އިންތިގާލީ އިންސާފުގެ އޮފީހަށް އެންޓި ކޮރަޕްޝަން ކޮމިޝަން (އޭސީސީ)ގެ ޓީމަކުން ވަދެއްޖެއެވެ.
"ސަން" އަށް މައުލޫމާތު ލިބިފައިވާ ގޮތުގައި އެ އޮފީހަށް އެ ކޮމިޝަނުން ވަނީ މީގެ ކުރިން އެ ކޮމިޝަނުން ނިންމި ބައެއް ނިންމުންތައް ބަދަލުކުރާކަމުގެ ތުހުމަތު ކުރެވޭ މައްސަލައެއްގައެވެ.
އޭސީސީން ވެސް ވަނީ އެ ކޮމިޝަނުން އޮމްބަޑްސްޕާސަން އޮފީހުގެ މައްސަލަތަކެއް ތަހުގީގުކުރަމުން އަންނަ ކަމަށް "ސަން"އަށް ބުނެފައެވެ. ނަމަވެސް އެއީ ސީދާ ކޮން މައްސަލައެއްކަމެއް ހާމައެއް ނުކުރެއެވެ.
އެނގިފައިވާ ގޮތުގައި އޮމްބަޑްސްޕާސަންގެ އިސްވެރިން ވަނީ އޭސީސީގެ އޮފިޝަލުންނަށް އެއްބާރުލުން ނުދިނުމަށް އަންގައިފައެވެ. އެގޮތުން އޮފީހުގެ ބައެއް ކޮޓަރިތަކަށް ވަނަ ނުދިނުމަށް އެ ތަންތަނުގެ ތަޅު ހުޅުވައި ނުދިނުމަށް ވެސް ވަނީ އަންގައިފައެވެ.
އޮމްބަޑްސްޕާސަން އޮފީހާމެދު މީގެ ކުރިން ވެސް ތުހުމަތުތަކެއްވަނީ ކުރެވިފައެވެ. އެގޮތުން މީގެ ދެ ދުވަސް ކުރިން އެ އޮފީހުގެ އޮމްބަޑްސްޕާސަން ޖިހާދާ އަނީސް ވަނީ އިސްތިއުފާ ދެއްވައިފައެވެ. އޭނާ ވަނީ އެ އޮފީހުގެ ކަންކަން ހުރި ގޮތާމެދު ގިނަ ކަންބޮޑުވުންތަކެއް ފާޅުކުރައްވައިފައެވެ.
އިއްޔެ، ފުލުހުން ވަނީ އާރްޑީސީއަށް ވެސް ވަދެ، އެ ތަނުން ގިނަ ލިޔެކިޔުންތަކެއް ތަހުގީގު ބޭނުމަށް ގެންގޮސްފައެވެ. ހަމައެއާއެކު ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ މައްސަލަތަކެއްގައި ވެސް ފުލުހުން އެފްއޭއެމް ބިލްޑިންއަށް ވަދެފައިވެއެވެ.
ސަރުކާރު ބަދަލުވުމުގެ ފަހު މަރުހަލާގައި އޮތްއިރު އޭސީސީން އަންނަނީ މި މުއްދަތުގައި އިދާރާތަކާއި ކުންފުނިތަކުން ހިންގާ އަމަލުތަކުގައި ނަހަމަ މަންފާއެއް ހޯދުން ނުވަތަ ކޮރަޕްޝަން ހިމެނޭކަމަށް ބެލެވޭ ކަންކަން ނުކުރުމަށް އަންނަގަމުންނެވެ.