އދ. މަހިބަދޫ ކައިރީގައި އޮންނަ މާފަރުފަޅު މި ރަށުގެ އިހްތިޞާސްގެ ތެރޭގައި ހިމަނައިދީ އެ ތަނުގައި ގެދޮރުވެރިކަމުގެ މަޝްރޫތަކާއި އެހެން މަޝްރޫތައް ވެސް ހިންގަވައިދެއްވާނެކަމަށް ޕީޕީއެމް، ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެެެެެއެވެ.
އަތޮޅުތެރެއަށް ތާއީދު ހޯއްދެވުމަށް ކުރައްވާ ދަތުރުުގައި މުއިއްޒު ވަނީ މިރޭ މަހިބަދޫއަށް ވަޑައިގެންފައެވެ.
މި ރަށަށް ވަޑައިގެން ވާހަކަ ދައްކަވަމުން މުއިއްޒު ވިދާޅުވީ މި ރަށުން ގޯތި ދޫނުކުރާތާ 38 އަހަރުވެފައިވާކަމަށާއި އެ ކަމުގެ ސަބަބުން ގެދޮރުގެ މައްސަލަ އޮތީ ހައްލުނުވެ ކަމަށެވެ. އޭނާ ވިދާޅުވި ގޮތުގައި ގޯތި ނުދެވި އޮތީ ވެސް ރަށުގައި ޖާގަ ނެތުމުންނެވެ.
ޑރ، މުއިއްޒު މަހިބަދޫ ސަޕޯޓާރުންނާ ސަލާންކުރައްވަނީ --
މުއިއްޒު ވިދާޅުވީ ގައުމުގެ މިނިވަންކަން ހިމާޔަތްކުރުމަށްފަހު އޭނާގެ އެންމެ މުހިންމު ސިޔާސަތަކީ ބޯހިޔާވަހިކަން ކަމަށެވެ. އެ ގޮތުން، މި ރަށުގެ ބޯހިޔާވަހިކަމުގެ މައްސަލަ ހައްލުކުރަން މިހާރު ދެ ކަމެއް ކުރެވިދާނެކަމަށް އޭނާ ވިދާޅުވިއެވެ.
"އެއްކަމަކީ މިހާރު ހުރި އިމާރާތްތަކުގެ ތެރެއިން ބާވެ ތަޅައިލަން ޖެހިފައިވާ އިމާރާތެއް ހުރިއްޔާ، މިސާލަކަށް އެނގޭތޯ. އެކަހަލަ ތަނެއް ހުސްކޮށްފައި ހައުސިން ޔުނިޓް އެޅުން،" މުއިއްޒު ވިދާޅުވިއެވެ.
އެ ފަދަ އިމާރާތްތައް ހުރި ނަަމަ ތަޅައިލާ މިހާރު ރަށުގައި އޮތް ބިމުން ވެސް ހިންގެން އޮތް އެންމެ ފުޅާމިނެއްގައި ހައުސިން ޕްރޮޖެކްޓެއް ވަރަށް އިސްކަން ދީގެން ކުރިއަށް ގެންގޮސްދެއްވާނެކަމަށް މުއިއްޒު ވިދާޅުވިއެވެ.
ދެވަނަ ކަމަކަށް މުއިއްޒު ވިދާޅުވީ މި ރަށުގެ ބިން އިތުރުކުރަން ޖެހޭ ކަމަށެވެ. އެ ގޮތުން މި ރަށުގެ ކައިރީގައި ހުރި ފަޅުތަކުގެ ތެރެއިން މާފަރު ފަޅު މި ރަށުގެ އިހްތިޞާސް ތެރެއަށް ވައްދާ ހައުސިން މަޝްރޫތަކަށް ބޭނުންކުރުމަކީ މި ރަށުގެ ރައްޔިތުން ވެސް ބޭނުންވާ ގޮތްކަމަށް ވިދާޅުވިއެވެެ.
"ރަށުގެ އިހްތިސޯސް ތެރެއަށް އެ ބައި ލައިގެން ދުރު ރާސްތާ ޕްލޭނެއްގައި ހިއްކާ ބިން އިތުރުކުރެވި މުޅި އަތޮޅަށް ބޭސްކށް އެ ތަނުގައި ގެދޮރު ބިނާކުރުމާއި އުމްރާނީ ތަރައްގީ، އިގްތިސޯދީ ތަރައްގީގެ މަޝްރޫތަކާއި އިޖުތިމާއީ ބޭނުންތަކަށް ބޭނުންވާ ޖާގައާއި ސިނާއީ ބޭނުންތަކަށް މި ގޮތަށް ރަނގަޅަށް ޕްލޭންކޮށް ޖާގަ ލިބޭ ގޮތަށް އެ ތަން ތަރައްގީކުރެވޭނެ،" މުއިއްޒު ވިދާޅުވިއެވެ.
އޭނާ ދެއްވި ޔަގީންކަމަކީ މާފަރުފަޅު މަހިބަދޫއަށް ދީ ބޯހިޔާވަހިކަމުގެ މަޝްރޫތަކާއި އެހެން ވެސް މަޝްރޫތައް ހިންގަވައިދެއްވާނެ ކަމަށެވެ.
މުއިއްޒު މިރޭ ވިދާޅުވީ މިއީ ރަށްރަށުގެ ތަރައްގީއަށްވުރެ ބޮޑަށް ގައުމުގެ މިނިވަންކަން ދިފާއުކުރުމާ ގުޅިފައިވާ އިންތިހާބެއް ކަމަށެވެ. މިހާރު ޚާރިޖީ ސިޔާސަތު އޮތް ގޮތުން ގައުމުގެ މިނިވަންކަން ކަށަވަރުކުރެވޭނީ ދިވެހީންގެ ރާއްޖެއަކަށް ދާން ނިންމައިގެންކަމަށް އޭނާ ވިދާޅުވިއެވެ.
މީގެ އިތުރުން، މަހިބަދޫއަކީ ފުޓުބޯޅައިގެ ވިދުންގަދަ ރަށެއްކަން ފާހަގަކުރައްވާ މި ރަށުގެ ބޯޅަދަނޑު އިތުރަށް ތަރައްގީކުރައްވާނެކަމަށް މުއިއްޒު ވިދާޅުވިއެވެ.
"ކުޅިވަރަކަށް ސިއްހީ ކަންކަމަކަށް، ތިމާވެއްޓާ ގުޅޭ ކަންކަމަކަށް ނެތް [މި ސަރުކާރުން] ސަމާލުކަން ދީފައެއް. ސްކޫލްތައް ވެސް ހުރީ ވީރާނާ ވެފައި،" އޭނާ ވިދާޅުވިއެވެ.
މި ރަށުގެ ހޮސްޕިޓަލަށް ވެސް އިތުރު ޚިދުމަތްތައް އިތުރުކޮށްދީ މިހާރަށްވުރެ ތަރައްގީކޮށްދެއްވާނެކަމަށް މުއިއްޒު ވިދާޅުވިއެވެ. އަދި ނުހަދައި ހުރި މަގުތައް ރަނގަޅު ފެންވަރަށް ހައްދަވާނެކަމަށް ވެސް ވިދާޅުވިއެވެ.