އދ. މަހިބަދޫ ކައިރީ އޮންނަ މާފަރުފަޅު ހިއްކައި، މަހިބަދޫ ރައްޔިތުން އާބާދުކުރުމަށް ތަރައްގީ ކުރަން ރައީސް އިބްރާހީމް މުޙައްމަދު ޞާލިޙް ކަނޑައަޅުއްވައިފިއެވެ.
ރައީސް އޮފީހުގެ ތަރުޖަމާނު މިއުވާން މުޙައްމަދު މީޑިއާތަކާ ހިއްސާކުރެއްވި މެސެޖެއްގައިވާ ގޮތުން، މާފަރުފަޅު ހިއްކަނީ މަހިބަދޫ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަަލައަށް ހައްލެއް ހޯދައިދިނުމުގެ ގޮތުންނެވެ.
މިދިޔަ ސެޕްޓެމްބަރު މަހު ބޭއްވި ރިޔާސީ އިންތިޚާބަށް ކުރެއްވި ކެމްޕޭން ތެރޭގައި ރައީސް ވަނީ، މާފަރުފަޅު ހިއްކައި، އެ ތަން މަހިބަދޫއާ އެއްކޮށް، އެއީ އެ ރަށުގެ ބަޔަކަށް ހަމަޖައްސައިދެއްވާނެ ކަމަށް ވައުދުވެވަޑައިގެންފައެވެ.
މީގެ އިތުރުން އިންތިޚާބީ ރައީސް ޑރ. މުޙައްމަދު މުއިއްޒު ވެސް ވަނީ އެފަދަ ވައުދެއްވެވަޑައިގެންފައެވެ. އެ މަނިކުފާނު ވިދާޅުވީ މަހިބަދުއިން ގޯތި ދޫނުކުރާތާ 38 އަހަރުވެފައިވާ ކަމަށާއި ގޯތި ދޫނުރެވި އޮތީ ރަށުގައި ބިން ނެތުމުގެ ސަބަބުން ކަމަށް ވިދާޅުވެފައެވެ.
އެހެންވެ، މާފަރުފަޅު މަހިބަދޫގެ އިހްތިސާސްގެ ތެރޭގައި ހިމަނައި އެ ތަނުގައި ގެދޮރުވެރިކަމުގެ މަޝްރޫތަކާއި އެހެން މަޝްރޫތައް ވެސް ހިންގަވައިދެއްވާނެކަމަށް މުއިއްޒު ވިދާޅުވެފައިވެއެވެ.
ބޯހިޔާވެހިކަމުގެ މައްސަލައަކީ ވަރަށް ގިނަ ރަށްތަކުގައި ބޮޑުވެފައިވާ މައްސަލައެކެވެ. އޭގެ ސަބަބުން ސަރުކާރުން އަންނަނީ މި މައްސަލައަށް ދާއިމީ ހައްލެއް ހޯދައިދިނުމަށް ބިން ހިއްކައި، ގޯއްޗާއި ފްލެޓު ދޫކުރުމުގެ ގިނަ މަޝްރޫއުތަކެއް ހިންގަމުންނެވެ.