ގައުމީ ފިލްމް އެވޯޑްސްގައި 12 އެވޯޑް އުފުލައިލި އިޓާނަލް ޕިކްޗާސްގެ ފިލްމް "އަމާނާތް" ރިލީޒް ކުރިތާ ވަނީ ދާދިފަހުން 25 އަހަރު ވެފައެވެ. މި ފިލްމަކީ އެކި ގޮތްގޮތުން ހާއްސަ ވެގެން ގޮސްފައިވާ ފިލްމެކެވެ.
މުހައްމަދު ނިޔާޒް (ޓެޑްރީ) ޕްރޮޑިއުސްކޮށް 1998 ވަނަ އަހަރު ނެރުނު މި ފިލްމަށް މިހާރު 25 އަހަރު ވެފައިވާއިރު މި ފިލްމަކީ އަދިވެސް ގިނަ ބަޔަކު ވާހަކަ ދައްކާ ފިލްމެކެވެ. އެކި ސަބަބުތަކާ ގުޅިގެން މި ފިލްމު ހާއްސަ ވެއެވެ. ފިލްމު އެކްޓިން އިން ފެށިގެން ފިލްމުގެ މަންޒަރުތަކާ ހަމައަށް ވެސް އެތައް ބަޔަކަށް އަދިވެސް މި ފިލްމު އެންމެ ކަމުދާ ދިވެހި ފިލްމުތަކުގެ ލިސްޓުގެ މައްޗަށް އަރައެވެ.
ފިލްމުގެ ވާހަކަ ދައްކާއިރު ފިލްމުގެ ސައުންޑްޓްރެކް އަކީ ވެސް ބޮޑު ސަމާލު ކަމެއް ދޭން ޖެހޭ އެއްޗެކެވެ. މި ފިލްމުގައި ހިމަނާފައިވާ ލަވަތަކަކީ އަދިވެސް ގިނަ ބަޔަކު ޖަހާ ލަވަތަކެކެވެ. އެގޮތުން ފިލްމުގެ ސައުންޑްޓްރެކް މިހާ އައިކޮނިކް ވެފައިވާއިރު ފިލްމުގެ ސައުންޑްޓްރެކުން އެކި މީހުންނަށް ކަމުދަނީ އެކި ލަވަތަކެވެ. އޭގެތެރެއިން އެންމެ ކަމުދަނީ ކޮން ލަވައެއް ހެއްޔެވެ؟
އަމާނާތް ފިލްމު ސައުންޑްޓްރެކުގައި ޖުމްލަ އަށް ލަވައެއް ހިމެނެއެވެ. މި ލަވަތަކުގެ މިއުޒިކްގައި މަސައްކަތް ކޮށްފައިވަނީ މުހައްމަދު އިމްތިޔާޒާއި މުހައްމަދު އިކްރާމް އަދި އިބްރާހީމް ޝިހާމެވެ. ލަވަތަކުގެ ލިރިކްސްގެ މަސައްކަތް ކޮށްފައިވަނީ އަހުމަދު ޝަރުމީލާއި އައިމިނަތު ފާއިޒާ އާއި މައުސޫމް ޝާކިރު އަދި އަބްދުއް ރަހީމް ރަޝާދެވެ.
އަލްބަމްގައި ހިމެނޭ ލަވަތަކަކީ،
އޯގާވެރިވޭ ލޯބިވާ - ފާތިމަތު ރައުފް، އުމަރު ޒާހިރު
ތަގުދީރު – ފަޒީލާ އާމިރު، އަލީ ރަމީޒު
އުއްމީދު - އަލީ ރަމީޒު
މައުސޫމް – މުހައްމަދު ހުޒާމް
އަމާނާތް – ފާތިމަތު ރައުފް
ކުރުނބާ – ލީޝާ ހަނީފް، އިއުޖާޒް ހާފިޒް، އައިމިނަތު ސުޒާން
ޖަވާހިރު – ފާތިމަތު ރައުފް
ކުލުނު – ޝިފާ ތައުފީގު
ފިލްމުގެ ޕްލޭލިސްޓުން އެންމެ ކަމުދަނީ ކޮން ލަވައެއް ހެއްޔެވެ؟