އިންޓަ މަޔާމީގެ އާޖެންޓީނާ ތަރި ލިއޮނެލް މެސީ ފަހަތަށް ޖައްސައިލުމަށް ފަހު، މޭޖާ ލީގް ސޮކާ (އެމްއެލްއެސް)ގެ އެންމެ މޮޅު އާ ކުޅުންތެރިޔާގެ އެވޯޑު އެޓްލާންޓާ ޔުނައިޓެޑުގެ ޖޯޖަސް ޖަކޯމާކިސް ހޯދައިފިއެވެ.
އުމުރުން 28 އަހަރުގެ ގްރީސް ފޯވަޑް ޖަކޯމާކިސް އަކީ ސެލްޓިކްއިން މި އަހަރުގެ ތެރޭގައި އެޓްލާންޓާއާ ގުޅުނު ކުޅުންތެރިއެކެވެ. އޭނާ އެ ކްލަބާ ގުޅި، އެޓްލާންޓާއަށް މޮޅު ކުޅުމެއް ދެއްކިއެވެ.
އެމްއެލްއެސްގެ އެންމެ މޮޅު އާ ކުޅުންތެރިޔާގެ އެވޯޑު، "ނިއުކަމާ އެވޯޑު" ދީފައިވަނީ އެމްއެލްއެސްގެ ކޯޗުންނާއި ކުޅުންތެރިންނާއި ޓެކްނިކަލް ޑިރެކްޓަރުން އަދި ޖެނެރަލް މެނޭޖަރުންގެ ވޯޓާ އެކުއެވެ. މިދިޔަ މަހު ނެގި އެ ވޯޓުން ކުރި ހޯދާފައިވަނީ ޖަކޯމާކިސްއެވެ.
ޖަކޯމާކިސް އެ އެވޯޑު ހޯދުމާ އެކު ވިދިވިދިގެން ދެ އަހަރު އެ އެވޯޑު ހޯދި ހަމައެކަނި ކްލަބުގެ ޝަރަފު އެޓްލާންޓާއަށް ވަނީ ލިބިފައެވެ. މިދިޔަ އަހަރު އެ އެވޯޑު ހޯދާފައިވަނީ އެޓްލާންޓާގެ ތިއާގޯ އަލްމާޑާއެވެ. އެ އެވޯޑު އެންމެ ގިނައިން ހޯދާފައިވަނީ އެޓްލާންޓާ އާއި ސިއޭޓަލް ސައުންޑާސްއިންނެވެ. އެއިން ކޮންމެ ކްލަބަކުން ވެސް ތިން ފަހަރު އެ އެވޯޑު ހޯދާފައިވާ އިރު، މީގެ ކުރިން 2019 ވަނަ އަހަރު އެޓްލާންޓާއިން އެ އެވޯޑު ހޯދާފައިވަނީ މިގޭލް އަލްމިރޮންއެވެ.
އެމްއެލްއެސްގެ އެންމެ މޮޅު އާ ކުޅުންތެރިޔާގެ އެވޯޑަށް ޖަކޯމާކިސްއާ ވާދަކޮށްފައިވަނީ އަށް ފަހަރު ބެލޮންޑިއޯ އެވޯޑު ހޯދާފައިވާ މެސީގެ އިތުރުން ސެއިންޓް ލޮއިސް ސިޓީ އެސްސީގެ ޖަރުމަން މިޑްފީލްޑަރު އެޑުއާޑް ލޮވެންއެވެ. މި ސީޒަނުގެ އެމްއެލްއެސްގައި ޖަކޯމާކިސް މޮޅު ކުޅުމެއް ދައްކާފައިވާ އިރު، ދެވަނައަށް އެންމެ ގިނަ ގޯލު ޖެހި ކުޅުންތެރިންގެ ތެރޭގައި ވެސް އޭނާ ހިމެނެއެވެ. އޭނާ ވަނީ 17 ގޯލު ކާމިޔާބުކޮށްފައެވެ.
އެ އެވޯޑަށް މެސީ ނޮމިނޭޓުވުން ވެސް ވެގެން ގޮސްފައިވަނީ ހައިރާންކުރަނިވި ކަމަކަށެވެ. އޭނާ އެ އެވޯޑަށް ނޮމިނޭޓުވެފައިވަނީ މި ސީޒަނުގައި އެންމެ ހަ މެޗު ކުޅެގެންނެވެ.