްޕާސަންގެ އިސްވެރިން ވަނީ އޭސީސީގެ އޮފިޝަލުންނަށް އެއްބާރުލުން ނުދިނުމަށް އެ އޮފީހުގެ މުވައްޒަފުންނަށް އަންގައިފައެވެ. އެގޮތުން އޮފީހުގެ ބައެއް ކޮޓަރިތަކަށް ވަނަ ނުދިނުމަށް އެ ތަންތަނުގެ ތަޅު ހުޅުވައި ނުދިނުމަށް ވެސް ވަނީ އަންގައިފައެވެ.
އޭސީސީގެ ތަހުގީގު ޓީމުން އެ އޮފީހަށް ގޮސް ތަހުގީގު ކުރުމުގައި އެ އޮފީހުން އާއްމުންނަށް ދެމުންދިޔަ ޙިދުމަތަށް ބުރޫއަރާނެ ފަދަ އެއްވެސް އަމަލެއް ކޮށްފައި ނުވާނެ ކަމަށް އެ ކޮމިޝަނުން ބުންޏެވެ.
އެ ކޮމިޝަނުން ބުނީ، އެ ކޮމިޝަނުން މަސައްކަތް ކުރަމުން އަންނަނީ ގާނޫނުގައި ބުނެފައިވާ ގޮތުގެ މަތިން ކަމަށެވެ. އަދި އެގޮތަށް މަސައްކަތް ކުރުމުގައި ދެމި ހުންނާނެ ކަމަށް ވެސް ބުންޏެވެ.
މީގެ އިތުރުން ކޮރަޕްޝަންގެ އަމަލުތައް ހުއްޓުވުމަށާއި އެފަދަ މައްސަލަތައް ތަހުގީގު ކުރުމަށް އެ ކޮމިޝަނުން ކުރަމުންދާ މަސައްކަތައް ހުރަސްއަޅާ ނަމަ ގާނޫނުގެ އިމުގެ ތެރެއިން އެ ކޮމިޝަނަށް އެޅެން ހުރި ފިޔަވަޅުތައް އަޅާނެ ކަމަށް ވެސް އޭސީސީއިން ބުންޏެވެ.