ޔުއޭފާ ޔޫރޮޕާ ލީގު ގްރޫޕް ޖީގައި ޗެކް ރިޕަބްލިކްގެ ސްލާވިއާ ޕްރާހާއާއި އިޓާލިއަން ސެރީއާގެ އޭއެސް ރޯމަ ބައްދަލުކުރި މެޗު ސްލާވިއާއިން ކާމިޔާބުކޮށް ގްރޫޕްގެ އެއްވަނައަށް ކުރިއަށް ޖެހިލައިފިއެވެ.
ސްލާވިއާގެ ދަނޑުގައި ކުޅުނު މި މެޗު އެ ޓީމުން ކާމިޔާބު ކުރީ 2-0 އިންނެވެ.
ދެ ޓީމުގެ ފަރާތުން ވަދަވެރި ކުޅުމެއް ފެނިގެންދިޔަ މި މެޗުގައި ގިނައިރު ރޯމާއިން ބޯޅަ ގެންގުޅުނު ނަމަވެސް ގިނަ ހަމަލާތަކެއް އުފައްދައިފައިވަނީ ސްލާވިއާއިންނެވެ. މެޗުގެ ފުރަތަމަ ހާފުގައި ދެ ޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ކުރެވިފައެއް ނުވެއެވެ.
މެޗުގެ ފުރަތަމަ ލަނޑު 50 ވަނަ މިނެޓުގައި ކާމިޔާބުކޮށް ސްލާވިއާއަށް ކުރި ހޯދައިދިނީ ވަކްލޭވް ޔުރެޗްކާއެވެ. މި ލަނޑާ އެކު ސްލާވިއާގެ ސަޕޯޓަރުންގެ އަޑުން މުޅި ދަނޑު ގުގުމާލިއެވެ. މެޗުގައި ސްލާވިއާގެ ދެވަނަ ލަނޑު އެ ޓީމަށް ކާމިޔާބުކޮށްދިނީ 74 ވަނަ މިނެޓުގައި ލޫކަސް މަސޮޕުސްޓްއެވެ.
މެޗުގައި ރޯމާގެ ފަރާތުން އެންމެ ރަނގަޅު ކުޅުމެއް ފެނިގެން ނުދިޔަ އިރު އެ ޓީމަށް ސްލާވިއާގެ ގޯލަށް އަމާޒުކޮށް ފުރަތަމަ ހަލާއެއް ފޮނުވަލެވިފައިވަނީ ވެސް 52 ވަނަ މިނެޓުގައެވެ.
މޮޅާ އެކު ސްލާވިއާ މިހާރު ވަނީ މި ގްރޫޕުގައި މިހާތަނަށް ކުޅުނު ހަތަރު މެޗުން ލިބިފައިވާ ނުވަ ޕޮއިންޓާ އެކު ގްރޫޕްގެ އެއްވަނައަށް އަރައިފައެވެ. އަދި، ރޯމާއަށް ވެސް ނުވަ ޕޮއިންޓް ލިބިފައިވީ ނަމަވެސް އެ ޓީމަށް ދެވަނަ ލިބެނީ ފައިދާ ގޯލަށް ބަލާއިރު ސްލާވިއާއަށް ކުރި ލިބޭތީއެވެ. ސްލާވިއާއިން ވަނީ މި ފަހަރުގެ ޔޫރޮޕާ ލީގުގެ މުބާރާތުގައި ކޮލިފައިންއާ އެކު އަމިއްލަ ދަނޑުގައި ކުޅުނު ހަތަރު މެޗު ވެސް ކާމިޔާބުކޮށްފައެވެ. އަދި، 13 ލަނޑު ޖަހައިފައިވާއިރު ބައިކޮޅަށް އެންމެ ލަނޑެއް ވެސް ވަދެފައެއް ނުވެއެވެ.