ޕެރިސް ސެއިންޓް ޖާމައިން (ޕީއެސްޖީ)ގެ ފްރާންސް ތަރި ކިލިއަން އެމްބާޕޭ ގިނަ ބެލޮންޑިއޯ އެވޯޑުތަކެއް ހޯދާނެ ކަމަށް އެ ކްލަބުގެ ކޯޗު ލުއިސް އެންރީކޭ ބުނެފިއެވެ.
މިއަހަރުގެ ބެލޮންޑިއޯ އެވޯޑަށް އާޖެންޓީނާ ތަރި ލިއޮނެލް މެސީއާ އެންމެ ގާތުން ވާދަކުރި ދެ ކުޅުންތެރިންގެ ތެރޭގައި އެމްބާޕޭ ހިމެނިގެންދިޔައެވެ. އެމްބާޕޭއަށް ތިންވަނަ ލިބިގެންދިޔަ އިރު، ދެވަނަ ލިބުނީ މެންޗެސްޓާ ސިޓީގެ ނޯވޭ ފޯވަޑް އާލިން ހާލަންޑަށެވެ.
މިދިޔަ ސީޒަނުގައި ޕީއެސްޖީއާއެކު އެމްބާޕޭއަށް ޔޫއެފާ ޗެމްޕިއަންސް ލީގު ހޯދިފައި ނުވާ އިރު، މިދިޔަ އަހަރުގެ ވޯލްޑް ކަޕްގެ ފައިނަލުގައި މެސީގެ ކެޕްޓަންކަމުގެ ދަށުން ކުޅުނު އާޖެންޓީނާ އަތުން ފްރާންސް ވަނީ ބަލިވެފައެވެ. ނަމަވެސް ފްރާންސާއެކު ވޯލްޑް ކަޕްގެ ފައިނަލުގައި އުމުރުން 24 އަހަރުގެ އެމްބާޕޭ ވަނީ ހެޓްރިކެއް ހަދައިފައެވެ. އެ އެވޯޑާ ގުޅޭގޮތުން ޕީއެސްޖީގެ ކޯޗު އެންރީކޭ ވާހަކަދައްކާފައިވާ އިރު، އެވޯޑު ހޯދުމަށް އެމްބާޕޭ ހޯދަން ޖެހޭ ކާމިޔާބީތަކާ ގުޅޭގޮތުން ވެސް ވަނީ ވާހަކަދައްކައިފައެވެ.
"ބެލޮންޑިއޯ އެވޯޑު ހޯދުމަށް އިންޑިވިޖުއަލް ކުޅުމުގެ އިތުރުން ކްލަބާއި ގައުމީ ޓީމާއެކު ވެސް ޓްރޮފީތައް ހޯދަން ޖެހޭނެ. އަހަރެމެން ޕީއެސްޖީގައި މިދަނީ އެ ކާމިޔާބީތައް ހޯދުމަށް މަސައްކަތްކުރަމުން. އަދި އެމްބާޕޭއަށް ގައުމީ ޓީމާއެކު ވެސް ކާމިޔާބީ ހޯދޭނެ. އެމްބާޕޭ ގިނަ ބެލޮންޑިއޯ އެވޯޑުތަކެއް ހޯދާނެކަމުގެ ޔަގީންކަން އެބައޮތް،" ނޫސްވެރިންނާ ވާހަކަދައްކަމުން އެންރީކޭ ބުންޏެވެ.
މިދިޔަ އަހަރު އާޖެންޓީނާއާއެކު ވޯލްޑް ކަޕް ކާމިޔާބުކުރި މެސީ ވަނީ އަށް ފަހަރު ބެލޮންޑިއޯ އެވޯޑު ހޯދައިފައެވެ. ނަމަވެސް ކްލަބު ލެވެލްގައި މިދިޔަ ސީޒަނުގައި އެންމެ ގިނަ ކާމިޔާބީތައް ހޯދާފައިވަނީ ހާލަންޑްއެވެ. އޭނާ ވަނީ ސިޓީއާއެކު އިނގިރޭސި ޕްރިމިއާ ލީގާއި އެފްއޭ ކަޕްގެ އިތުރުން ޔޫއެފާ ޗެމްޕިއަންސް ލީގު ވެސް ކާމިޔާބުކޮށްފައެވެ.