ގޯސް ވާހަކަތަކެއް ފަތުރައިގެން ބާސާއަށް ގެއްލުންދެނީ މީޑިއާއިން: ޒަވީ

ގޯސް ވާހަކަތަކެއް ފަތުރައިގެން ބާސެލޯނާއަށް ގެއްލުންދެނީ މީޑިއާ އިން ކަމަށް އެ ކްލަބުގެ ކޯޗު ޒަވީ ބުނެފިއެވެ.

ބާސާ އިން އެންމެ ފަހުން ކުޅުނު ތިން މެޗުގެ ތެރެއިން ދެ މެޗަކުން ވަނީ ބަލިވެފައެވެ. އަމިއްލަ ދަނޑުގައި އިއްޔެ ކުޅުނު ސްޕެނިޝް ލަލީގާ މެޗުގައި ވެސް ޑިޕޯޓިވޯ އަލަވޭސް އިން މެޗު ފެށިތާ 17 ސިކުންތުގެ ތެރޭގައި ގޯލެއް ޖެހުމުން ބާސާއަށް އުނދަގޫތަކެއް ކުރިމަތިވިއެވެ. އެ މެޗުގައި ފަހަތުން އަރައި ބާސާ މޮޅުވީ ދެވަނަ ހާފުގައި އެޓީމުގެ ޕޮލެންޑް ފޯވަޑް ރޮބާޓް ލެވަންޑޯސްކީ ޖެހި ދެ ގޯލުންނެވެ.

އެ މެޗަށްފަހު ވާހަކަދައްކަމުން ޒަވީ ވަނީ ރުޅިވެރި ރާގެއްގައި ނޫސްވެރިންނަށް ފާޑުކިޔުންތައް އަމާޒުކޮށްފައެވެ. އޭނާ ދެކޭގޮތުގައި ބާސާގެ ނަތީޖާތައް ގޯސްވެގެންދިޔައީ މީޑިއާގައި ދެކެވޭ ނުރަނގަޅު ވާހަކަތަކުގެ ސަބަބުން ޓީމަށް އެކަމުގެ އަސަރުކޮށްގެންނެވެ.

"ޓީމަށް އަސަރުކުރަނީ މީޑިއާގައި ގިނަ ފާޑުކިޔުންތަކެއް އަމާޒުކުރާނީ. އަހަރެން ކުޅުންތެރިއެއްގެ ގޮތުގައި ކުޅެމުންދިޔަ އިރުވެސް އެކަމުގެ އަސަރުކުރި. މިހާރު ވެސް މި ފެންނަނީ އެކަން. ބާސާއާ މެދު ގޯސް ވާހަކަތަކެއް ފެތުރުމުން ޓީމަށް އެ ގެއްލުންތައް ކުރިމަތިވޭ،" ނޫސްވެރިންގެ ބައްދަލުވުމުގައި ޒަވީ ބުންޏެވެ.

ބާސާ އިން ހޯދި މޮޅާއެކު ވާދަވެރި ރެއާލް މެޑްރިޑާ ދެމެދު އޮތް ފަރަގު ވަނީ ދެ ޕޮއިންޓަށް ކުޑަވެފައެވެ. ތާވަލުގެ ތިންވަނައިގައި އޮތް ބާސާއަށް 13 މެޗުން 30 ޕޮއިންޓް ލިބިފައިވާ އިރު، ދެވަނައިގައި އޮތް ރެއާލަށް 13 މެޗުން ލިބިފައިވަނީ 32 ޕޮއިންޓެވެ. އަދި ލީގު ތާވަލުގެ އެއްވަނައިގައި އޮތް ޖިރޯނާއަށް 13 މެޗުން ލިބިފައިވަނީ 34 ޕޮއިންޓެވެ.