ހަ މެޖިސްޓްރޭޓް ކޯޓަކަށް ފަނޑިޔާރުން އައްޔަންކުރަން ނިންމާފައިވާ ކަމަށް ޖުޑީޝަލް ސާވިސް ކޮމިޝަން (ޖޭއެސްސީ)އިން މިއަދު އިއުލާނުކޮށްފިއެވެ.
ޖޭއެސްސީން މިއަދު ނެރުނު ބަޔާނެއްގައި ބުނެފައިވަނީ "ފަނޑިޔާރުން އައްޔަންކުރުމުގައި ކޮމިޝަނަށް ލަފާދޭ ކޮމިޓީ"އިން ލަފާއަރުވައިފައިވާ ފަނޑިޔާރުންގެ ތެރެއިން ބޭފުޅުން އައްޔަންކުރުމަށް މިދިޔަ ހަފުތާގެ ބުދަ ދުވަހު އެ ކޮމިޝަންގެ ބައްދަލުވުމެއްގައި ނިންމާފައިވާ ކަމަށެވެ.
އެގޮތުން، ހދ. ނޮޅިވަރަން މެޖިސްޓްރޭޓް ކޯޓުގެ އިސް މެޖިސްޓްރޭޓްކަމަށް ޢައްޔަންކޮށްފައިވަނީ އަޙްމަދު އަރީޖެވެ. އޭނާވަނީ، ކުއްލިއްޔަތުއް ދިރާސާތުލް އިސްލާމިއްޔާއިން ބެޗްލާ އޮފް ޝަރީޢާ އެންޑް ލޯ ވިތު އޮނާސް ޙާސިލްކުރައްވައި، ވިލާ ކޮލެޖްއިން މާސްޓާ އޮފް ޝަރީޢާ ޙާސިލްކުރައްވާފައެވެ.
ފަނޑިޔާރު އައްޔަންކުރުމަށް ހަމަޖެހިފައިވާ ބ. ދަރަވަންދޫ މެޖިސްޓްރޭޓް ކޯޓުގެ އިސް މެޖިސްޓްރޭޓްކަމަށް އައްޔަންކޮށްފައިވަނީ، މަރްޔަމް ރަސާ ރާފިޢުއެވެ. އޭނާވަނީ ދިވެހިރާއްޖޭގެ ޤައުމީ ޔުނިވާސިޓީއިން ބެޗްލާ އޮފް ޝަރިޢާ އެންޑް ލޯ އަދި މާސްޓާ އޮފް ލޯސް ޙާސިލްކުރައްވާފައެވެ. އަދި، ޤާނޫނީ ދާއިރާގައި ފަސް އަހަރު ދުވަހުގެ ތަޖުރިބާ ހޯއްދަވާފައިވެއެވެ.
ނ. މާފަރު މެޖިސްޓްރޭޓް ކޯޓަށް އައްޔަންކޮށްފައިވާ މުޙައްމަދު އީމާން ވަނީ ވިލާ ކޮލެޖުން ބެޗްލާ އޮފް ޝަރީޢާ ޙާސިލްކުރައްވައި ދިވެހިރާއްޖޭގެ ޤައުމީ ޔުނިވާސިޓީއިން މާސްޓާ އޮފް ލޯސް ޙާސިލްކުރައްވާފައެވެ. މީގެއިތުރުން، ޝަރުޢީ ދާއިރާގައި ހަ އަހަރު ދުވަހުގެ ތަޖުރިބާ ހޯއްދަވާފައިވެއެވެ.
ހދ. ހަނިމާދޫ މެޖިސްޓްރޭޓް ކޯޓުގެ އިސް މެޖިސްޓްރޭޓްކަމަށް ޢައްޔަންކޮށްފައިވާ އާމިނަތު ޒާފިރާ ވަނީ ދިވެހިރާއްޖޭގެ ޤައުމީ ޔުނިވާސިޓީއިން ބެޗްލާ އޮފް ޝަރީޢާ އެންޑް ލޯ އަދި މާސްޓާ އޮފް ލޯސް ޙާސިލްކުރައްވައިފައެވެ. އަދި، ޝަރުއީ ދާއިރާގައި ފަސް އަހަރު ދުވަހުގެ ތަޖުރިބާ ހޯއްދަވައިފައިވެއެވެ.
ށ. ކޮމަންޑޫ މެޖިސްޓްރޭޓް ކޯޓުގެ އިސް މެޖިސްޓްރޭޓްކަމަށް އައްޔަންކޮށްފައިވާ ޙައްވާ އިބްރާހީމްއަށް ޝަރުޢީ ދާއިރާގައި ފަސް އަހަރު ދުވަހުގެ ތަޖުރިބާ ލިބިފައިވެއެެވެ. މީގެއިތުރުން އޭނާ ވަނީ ކުއްލިޔަތުއް ދިރާސާތުލް އިސްލާމިއްޔާއިން ބެޗްލާ އޮފް ޝަރިޢާ އެންޑް ލޯ ވިތް އޮނާސް ޙާސިލްކުރައްވައިފައެވެ.
ގއ. ދާންދޫ މެޖިސްޓްރޭޓް ކޯޓްގެ ފަނޑިޔާރަށް އައްޔަންކުރި އަލްއުސްތާޛު ޙައްމާދު ވާފިރު ވަނީ ބެޗްލާ އޮފް ޝަރީޢާ އެންޑް ލޯ ދިވެހިރާއްޖޭގެ ޤައުމީ ޔުނިވާސިޓީއިން ޙާސިލްކުރައްވާފައެވެ. އޭނާއަށް ޝަރުޢީ ދާއިރާގައި ފަސް އަހަރުގެ ތަޖުރިބާ ލިބިފައިވެއެވެ.